Januario: Espera Sira Halo Duni, Se Lae Mos Vota Saugati Deit

Povu kbiit laek sira hare no rona saida mak politiku nain sira koalia ho maka’as, promete ba povu sira, hodi muda povu nia moris sai diak liutan. Kampanna lao namanas povu tomak asisti.

Komunidade kbiit laek sira, bainhira hare partidu politiku sira tama sai sira nian rai ka hela fatin ne’ebe izoladu, sira hasoru ho kontente, tanba antes bainhira laiha kampanna ba elisaun presidensial no parlamentar, komunidade sira nungka simu lider partidu ,hodi hakat besik ba sira nian knua, hodi rona sira nian halerik no susar ne’ebe mak sira infrenta.

Kareta oin-oin, emblem, bandeira ho koor oin-oin, kamiza ne’ebe partidu sira fahe, sira simu ho kontente hodi bele uza, karik sira menus ropa, sira hanoin ida ne’e tempu diak tanba bele hetan kamizola gratuita. Negosiante kiik balun kontente, tanba durante kampanna partidu sira nian sasan bele iha folin, tanba ema sei para no hakat liu ba sira nian baraka hodi sosa netik sira nia sasan.

Bainhira jornalista TAFARA.TL dadalia ho negosiante kiik, Agida do Santos (55), ne’ebe faan nian modo iha merkadu Liquisa, tur hasoru loron manas, ho sumbrinha koor metan ne’ebe komesa malahuk. Agida ho lian kiik hateten, loron-loron hare kareta oin-oin liu hosi ne’e, hakilar viva viva ho kareta mesak diak deit, la hatene sira ba para iha ne’ebe.

Ho laran ne’ebe la dun kontente, Agida hatete, “Hau nian modo ne’e folin laiha, faan to namlaek bele hetan deit dolar 2 to 3 loron ida, koitadu ne’e hau atu hola saida? Hau hare partidu sira koalia oin-oin ne’e, bele muda ami nian moris ka lae? Ami bele sai hosi terus ka lae?”.

Agida hateten klean liutan katak, hanesan ema kiak, la husu buat boot, la husu uma mutin, la husu osan boot, la husu atu sai ema riku maibe se karik bele halo bee mos ba ema kiak sira para bele uza, tanba atu kuru bee mos tenke lao dook, hemu bee foer sente saude ne’e la diak sente moras iha laran.

Iha parte sorin, Joao Amaral (52), bainhira jornalista TAFARA.TL hasoru nia iha dalan Kasaid nian, dudu gerobak ne’ebe nakonu ho ai maran. Bainhira hapara kareta  hodi hase Joao Amaral, nia sente hakfodak.

Ho oin hamnasa Joao hase no ami mos tun hosi kareta hodi bele hakat besik ba nian.  Bainhira aprezenta an jornalista, nia ho kontente dehan atu husu kona ba saida? Hau hatan ho hamansa bele dada lia oituan kona ba esperansa ba partidu politiku sira?

Ba TAFARA.TL, Joao hato’o nia preokupasaun moris ne’e susar liu, la hatene se los mak bele ukun hodi muda povu kiik sira nian moris.

“Hau lembra hela saida mak uluk ita nian maluk falintil sira dehan, Timor tenke ukun an, atu nune’e povu labele sai atan tan. Maibe ohin loron mehi sira ne’e seidauk hetan. Ami mak moris hanesan ne’e hela deit, atu hola hahan ba loron ida nian deit mos tenke hanoin barak no servisu maka’as mak foin hetan. Hau hanoin hau nia oan sira ne’ebe mak la bele kontinua eskolah hanesan ema riku sira nian oan, tanba atu foti osan hosi ne’ebe. Hau husu ba partidu sira ne’ebe manan karik, labele koalia barak maibe saida mak imi koalia ne’e halo tuir ba”, tenik Joao.

Joao hamos nian kosar ben ne’ebe turu mai nia oin, dada is oituan karik hamrok tanba loron manas, karik mos hamlaha tanba oras tuku 14:00, maibe tenke lao dok ba ailaran hodi buka aimaran hodi ba faan.

Joao hatutan, husu ba lider partidu sira atu bele fo eskolah gratuita ba labarik sira ne’ebe moris kiak, hodi bele kontinua sira nian eskolah iha nivel universatariu, atu nune’e sira nian future bele naroman liutan.

Iha parte sorin Lena Monteiro (26), ne’ebe estuda hela iha univerisdade DIT Dili, hela iha Bairopite, ho hanoin ne’ebe kritiku husu ba partidu politiku sira bainhira ukun nasaun ne’e, labele uza osan povu nian ba sira nian interese privadu.

“Durante sira kampanna koalia mesak furak, sira dehan kombate korupsaun, hakribi violensia tenke mantein estabilidade no paz. Maibe bainhira ukun lia fuan hirak ne’e tolan hotu, korupsaun buras tan, pois sira la ba vizita ona povu sira iha area rural. Osan ne’e povu nian, tenke uza osan tuir povu nian nesesidade laos sira nian nesesidade”, Lena ho esperansa boot.

Januario Espostu (34), tinan 7 ona halao funsaun hanesan seguransa, hela iha Metinaru, ho esperansa boot ba partidu politiku sira ne’ebe karik sei ukun ba tinan ida ne’e, bele loke kampu servisu ne’ebe luan liu ba joven sira, atu nune’e bele ajuda moris loron-loron.

“Hau hanesan seguransa maibe depende ba kontratu hosi organizasaun ne’ebe hau servisu ba, se sira nian projetu hotu entaun hau mos tenke lakon hau nian servisu. Hau tenke buka fali kantor seluk ne’ebe presija seguransa. Hau nian servisu la tetap, durante kampanna ita rona barak partidu sira koalia tenke loke kampu servisu ba joven sira, espera ida ne’e sira halo duni, se lae mos ita vota saugati deit”, hateten Januario.

Hosi dadalia ne’ebe TAFARA.TL halo ho maluk nain haat, hatudu katak sira iha esperansa boot ba partidu politiku sira atu bele responde sira nian halerik, bainhira entre partidu 20 no Bloku ida bele realiza duni manifesto politiku hirak ne’ebe faan ona iha sira nia kampanna. Tanba tuir povu sira lakohi fo votus saugati ba partidu ne’ebe sira desidi atu hili.* [Zevonia Vieira | TAFARA.TL | 14.07.2017].

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.