Saturday , November 17 2018
Home / Sosial & Politika / Hugo: Reparasaun Tenke Inklui Iha Politika Governu nian, Galuh: Atensaun Espesial Ba Vitima Vulneravel Feto Importante
Centro Nacional Chega! halo seminariu, orador sira mak eis asesor iha CAVR Pat Walsh, Bispu Gunnar Stalsett no Galuh Wandita. [Foto: copyright CNC | 31.10.2018]

Hugo: Reparasaun Tenke Inklui Iha Politika Governu nian, Galuh: Atensaun Espesial Ba Vitima Vulneravel Feto Importante

“Atensaun espesial ne’e presiza at hakotu siklu violensia ba feto no atu servisu ba sosiedade foun ida ne’ebe livre hosi violensia. Ba Vitima feto, problema reparasaun bele sai asumtu moris ka mate”. Galuh Wandita

Centro Nacional Chega! [CNC] realiza seminariu ho tema Justisa Tranzisional, rezulusaun Konflitu no Rekonsiliasaun. Liu hosi seminariu refere orador hosi AJAR, Galuh Wandita iha aprezentasaun hatete katak justisa tranzisional nudar aproximasaun ida ne’ebe atu hametin konstrusaun nasuan bazeia ba prosesu reflesaun ne’ebe klean konaba abut problema, fator sira ba kauza konflitu, rekonnesementu konaba ezistensia vitima, no mos hametin justisa ba autor violasaun krimi grave.

Tuir Galuh katak ba asumtu reparasaun nudar responsabilidade estadue ne’ebe ema haluhan no potensia transformasaun sosial. Timor-Leste hakat dook ona hosi tempu pasadu ida ne’ebe violasaun direitu umanus, partikularmente violensia ba feto sira akontese iha eskalaun luan, ne’ebe autor sira atua iha impunidade total, liu-liu ho livre uza forsa no rekursu estadu atu apoio sira nian krimi.

“Liu tihan 19 desde konsulta popular alkansa barak ne’ebe konsege hetan, maibe se karik ita onestu haree situasaun vitima sira, mak ita tenke rekonnse katak ita nia servisu ba oin sei naruk”, hateten Galuh iha salaun Ministeriu Solidariedade Sosial no Inkluzaun [MSSI], 30/10

Galuh reforsa liutan katak vitima violasaun direitu umanus, partikularmente feto kontinua hetan diskriminasaun no violasaun seluk tanba violasaun direitu umanus iha pasadu. Experiensia iha terenu hatudu ona katak luta ba justisa ba feto naruk tebes. Vitima feto kontinua luta atu sobervive kleur depois de konflitu hotu.

“Atensaun espesial ba vitima vulneravel feto importante tebes, sein esforsu ne’e sira bele dezaparesidu fali. Atensaun espesial ne’e presiza at hakotu siklu violensia ba feto no atu servisu ba sosiedade foun ida ne’ebe livre hosi violensia. Ba Vitima feto, problema reparasaun bele sai asumtu moris ka mate”, hateten Galuh

Liga ho reparasaun refere, Direitor Ezekutivu CNC, Hugo Fernandes ba TAFARA.TL hateten katak CNC nia mandatu hodi monitoriza implementasaun ba rekomendasaun sira. Iha rekomendasaun sira ne’e inklui mos reparasaun ne’e kabe ba responsabilidade kada Ministeriu sira . CNC tenke koopera ho Ministeriu sira intermus atu asegura katak politika reparasaun tenke inklui iha politika governu nian. Governu mak iha rekursu atu fo resposta ba ida ne’e. Centru Chega bele tulun governu atu hatudu modelnu sira.

Ami agora hamutuk ho Ministeriu sira, liu-liu MSSI no Ministeriu Saude halo hela dezenvolve politika Fundus Solidaridade ne’ebe rekomendasaun mai hosi komisaun CAVR no mos CVA. Sira rekomenda katak atu tulun ho meios ne’ebe sustentavel liu ba grupu vulneravel sira, diak liu mak estabelese fundus solidaridade. CVA ne’e involve hosi nasaun Indonesia no Timor-Leste entaun sira nain rua mak prioridade hodi tau uluk rekursu, hafoin ba pais sira ne’ebe mak sente katak sira iha solidaridade duni ba ema Timor. Fundus ida ne’e presiza instituisaun ida para atu jere ho lolos, hodi halo programa reparasaun”, hateten Hugo Fernandes

Tuir prinsipiu Nasoens Unidas ba kontra impunidade, prinsipiu hirak ne;e oferese estrutura servisu ne’ebe olistiku. Tuir ativista hosi Indonesia Galuh iha diskusaun aprezenta katak Komite bele uza direitu vitima ne’ebe diside tiha ona no fo aproximasaun jeneru ne’ebe forte konaba direitu ba justisa, direitu atu hatene lia los no direitu ba reparasaun no garantia ba la repetisaun.

Iha rekomendasaun CHEGA! konaba reparasaun, CAVR esforsa atu resolve problema nesesidade ne’ebe boot hosi vitima ho kapasidade ne’ebe limitadu. CAVR mensiona prinsipiu sira atu dezena no halao programa reparasaun iha Timor-Leste hanesan adekuadu katak seletivu no foka ba nesesidade ne’ebe urgente hosi vulneravel, bele asesu hosi vitima ne’ebe marjinalizadu no moris iha fatin dook, hakbiit vitima, sensivel ba jeneru no prioritize apoiu ba sira ne’ebe nesesitadu tebes. * [ Zevonia Vieira | TAFARA.TL | 31.10.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Juventude La Hakarak Promesas no Hakribi Atitude Koruptu

Hau fiar katak joven sira iha talentu atu hamosu no habelar idea foun no tau …

Leave a Reply

Your email address will not be published. Required fields are marked *