Wednesday , June 19 2019
Home / Sosial & Politika / Jornalista Sira Simu Karteira Profesional, KI Husu Kumpri Nafatin ba Kodigu Etika Jornalistika
Jornalista total 216 hetan atribuisaun karteira profesional hosi KI. [Foto: Floriano Soares | 21.12.2017]

Jornalista Sira Simu Karteira Profesional, KI Husu Kumpri Nafatin ba Kodigu Etika Jornalistika

Ba jornalista no partisipante sira, membru Konselho Imprensa, Jose Ximenes iha nia abertura hateten katak ohin loron ita hakerek tan Istória foun ida ba dezenvolvimentu media iha Timor-Leste, tanba atribui karteira profisional ba Jornalista Timor-oan sira hamutuk 216, hosi 316 ne’ebe aplika. Atribuisaun Karteira profisional ba Jornalista ida ne’e, hanesan parte ida hosi kompetensia integradu ida ba Konselho Imprensa, liuhosi mandatu Lei Komunikasaun Sosiál nú: 5/2014, pontu 1, artigu 13 kona-ba Hala’o Profisaun hanesan Jornalista. Mandatu hosi artigu ida ne’e loloos liuhosi dekretu governu mak regula atribuisaun Karteira Profisionál ba Jornalista sira, maibé artigu ida ne’e mos fo mandatu ba Conselho de Imprensa atu fó-sai dokumentu provizóriu antes dekretu-Lei ne’e iha.

“Karteira profisionál ne’e hanesan rekuiñesimentu ida, hanesan dokumentu identifikasaun jornalista sira nian, no hanesan sertifikasaun ba sira nia knaar profisionál ne’ebé sira hala’o tiha ona iha vida profisaun jornalizmu. Tamba ne’e Konselho Imprensa husu ba Jornalista sira ne’ebé simu Karteira profisionál atu kontinua luta no promove liberdade imprensa no liberdade espresaun liu hosi hakruuk no kumpri ba Kódigu Deontolójia Jornalítika, promove inparsialidade, promove notisia ne’ebé balansu atu nune’e bele asegura direitu públilku nian asesu ba informasaun ne’ebé lós”, hateten Jose Ximenes.

Jose Ximenes mos informa katak iha era dijitalizasaun ida ne’e, dezenvolvimentu mídia mainstreaming sira, órgaun no meiuz komunikasaun sosiál sira, Jornalista sira, entidade reguladora sira inklui Konselho Imprensa hasoru dezáfiu no obstaklu ida ne’ebé boot no makaas tebes ho prezensa internet livre, MEDIA SOSIAL, ne’ebé mak fó espasu livre ba ema sira ne’ebé lá iha responsabilidade hodi habelar notísia falsu (fake news) notísia hoax no haburas propaganda falsu iha komunidade nia leet. Situasaun ida ne’e sai hanesan ameasa boot ida ba ita nia profisaun hanesan jornalista profisionál ne’ebé loron ba loron hakaas ita nia aan, kontinua hakerek no habelar informasaun ne’ebé lós, kredivel ba ita nia konsumidores sira, situasaun ida ne’e mós sei dezmoraliza mentalidade ita nia sosiedade, liuliu juventude sira ne’ebé loron ba loron lá duun iha vontade atu konsumu informasaun ne’ebé ita hirak ne’ebé dadaun iha ne’e hakerek no fó sai, maibé sira gasta sira nia tempu barak hodi konsumu notísias falsu, hoax no propanganda sira ne’ebé espalla iha media social.

Ho razaun ida ne’e Konselho Imprensa husu ba órgaun komunikasaun social sira, Jornalista sira, entidade akadémiku sira atu hamutuk ho Konselho Imprena hanesan entidade reguladora ida iha Timor-Leste hamutuk ho Governu, liuliu Sekretaria estadu ba asuntu komunikasaun social nian, atu iha períodu sira tuir mai, hakbiit liutan kooperasaun ne’ebé iha, hadiak liutan serbisu hamutuk ne’ebé iha, atu nune’e iha tempu badak, bele prodús Lei, ka Dekretu Lei ka regulamentu sira hodi regula aktu iresponsabilidade sira no fó protesaun ba atividade jornalizmu no fó proteze privasidade ita nia konsumidores no komunidade hotu.

“Kartaun profisionál ida ne’e sei lá iha sentidu wainhira jornalista ida, halo kobertura la tuir faktus, la balansu no la independente. Tan ne’e husu ba Jornalista sira atu kontinua firmi, luta ba liberdade imprensa no espresaun hanesan parte ida hosi ita nia papél ba dezenvolvimentu nasionál, kontinua hakruuk ba ita nia kódegu deontolójia jornalista atu nune’e ita bele kontinua promove sosiedade ida ne’ebé ikluzivu no sosiedade ida ne’ebé demokratiku”, hateten Jose Ximenes.

Iha tempu hanesan Xefe Casa Sivil, Francsico Maria de Vasconselos ne’ebe reprezenta Prezidente da Republika, informa ba jornalista sira iha eventu importante ne’e hateten katak, hare ba membrus sira ne’ebe hola parte Konselho Imprensa, Prezidente da Republika fiar katak jornalista sira, ih akbiit atu hamosu inisiativa oin-oin, atu Timor-Leste bele hakiak beibeik jornalista kredivel, katak jornalista Timor oan hatene halao sira nia servisu tuir prinsipiu etiku ba atividade jornalistika.

“Atribuisaun titulu professional ne’e sei hasae responsabilidade jornalista idak-idak nian. Responsabilidade boot liu sei kontribui ba hasae kualidade servisu. Ita nia luta libertasaun nasional kesi mos ba lalaok hosi jornalista Timor oan no jornalista estranjeiru ho nasionalidade oin-oin”, Hateten Xefe Casa Sivil ne’ebe reprezenta Prezidente da Republika.

Jornalista Radio Liberdade, Marta da Costa sente kontente no apresia ho Konselho Imprensa nia esforus, hodi fo rekonyesementu ba jornalista sira, hodi bele hetan atribuisaun ida ne’e.

“Ida ne’e rekonyesementu ida mai hau no iha valor boot ida, hau sei lori hau nia profisaun hanesan jornalista, hodi hakruk ba regras ne’ebe mak iha liu-liu kode etik jornalistika no sei lori ho responsabilidade boot”, hateten Marta.

Iha eventu importante ida ne’e marka prezensa hosi Eiz Prezidente da Republika, Laureado Nobel da Paz Dr. Jose Ramos Horta no nudar eiz jornalista durante iha tempu funu nia laran, ne’ebe halo ligasaun ho media internasional sira, hodi publika situasaun rai laran, Jornalista ho naran boot, Max Stahl, Sekretariu Estadu Konselho Ministru no Komunikasaun Sosial, Provedor Direitus Umanus, media nain no direitor media.

Jornalista hamutuk 216 hosi media imprimi, elektronika no media web ka online ne’ebe iha ona esperiensia hosi tinan lima ba leten mak hetan atribuisaun refere.*[Zevonia Vieira | TAFARA.TL | 21.12.2017]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *