Friday , February 23 2018
Home / Sosial & Politika / Jose Reis: EA Sai Referendum Ba Programa VII Governu, Apela Ba Media Kontribui ba Estabilidade no Paz
Adjuntu Sekretariu Jeral Partidu Fretilin, Jose Reis halo entrevista ho jornalista sira iha palacio prezidensia. [Foto: Media PR | 07.02.2018]

Jose Reis: EA Sai Referendum Ba Programa VII Governu, Apela Ba Media Kontribui ba Estabilidade no Paz

“Iha tempu agora laos problema frente armada ka klandestina, problema agora oinsa povu atu moris diak ba oin ne’e oinsa, dezenvolvimentu ba oin ne’e oinsa”. Jose Reis

Eleisaun Antesipada ne’ebe sei akontese iha fulan 12 Maiu, partidu hotu sei book an fila flai hodi ba halo konsultasaun ho povu konaba programa ne’ebe sei lori ba povu nia interese. Liu hosi eleisaun antesipada povu sei determina se los sei bele xefia nasaun ida ne’e.

Bainhira TAFARA.TL husu ba Adjuntu Sekretariu Jeral Fretilin, Jose Reis iha palacio prezidensia 07/02, depois de hasoru malu ho prezidente da Republika, CNE no STAE, hodi deskuti kalendari eleisaun, karik Partidu Demokratiku sei lao ho Fretilin iha kampanna?

Jose Reis hatan katak la tau ses iha meza, katak sei iha meza leten, “ami sei iha konferensia nasional, sei halo iha loron 10 to 11 Fevereiru, tanba antes ba eleisaun ida partidu tenke lejitima nia an, lideransa tenke lejitima nia an, pois foin bele hetan lejitima hosi povu atu bele ba ukun”.

Partidu Demokratiku ho Fretilin nudar partidu koligasaun ne’ebe koliga hamutuk, hodi halao servisu iha VII Governu Konstituisional. PD ho Fretilin kontinua lori programa VII Governu hodi ba halo kampanna? Jose Reis hatan katak ida ne’e nudar baze ba eleisaun ne’ebe agora atu mai, “eleisaun ne’e sai referendum ba programa VII Governu Konstituisional”.

Hare ba situasaun politika no opiniaun publiku ne’ebe sempre deskuti konaba istoria rezistensia tolu ne’ebe mak halao servisu iha prosesu funu nia laran. Hatan ba Media Tatoli, Jose Reis hateten iha tempu agora laos problema frente armada ka klandestina, problema agora oinsa povu atu moris diak ba oin ne’e oinsa, dezenvolvimentu ba oin ne’e oinsa. Foin eleisaun ikus ne’e tanba saida mak Fretilin manan, tanba povu matenek , hare katak tinan 10 ne’e laiha mudansa ida ba sira nia vida, tanba ida ne’e mak sira fo votus ba Fretilin. Se Fretilin tinan 10 iha opozisaun bele manan, ne’e signifika buat boot ida, katak povu hatene hare 10 ne’e laiha mudansa ba sira nia vida, “hau fiar katak Fretilin sei manan iha eleisaun antesipada”.

Liga ho perguntas hosi Media STL katak komprimisu partidu Fretilin ba iha kampanna eleitoral, Jose Reis hateten, Fretilin kontinua apela ba iha kraik, bele hare lolos krizi fulan neen ne’e, povu maduru liu, prinsipalmente joven sira no jornalista sira mos kontribui ba iha estabilidade, tanba atu husu estabilidade ba iha prosesu ida ne’e laos partidu politikus deit maibe povu hotu no importante liu media. Se media komesa sunu malu ona, dudu ita hotu ba iha problema boot. Apela ba media para bele kontribui ba paz no estabilidade ba prosesu eleisaun ida ne’e.

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

CNC Estabelese Biblioteka Chega Iha Eskola Canossa

“Centru Chega nia planu atu loke ba eskola hotu-hotu, fulan hira nia laran sei loke …

Leave a Reply

Your email address will not be published. Required fields are marked *