Wednesday , October 24 2018
Home / Sosial & Politika / Jose Reis: 2014 Fretilin Fo apoiu Total no Tane VI Governu to 2017
PLP halo entrevista ho jornalista sira liu hosi konferensia imprensa.[Foto: Zevonia Vieira | TAFARA.TL | 12.10.2017].

Jose Reis: 2014 Fretilin Fo apoiu Total no Tane VI Governu to 2017

“2007 Fretilin halo opozisaun ida, ita hotu ulun fatuk sei malirin laiha minute ida Fretilin sai iha luron, laiha minute ida Fretilin dudu ema, atu halo manifestasaun hodi hatun governu”. Jose Reis.

 Liu hosi konferensia imprensa iha CCF,  Adjuntu Sekretariu Jeral Fretilin, Jose Reis ba jornalista sira katak, hakarak halai ba kotuk hodi relembra fila fali istoria iha rezistensia nian, hatudu fofoun Fretilin lidera prosesu ida ne’e, maibe atu hakuak ema hotu ne’ebe involve, atu luta ba libertasaun da patria, Fretilin tenke hakiduk para bele loke odamatan ba ema hotu tama, nune mosu metamorfoze iha mudansa struktura rezistensia.

“Tanba saida loke odamatan hodi hakuak ema hotu? ne’e istoria Fretilin nian iha rezitensia. Iha fila fali restorasaun ita hotu hare, Fretilin manan maioria ho absoluta, Fretilin ukun maibe la fo tempu Fretilin atu ukun to remata.  2007 Fretilin halo opozisaun ida, ita hotu ulun fatuk sei malirin laiha minute ida Fretilin sai iha luron, laiha minute ida Fretilin dudu ema, atu halo manifestasaun hodi hatun governu, maibe Fretilin kontribui ho ideas, halo kritika ho opozisaun forte iha Parlamentu Nasional”, esplika Jose Reis.

Jose Reis hatutan tan katak, iha 2012 iha buat barak mak laiha mudansa, Timor atu lao ba rai kuak nafatin. Fretilin halo refleksaun boot ida, foti desizaun ho lideransa nain rua, liu hosi bankada Fretilin fo postura politika foun, atu kontribui diak liutan para atu hadia rai ne’e ba oin. Fretilin ho nia lideransa tomak kontribui ba iha paz no estabilidade, kontribui ba iha dialogu, kontribui ba iha harmonia iha sosiadade nia laran, hodi bele kontribui proses dezenvolvimentu ne’e bele lao diak liutan.

“Iha 2014 ho postura foun ida ne’e, maun Xanana Gusmao iha tempu ne’eba hanesan Premeiru Ministru halo duni remoldasaun ida, tanba mos rotura entre koligasaun CNRT, PD ho Frente Mudansa, maibe Fretilin la buka oportunidade atu hatun governu, presizamente Fretilin fila atu fo apoiu totalmente ba governu ne’ebe iha deit ona 30 asentu parlamentar, Fretilin tane atu governu ne’e lao to 2017, tanba Fretilin tau interese pais ida ne’e, tau interese povu ida nee tenke diak. Ida ne’e prinsipiu boot ida ne’ebe Fretilin tenke halo. Ohin loron Fretilin loke odamatan para tau lideransa hamutuk hodi lori rai ida ne’e diak liu no povu ida ne’e atu moris diak liutan”, tenik Jose Reis.

Iha parte sorin, TAFARA.TL dadaliha ho komunidade Bairo Pitte, Joao da Silva (46), ne’ebe durante halao negosiu kiik faan sasan. Ba TAFARA.TL, Joao da Silva espresa nia hanoin katak, bainhira los lider partidu sira atu bele tur hamutuk, hodi tane liman ba malu, povu koleng ona ho situasaun ne’ebe dalabarak povu kiik hasoru.

“Laos moris kiak deit, maibe povu mos iha ona esperiensia lubuk ida bainhira krizi mosu, ita hotu hafuhu malu, ita hotu odiu malu, koitadu ita nia oan sira ne’ebe la komprende buat ida ms tenke moris la hakmatek no sira nia prosesu aprendizajen mos tenke para. Tenke iha ulun malirin no labele hamosu egois sei sira hadomi duni povu kiik sira”, tenik Joao da Silva.

Tuir Planu liu hosi VII Governu, sei halo tomada de pose ba dala tolu nian ne’ebe sei akontese iha semana oin.* [Zevonia Viera | TAFARA.TL | 12.10.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

MOFFE – CAUCUS Realiza Treinamentu Ba PARPOL, Marcelina: Hau nia Kontribuisaun Iha Partidu Importante

“Feto sira iha partidu laran halo mos servisu barak ba partidu nia susesu. Hau hakarak …

Leave a Reply

Your email address will not be published. Required fields are marked *