Friday , September 21 2018
Home / Eleisaun Parlamentar / Indijita PM, Prezidente da Republika Enkontru ho Partidu Polítiku
Prezidente da Republika momentu halo deskursu iha tomada de posse ba membru Governu [Foto: Media PR}

Indijita PM, Prezidente da Republika Enkontru ho Partidu Polítiku

Prezidente da Republika, Dr. Francisco Guterres Lú Olo, halo enkontru ho partidu politiku no koligasaun partidária konaba indijitasaun Primeiru Ministru. Iha enkontru ne’ebe halao iha loron 19/06, nudar sorumutu dahuluk hafoin deputadu sira simu posse.

Liu hosi komunikadu imprensa media Gabinete Prezidente esplika katak iha semana kotuk, Aliansa Mudansa ba Progresu (AMP) entrega karta ba Prezidente da Republika konaba desizaun indijitisaun Primeiru Ministru. Tuir mandatu Konstitusionál Prezidente da Republika sei rona partidu polítiku nia hanoin, molok hasai Dekretu Prezidensiál ba nomeiasaun Primeiru Ministru VIII Governu Konstitusionál.

“Iha enkontru ne’e, Prezidente AMP, Xanana Gusmão kumpri desizaun ne’ebé foti iha enkontru dahuluk ho Prezidente da Republika depois de eleisaun antecipada, katak sei indijita Primeiru Ministru hafoin deputadu sira simu pose no reafirma karta ne’ebé haruka ba Prezidente da Republika semana kotuk”, esplika Presidente liu hosi komunikadu imprensa.

Iha komunikadu imprensa hateten mos katak partidu polítiku no koligasaun partidária, FRETILIN, Partidu Demokrátiku (PD) no Frente Dezenvolvimentu Demokrátiku (FDD) laiha objeisaun ba indijitasaun Primeiru Ministru no apoiu ba desizaun Prezidente da Republika, hodi indijita Primeiru Ministru. FRETILIN no PD mantein nafatin ho desizaun partidu atu sai opozisaun. Koligasaun FDD informa ba Prezidente da Republika kona ba karta disolusaun koligasaun ne’ebé haruka tiha ona ba Tribunál. Lideransa PUDD, Frente Mudansa no UDT apoiu desizaun Prezidente da Republika, atu nomeia Primeiru Ministru.

Prezidente da Republika informa ba lider partidu polítiku no koligasaun partidaria katak sei uza nia kompeténsia, hodi defende integridade Governu, liuliu Estadu tanba ne’e presiza haree didi’ak fali lista membru VIII Governu Konstitusionál molok hatama ba Prezidente da Republika. Iha tempu badak, Prezidente da Republika sei tur hamutuk ho Primeiru Ministru indijitadu hodi haree lista membru VIII Governu Konstitusionál molok nomeiasaun.

Prezidente da Republika iha enkontru ne’e informa ba partidu polítiku no koligasaun partidária, kona-ba data tomada de posse dahuluk ba membru VIII Governu Konstitusionál ne’ebé sei hala’o iha 22 Juñu 2018 iha Salaun Nobre-Lahane.

Lider partidu polítiku sira ne’ebé mak prezente iha enkontru ne’e mak Prezidente AMP Xanana Gusmão, Portavoz AMP Taur Matan Ruak, Sekretáriu Jerál CNRT Francisco Kalbuady Lay, Prezidente KHUNTO Armanda Berta, Konselleiru KHUNTO José Naimori Bucar, Sekretáriu Jerál FRETILIN Mari Alkatiri no nia Vise Prezidente Francisco Branco, Vise Prezidente Aniceto Guterres, Adjuntu Sekretáriu Jerál Jose Reis, Adjuntu Sekretáriu Jerál Flavio Guterres, Adjunta Sekretáriu Jerál Cipriana Perreira, membru CPN Josefa Perreira, Prezidente PD Mariano Asanami, Sekretáriu Jerál António Conceição, Prezidente CPN Adriano Nascimento no Vise Prezidente CPN Lurdes Bessa, Prezidente PUDD António Benevides, Prezidente UDT Gilman dos Santos no Prezidente Frente Mudansa Egidio dos Santos. * [ Zevonia Vieira | TAFARA.TL | 19.06.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *