Saturday , April 20 2019
Home / Eleisaun Parlamentar / Juventude Ermera Fo Hanoin Ba Governu Foun Atu La Haluha Promesa
Juventude iha municipio Ermera hamutuk dehan lae ba Violensia.[Foto: Luis Soares | TAFARA.TL | 08.08.2017].

Juventude Ermera Fo Hanoin Ba Governu Foun Atu La Haluha Promesa

Juventude sira kontinua nafatin fo alarme ba governu foun ne’ebe hein oras deit ona atu ukun, hanesan joven ne’ebe mak iha responsabilidade ba nasaun nian future, sira husu atu la taka dalan ba sira.

Centru Juventude Munisipiu Ermera, Raul Mateus de Sousa, hatete governu foun ida ne’e labele tau interese privadu, sebele tau interes espiritu patriotismu no nasionalismu iha ukun,  hodi nune’e bele dezenvolve rai ida ne’e, labele haree ba koor partidu nian, haree oinsa mak atu akumula Timor-oan hotu-hotu.

“Ami husu ba Governu foun sira tenki tau matan juventu iha Munisipiu ermera, labele dehan de’it juventude mak future nasaun nian, maibe tenki aplika iha asaun ruma ba juventude sira, tuir nia juventude  kuaze 20,51% menus formasaun, tuir estatistik 2015 nian, maibe agora juventude komesa aumenta ho nune’e juventude Munisipiu Ermera prezisa tebes kapasitasaun hosi parte relevante sira,”Dehan Raul.

Raul Sousa hatutan sentru formasaun Munisipiu Ermera hala’o ona programa lubuk ida, ba komunidae juventude sira, kona-ba abilidade moris nian no abilidade ba pás, iha programa sira ne’e, hodi fo hatene ba juventude sira, garante páz no etsabilidade iha Timor laran tomak.

Dezafiu durante ne’ebé mak ami hasoru mak Estrada, tanba iha area rurais balun Estrada seidauk tama iha balun tama maibe Estrada ladun di’ak.

ami husu ba governu foun fasilta ami sentru formasaun Munisipiu Ermera, ami pronto atu servi hodi fahe informasaun ba juventude sira ami pronto atu servi tuir metas ne’e mak ami juventude sira iha”, tenik raul

Iha parte hanesan Juventude, Maria Oliveira dehan  Problema ne’ebemak juventude Munisipiu Ermera sira hasoru mak ekonomia, familia la suporta, tanba juventude sira hakarak atu eskola maibe ekonomia lato’o ho nune’e sira labele kontinua, no juventude sira barak  menus atu rona infomasaun,

“Ami husu ba governu foun sira imi nia vizaun sira ne’e mak hato’o ona iha kampaña tenki kompri komprimisiu sira ne’ebe mak imi hato’o ona tanba povu ermera no juventude sira presiza dezenvolvimentu, presiza loke kampo de traballu ba juventude ermera hodi nune’e hamenus dezempregu, no loke formasaun tekniku vokasional sira hodi nune’e juventu sira bele partisipa iha dezenvolvimentu ne’e”, dehan Maria

Maria hateten juventude feto Munisipiu Ermera rasik, ladun partisipa ba prosesu dezenvolvimentu ne’e, tanba de’it menus informasaun ba feto maluk sira, sentru formasaun sempre halo ona prama lubuk ida maibe partisipasaun feto menus liu,

“hau nia mensazen ba feto maluk sira katak ita feto mós iha diretu hanesan ho mane sira, nune’e feto maluk sira  tempu to ona mai ita hatuk hodi dezenvolve Munisipiu Ermera, partisipasaun la’os haree ba osan iha mak ita ba maibe partisipasaun sai esperensia hamutuk ho mane maluk sira hodi dezenvolve Munisipiu Ermera”Maria sujere ba feto maluk sira labele lakon oportunidade”,tenik Maria.

Juventude Marculinha de Jesus husu ba governu foun, tenke hadia no aselera servisu haree liu-liu ba kampo football ne’ebé durante tinan hira ona, seidauk hotu no abandoma hela juventude nia atividade sira.

“Ami husu ba governu foun sira tenki loke kampo de traballu ba ami joven sira no formasaun sira liu-liu tekniku vokasionál hodi nune’e juventude bele partisipa ba dezenvolvimentu hakmatek iha pás no estabilidade iha Munisipiu Ermera”, dehan Marculinha.

Joven sira kontinua fo hanoin ba lideransa estadu sira ne’ebe la kleur tan atu governa nasaun ba tinan 5 oin mai. Joven sira la haluha promesa sira ne’ebe lider sira koalia iha kampanna. Joven sira espera ida ne’e la sai hanesna deit slogan maibe sai prinsipiu ida ne’ebe sira bele kumpri.* [Luis Soares | TAFARA.TL | 08.08.2017].

About Luis Soares

Luis Soares, Jornalista TAFARA.TL desde tinan 2015 ate a data.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *