Thursday , May 23 2019
Home / Sosial & Politika / Joven Sira Hato’o Sira Nia Lian, Liu Hosi EA Espera Bele Responde Povu Nia Esperansa
Joven sira hamutuk ho Eiz Secretario Estadu Joventude e Desportu, Virgillio Ornai [Foto: Maria do Ceo | 26.01.2018]

Joven Sira Hato’o Sira Nia Lian, Liu Hosi EA Espera Bele Responde Povu Nia Esperansa

La kleur tan povu sei fila fali ba sentru votasaun, hodi fo sira nia votus ba partidu politiku sira ne’ebe sira sei fo fiar, hodi ukun rai ida ne’e. Liu hosi eleisaun dala idatan, povu mak sei julga se los mak serve atu ukun.

TAFARA.TL koko hodi akumula povu nian lian, hodi rona sira nia esperansa no halerik ba eleisaun antesipada, tanba hosi povu make sei bele determina nasaun nian futuru atu ba los ne’ebe.

Ema ho difisiensia, Madalda Fernandes Gusmão [31], husu ba lideransa sira atu kria situasaun ida ne’ebe diak ba ema hotu, no lakohi situasuan ida ne’ebe akontese tan iha future.

Ho eleisaun antesipada ida ne’e, espera ita nia nasaun Timor-Leste, liu-liu ita nia lider sira, oinsá atu kria situasaun ba ema hotu, tamba ita lakohi situasaun ida ne’e sei akontese tan iha future, tamba ita haree partidu barak demais. Espera katak ho eleisaun antesipada ida ne’e, sei bele lori dalan diak ba ita hotu, atu nune’e ita bele hadia ita nia nasaun ne’e ba oin”,hateten Mafalda iha edifisiu, East Timor Blind Union (ETBU) Becora, Dili (01/02/2018).

Hatan ba pergunta husi jornalista TAFARA.TL kona-ba fasilidade ne’ebe mak apoia ema ho difisiensia matan, iha eleisaun tinan kotuk naton ona kala’e?

Mafalda responde katak Timor-Leste nasaun foin ukun an, ne’e duni buat hotu presiza prosesu, maibé husu nafatin ba CNE no STAE presiza kria kondisaun ne’ebe diak ba ema ho difisiensia sira, atu nune ema ho difisiensia sira bele vota ho fiar an liu tan, tamba dala ruma sira lori ema ne’ebe sira fiar maibe ema ne’e bele bosok.

Iha mos lian hosi foinsa’e Zelio dos Reis Freitas [24], ba TAFARA.TL hateten nudar joven, espera iha eleisaun antesipada sei diak liutan ba future, “ha’u fiar katak sei ka’er ukun ida ne’ebé forte liutan ba nasaun ida ne’e. Ha’u fiar katak dezenvolvimentu sei la’o di’ak liu”.

Zelio Freitas mós salienta ba jornalista TAFARA .TL iha ginásiu Don Bosco, Comoro (31/01/18), ho eperansa boot ba Timor-Leste ida ne’ebé nakonu ho paz no estabilidade, ida ne’e sei hahu uluk husi nia.

Iha fatin hanesan eiz antigu alunu salesiano, Elfrino Elias Tavi, ne’ebé mak partisipa iha selebrasaun loron Don Bosco nian, hateten nu’udar joven, presiza kontribui ba desizaun lider Timor-Leste.

“Tenki kontribui ba desizaun saida mak ita nia lideransa masimu foti, katak eleisaun antesipada, ha’u hanoin ida ne’e mak demokrátiku liu ba Timoroan hotu, atu bele deside ita nia futuru destinu nasaun nian”, dehan Elfrino.

Iha fatin la hanesan estudante Universidade Nasional Timor-Leste (UNTL), fakuldade Siensia Sosiais, Departementu Relasaun Internasionál, Ross Merry da Glória Martins Borges (23), hato’o nia esperansa via telefone, hein katak joven hotu bele partisipa iha eleisaun antesipada tinan ida ne’e.

“Ha’u espera iha eleisaun antesipada ida ne’e, joven hotu bele partisipa masimu liu tan, tamba iha eleisaun liu-bá, barak mak labele partisipa, entaun iha eleisaun antesipada ida ne’e espera joven hotu bele partisipa ho masimu, atu nune bele hola parte mós, hodi deside governu foun ne’ebe mai ne’e di’ak duni ba ida nia nasaun”, hateten Ross Mery ba jornalista TAFARA.TL via telefone.

Ross mós akresenta ho pozisaun nu’udar feto, enkoraja feto foinsa’e sira seluk, atu foti oportunidade ida ne’e ho di’ak no observa didiak partidu polítiku sira nia atividade, atu nune’e iha momentu ida ne’e bele halo desizaun ida ne’ebé lolos.

Iha sorin seluk, foinsa’e feto Maria Filomena Soares Abrantes (20), husu ba governu atu matenek hodi koopera ho STAE no CNE, hodi bele oferese centru votasaun asegura foinsa’e hotu husi munisipiu 12 ne’ebe mak agora dadaun eskola iha Dili atu sira bele vota.

“Espera governu bele atu kria sistema ida, hodi bele fasilita votantes hotu-hotu atu bele garante katak sira nia partisipasaun iha votus ba iha eleisaun antesipada ne’e bele masimu, tamba ita haree ba iha realidade ne’e, juventude barak mak agora dadauk iha Dili, imposivel karik sira balun ne’ebé dook teb-tebes, tenki lakon sira nia osan, lakon sira nia estudu, atu bele ba munisipiu ida-idak fó sira nia votus. Ha’u espera katak iha eleisaun antesipada ne’ebé sei mai, governu kria sistema ida hodi bele fasilita ema hotu, atu bele vota sem gasta sira nia tempu no sira nia osan”, konfessa Abrantes ba jornalista TAFARA.TL via telefone (01/02/2018).

Lian hosi Estudante sekundario São Pedro, Ronégio Duarte da Silva hateten, eleisaun antesipada nudar solusaun ida ba povu sira, atu ne’e sira mós bele laran hakmatek. Hanoin katak atu labele mosu tan konflitu iha ita nia nasaun ida ne’e, atu nune povu sira bele hala’o atividade lor-loron ho normál.*[Maria do Ceu | Editor: Zevonia | TAFARA.TL| 02.02.2018].

About Maria do Ceu Gusmao

Maria do Ceu J.O. Gusmao, Jornalista, Webmaster no Marketing Officer iha TAFARA.TL desde tinan 2015 ate a data.

Check Also

MEDSOS Sai Obstaklu Ba Servisu Jurnalismu, Akara: Tenke Halo Edukasaun Sivika Konaba Internet Saudavel

“Kna’ar importante hosi jornalista professional sira atu fo informasaun ne’ebe los, kredibel ba publiku, no …

Leave a Reply

Your email address will not be published. Required fields are marked *