Sunday , June 24 2018
Home / Sosial & Politika / Isin Rua Ka Kaben Sedu Rezulta Violensia Domestika no Problema Saude
Ernestina de Andrade, Faustino Cardozu, Madalena Kasiha no Bela Galhos sai panelista iha loron mundial feto 8 Marsu iha Timor plaza. [Foto: Zevonia Vieira | 08.03.2018]

Isin Rua Ka Kaben Sedu Rezulta Violensia Domestika no Problema Saude

“Bainhira feto isin rua sedu mak kaben sedu ona, ne’e signifika laos problema ba nia an rasik deit, maibe problema ba Timor tanba nia sai dezempregu ona, nia la remata nia eskola, nia laiha sertifikadu no mos labele kontinua ba universidade no sei laiha tan oportunidade atu aprende”. Ernestina De Andrade

Joven mak future ba rai doben ida ne’e, joven sei hatutan dezenvolve rai ne’e ho forte liutan, maibe sekarik joven feto no mane monu iha dalan klaran, sira sei hasoru nakukun iha future, sira sei hamate sira nia an iha future. Ida ne’e bele akontese bainhira akontese kaben sedu ba joven feto no mane.

Iha loron 8 Marsu, bainhira selebra lorob mundial feto, ne’ebe organiza hosi Embasada Australia iha Timor-Leste, iha Timor Plaza, grupu joven hosi Women Making Change, Ernestina Barros de Andrade, ne’ebe sai panelista iha loron feto, hateten ba partisipantes katak durante ne’e Women Making Change, fo motivasaun ba joven feto no mane sira, atu halo prevensaun ba idak-idak nia atu labele isin rua sedu.

“Atu koalia konaba prevensuan isin rua sedu, ida ne’e ami laos koalia ba ema deit, maibe ami mos koalia ba ami nia an nudar feto, ami mos tenke koidadu ami nia an nudar espello ida. Durante ami nia servisu ami halao, ami la hanoin salariu maibe ami nia hanoin mak joven feto ida la susesu, signifika ami mos la susesu tanba ita hotu feto Timor”, hateten Ernestina

Alumni Parlamentu Foinsa’e Timor-Leste [APFTL] ne’e haforsa liutan katak Women Making Change servisu makaas to iha municipio tomak, no eskolah iha area rural, hodi halo kampanye konaba isin rua.

Tuir Ernestina katak isin rua ne’e la problema, isin rua ne’e diak tanba feto privileiju atu habarak tan jerasaun, maibe lia fuan sedu mak la diak, tanba bainhira feto isin rua sedu mak kaben sedu ona, ne’e signifika laos problema ba nia an rasik deit, maibe problema ba Timor tanba nia sai dezempregu ona, nia la remata nia eskola, nia laiha sertifikadu no mos labele kontinua ba universidade no sei laiha tan oportunidade atu aprende tan ho nia kolega sira.

Ernestina ho lian forte enkoraza feto no mane atu aprende liutan, atu prevene isin rua sedu mak lia fuan simplis, kaben ema hotu sei kaben, maibe lia fuan sedu mak labele lai, “ita presiza duni tuir ita nia mehi, Timor presiza tebes ita. Ba joven feto no mane sira, ami sempre dehan atu proteje malu”.

Dadus hatudu katak sei lori impaktu negativu barak iha aspetu hotu, hahu hosi edukasaun, saude no mentalidade. Psikolog hosi Indonesia, Ajeng Raviando iha diskusaun ho media sira hateten katak impaktu premeiru hosi kaben sedu, katak nia [feto] sei hasoru problema oin-oin bainhira harii uma kain, sekarik la forte atu hasoru mak dalan ikus sei akontese divorsiu.

“Bainhira iha ona oan, atensaun ne’ebe fo ba oan sei la masimu, tanba sei diak iha konnesementu klean oinsa atu hare oan ho diak. Edukasaun ne’ebe oan sira sei asesu, sei la to nivel as, tanba laiha edukasaun naton hosi inan aman, tanba inan aman sira rasik sedauk atu hadia an, tanba kaben sedu, sa tan atu fo atensaun ba oan. Sira ne’ebe kaben ho idade sedauk to 18, sedauk bele kontrola nia emosaun dan sei foti desizaun ho diak tanba emosaun sei domina”, hateten Ajeng

Tuir peskizador Timor oan, Delsio Guimarães hatudu nia dadus katak labarik ho idade minor ka otas nurak 12 -15 kaben sedu, labarik feto otas nurak/ kiik isin rua tanba hetan asaltu seksial/insestu, dala ruma ema fo sira nia prepetivas persepsaun oin-oin katak, labarik kaben sedu ne’e sira nia direitu humanus, tanba labarik mak hakarak, balun fo hanoin katak kaben sedu la diak tanba tinan sedauk too.

Tuir Delcio katak prinsipalmente kaben sedu hanesan hahalok ne’ebe halao la akontese ba ema ida ho kondisaun otas nurak tanba dala ruma obriga hosi ema seluk ka tanba situasaun balun ne’ebe la espera.

Hare hosi aspetu lejislasaun iha Timor-Leste, Konvensaun Direitus Labarik [KDL] ne’ebe estadu ratifika iha artigu 1, define katak “labarik mak ema hotu-hotu hos iotas 18 mai kraik”. Iha Lei Kodigu Sivil katak, “Labarik sira ne’ebe ho otas minimu hodi kaben mak otas 17 no otas 16 ho autorizasaun hosi inan aman”.

Loron 20 Novembru rekonnese hanesan loron Konvensaun Direitus Labarik nian, tinan 2014 Timor-Leste ratifika tratadu refere iha tinan 11 nia laran, iha buat barak maka halao ona maibe sedauk hakonu tuir padraun ne’ebe mensiona iha KDL no lejislasaun inetrnasional seluk, liu-liu oinsa atu proteje labarik sira, fo asesu diak ba labarik sira iha area saude no edukasaun ne’ebe sai pilar importante ba dezenvolvimentu labarik sira nian.

Tuir Delsio nia peskiza katak kaben sedu iha Timor-Leste, tanba obriga, labarik sira mos separa ka hafah sira hosi sira nia kolega ka belun sira, familia no laiha oportunidade ba edukasaun ida ne’e kontrariu ho prinsipiu sira konaba edukasaun ba ema hotu no Konstituisaun RDTL, artigu 59 konaba Edukasaun baziku universal no edukasaun obrigatoriu”. Iha nota esplikasaun hosi Fokupers fo sai katak, “numeru as ba drop out ka para [sai hosi] eskola, feto foinsa’e no labarik feto sira sai hanesan obstaklu ne’ebe infrenta hosi Timor-Leste”.

Problema ne’e komplikadu tebes no kesi metin iha sistema patriakal, hahalok tradisional no mos pratika ne’ebe relasiona ho isin rua sedu, kaben sedu no mos iha kazu hirak abuzu seksual ba feto klosan no labarik feto.

Iha parte seluk, refleta ba relatoriu CEDAW hosi governu Timor-Leste konaba seitor edukasaun no saude, fator seluk ne’ebe rezulta ba feto idade foinsa’e no labarik feto para eskola inkuli difikuldade asesu ba eskola, finanseiru, familia la fo importansia no valor edukasaun hosi oan sira.

Labarik kaben sedu mos rezulta violensia domestika no problema saude ne’ebe komplikadu ho moris labarik nian, “hola mane sedu sei fo impaktu ba sira nia future, sira nia saude, hase mos taxa mortalidade ba inan ho oan, sira mos labele kontinua sira nia eskola ba iha nivel alto

Kazu iha nasaun India, labarik kaben sedu bandu hosi Lei, maibe iha realidade hatudu feto barak mak kaben sedu ho idade kiik. Survey tinan 2006 relata katak labarik feto 45% kaben sedu liu hosi 18+ no hosi kaben hirak ne’e tenke fo servisu barak ba autoridade sira tanba labarik feto hirak ne’e obrigada hosi inan aman rasik tenke kaben ho ema ho otas ne’ebe boot liu ka katuas sira ne’ebe fo risku ba abuzu no violensia seksual. * [Zevonia Vieira | TAFARA.TL | 10.03.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Sistema Online Iha Klinika Becora, Fasilita Inan Isin Rua Sira

Saude nudar seitor importante iha ema ida nian moris, ho saúde ne’ebe diak sei salva …

Leave a Reply

Your email address will not be published. Required fields are marked *