Wednesday , June 19 2019
Home / Sosial & Politika / Jornalista Balibo Five Nia Kontribuisaun Boot Ba Timor Nia Independensia
Presidente Konselho Imprensa, Virgilio Guterres, ho membru Konselho Imprensa halo konferensia da imprensa ho jornalista sira kona ba Balibo Five.[Foto: Media KI].

Jornalista Balibo Five Nia Kontribuisaun Boot Ba Timor Nia Independensia

Jornalista nain liman hosi Austalia no Nova Zelandia ne’ebe hetan oho hosi militar Indonesia iha 16 Outubro 1975, tanba sira mai halo cobertura kona ba situasuan ne’ebe povu Maubere hasoru.

Relasiona ho komemorasaun loron Balibo Five, 16 Outubru, loron ne’ebé jornalista estranjeiru nain lima mate iha Timor-Leste, Conselho de Imprensa Timor-Leste (CI), hato’o kontinénsia no apresiasaun ba jornalista nain-lima, tamba kontribui ona ba libertasaun nasionál no povu ida-ne’e ninia hakarak lulik ba ukun-rasik.

Prezidente Coselho de Imprensa, Virgilio da Silva Guterres hateten katak loron 16 Outubru nu’udar loron importante tebes ba vida jornalizmu iha railaran, tamba iha loron ne’e duni, iha 1975, forsa Indonézia sira tortura no oho jornalista Australianu nain-lima iha tempu ne’ebá, ne’ebé halo hela kobertura ba invazaun forsa Indonézia (ABRI) nian mai teritóriu Timor-Leste iha parte fronteira.

“Hakarak uza biban ida-ne’e hodi hateten katak asasinatu hasoru jornalista estranjeiru nain-lima ne’e nu’udar tristeza boot ba mundu jornalizmu, liliu ba sira ne’ebé luta ba direitu ema nian ba informasaun, justisa no lia-loos. Hodi Conselho de Imprensa nia naran, ha’u hato’o apresiasaun ba sira nain-lima ninia kontribuisaun ba Timor-Leste ninia independensia, inklui mós ba jornalista Senior, Roger East ne’ebé tropa Indonezia sira oho iha Ponte Kais Dili hafoin trajedia iha Balibo,” hateten Prezidente CI.

Virgillio Guterres, afirma jornalista nain-lima, inklui Roger East ninia kontribuisaun iha tempu ne’ebá importante tebes, tamba bele sai ezemplu di’ak ba jornalista Timor Oan hotu, atu luta nafatin iha atividade jornalístika hodi halo transformasaun sosiál liuhusi sira ninia funsaun kontrolu sosiál iha país demokrátiku Timor-Leste.

“Kontribuisaun jornalista hirak ne’e nian nu’udar bukaer ida atu mídia ka jornalista Timor Oan sira atu banati-tuir hodi kontribui ba dezenvolvimentu nasionál no hatutan lian husi sira ne’ebé kbit laek no kobre populasaun sira ne’ebé hasoru difikuldade iha sira nia moris loro-loron tamba objetivu ida husi jornalizmu mak tane-aas interese ema barak nian duke interese grupu ka individu nian,” tenik Gill.

Prezidente CI ne’e kontinua husu kanál mídia hotu-hotu, liuliu jornalista sira Timor Oan atu nafatin serbisu ho profesionál atu tranzmite informasaun loloos, ezatu no objetivu liuhusi prinsipiu disiplina verifikasaun ho fonte hotu-hotu, nune’e bele evita konflitu no hamenus tensaun polítika iha railaran no tane-aas nafatin peace journalism iha ita-boot sira ninia atividade no produtu jornalístika.

Jornalista “Balibo Five” sira mak hanesan, Greg Shackleton, Tony Stewart, Brian Peters, Malcolm Rennie no Gary Cunningham.* [Zevonia Vieira | TAFARA.TL | 16.10.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *