Wednesday , June 19 2019
Home / Sosial & Politika / Investe ba Labarik Sira Nia Futuru no Respeita Dignidade Labarik
labarik sira selebra loron labarik nian hamutuk ho Presidente Republika Lu Olo iha Palacio Presidente.[Foto: Zevonia Vieira | TAFARA.TL | 01.06.2017].

Investe ba Labarik Sira Nia Futuru no Respeita Dignidade Labarik

Osvaldo Pereira labarik idade 11, faan mantolu iha palacio president nia sorin, hodi hein labarik sira hosi Palacio sosa netik nia mantolu daan. Nia lahatene katak iha loron labarik nian.

Presidente Republika Francisco Guterres Lu Olo selebra loron mundial labarik nian, iha Palacio Presidente.

Iha loron importante ba labarik sira iha mundu tomak, liu-liu iha Timor-Leste, Presidente Lu Olo hato’o nian mesajen katak, Timor-Leste retifika ona Konvensaun Internasional ba Direitu Labarik sira nian iha tinan 2003. Estadu Timor-Leste hala’o ona ninian dever nudar Estadu parte konvensaun ne’e nian, liu hosi hato’o relatoriu periodiku kona ba implementasaun Konvensaun Nasoens Unidas.

Presidente Lu Olo hato’o nian plataforma politika katak atu promove dialogu entre Orgaun Soberania Estadu nian.

“Hau Hakarak atu reitera fila fali hau nian komitmentu pesoal, hau nia komprimisiu politiku no banati ba Konstituisaun atu halo buat hotu ne’ebe hau bele atu tau matan ba labarik sira nia direitu. Hau sei koopera ho Orgaun Soberani sira sleuk, liu-liu enkoraja governu atu fo atensaun ne’ebe mak boot ba labarik sira. Hau sei fo atensaun maka’as ba implementasaun Planu Asaun Nasional ba dirietu labarik sira nian”, tenik Lu Olo

Tema ba loron mundial labarik nian, mak “Investe ba labarik sira nia future: hametin kompromisiu politiku ba implementasaun planu asaun nasional ba labarik tinan 2016-2020.

Relasiona ho tema tina ida ne’e, Dr.Franciscio Lu Olo, enkoraza inan aman sira atu hahu poupansa ba sira nia oan.

“Hau enkora familia sira atu hahu investe osan ba oan sira nian future. Iha parte sorin hau fo atensaun ba modelu investimentu ida ne’ebe mak ita nia beila sira halao ona iha tempu naruk nia laran, hos iotas ba otas to ohin loron, kuda ai atu oan no beioan sir abele hamahon an iha loron ikus. Nune’e hau sei fahe ai oan ba labarik no inan aman sira, atu loro ba kuda iha idak-idak nia fatin. Ita hahu hanroin no hatoman ita nia oan sira tau promove dezenvolvimentu ida ne’ebe sustentavel. Ita hatudu katak labarik Timor-Leste sira mos hatene kontribui ba lita hasoru mudansa klimatika no proteje ita nia meiu ambiente”, esplika Lu Olo.

Iha parte sorin, Premeiru Minisru Dr. Rui Maria Araujo ne’ebe partisipa iha loron mundial labarik. Iha Premeiru Ministru nian palestra esplika katak, laiha buat ida ne’ebe diak liu duke selebra loron labarik nian, ho duni labarik sira, tanba ne’e labarik sira mundu tomak, espesial ba ita nia labarik feto no mane sira iha Timor-Leste, parabens espesial ba sira.

“loron labarik nudar loron special ba imi, ne’ebe selebra iha mundu tomak. Ho homenajen ida ne’ebe ami hotu hato ba labarik sira, ne’ebe dalabarak sai we matan inspirasaun ba ami adultu. Alende nudar inspirasaun, imi mos mak esperansa no future, katak imi mak future ba pais, future povu nian no futuru ba humanidade tomak nian”, hateten Dr. Rui Araujo.

Premeiru Minsitru reafirma liutan katak, nudar orgaun estadu nian, ami iha dever no hanesan sidadaun atu rekonyese, respeita no proteje imi nian direitu no promove imi nian dignidade no imi nian resimentu iha ambiente ne’ebe saudavel, atu imi bele atinji imi nian potensialidade tomak.

Timor-Leste restaura nian independensia iha 2002, no iha tinan 2003 governu aprova konvensaun ba dirietu labarik nian ne’ebe sai dokumentu universal no iha nia laran kontempla ona labarik sira nian direitu.

Iha tinan 2013 governu Timor-Leste submete ba komisaun direitus labarik nian iha Nasoens Unidas relatoriu kona ba implementasaun. Hosi relatoriu ne’ebe relata ba Nasoens Unidas, Timor-Leste hetan rekomendasaun atu dezenvolve planu asaun ba labarik.

Iha Premeiru Ministru nian deskursu mos esplika katak, Timor-Leste mos adopta ona juridikus lubuk ida ne’ebe ajuda no hametin liutan protesaun ba dirietu labarik ne’ebe komplementa iha konvensaun.

Liu hosi loron mundial ida ne’e, Premeiru Ministru hato’o nia lia menon katak, investimentu ba labarik tenke mai hosi ita hotu, hosi ema hotu ne’ebe iha responsabilidade, hodi kontribui ba labarik sira, atu moris iha ambiente familiar no komunitariu ne’ebe saudavel, atu labarik sira bele goza sira nia identidade, saude, nutrisaun no edukasaun no mos hakribi violensia, abuzu no diskriminasaun, atu nune’e labarik sira bele goza sira nian direitu ba partisipasaun no livre espresaun iha sosiadade nia laran.

Iha parte sorin TAFARA.TL koko dada lia ho Alin Osvaldo Pereira ne’ebe faan mantolu besik iha palacio Prezidente, hodi tur hein labarik sira ne’ebe mak halibur no selebra hela loron mundial labarik sira nian, karik bele hola netik nian mantolu bainhira sira hakat sai hosi palacio.

Iha loron manas, Osvaldo ne’ebe la uza sinelus, kosar wen suli tanba loron manas. Ho moe hatan ba jornalista TAFARA.TL katak hau la eskolah no hau la hatene ohin ne’e labarik sira rame-rame tanba ami nian tinan.

Osvaldo idade 11, hela iha Aitarak laran, lakon nia direitu hanesan labarik ne’ebe labele goza direitu hodi asesu eskolah, hodi halimar ho nian kolega sira iha loron espesial hodi selebra loron mundia labarik nian, maibe Osvaldo tenke faan mantolu ne’ebe lolos laos nia mak tenke faan.

Liga ho Planu Asaun Nasional ba Labarik Timor-Leste (PAN/NCAP) 2016-2020, hos Republika Demokratiku Timor-Leste, ida ne’e mak dehan mapa matadalan ne’ebe esklarese oinsa atu atu harii progresivamente ambiente amigavel da ne’ebe respeita, proteje no realiza labarik mane ho feto sira nia direitu, iha rai laran, liu-liu labarik sira ne’ebe moris iha situasaun desvantejen.

Iha PAN esplika katak governu rekonyese labarik sira nia dirietu ba sobrevivensia, dezenvolviment, protesaun no partisipasaun, no labarik sira nia direitu atu atijin sira nia potensialidade tomak.

Espera hosi PAN ne’ebe mak governu rekonyese ona, bele responde alin Osvaldo no alin sira seluk ne’ebe la hetan benefisiu ba sira an nudar future ba nasaun ida ne’e.*[Zevonia Vieira | TAFARA.TL | 01.06.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *