Thursday , February 21 2019
Home / Sosial & Politika / Juventude Fretilin no PD: Parlamentu Sai Fatin Hadau Malu Ukun
Juventude Fretilin o Partidu Demokratiku halo konferensia da imprensa ho jornalista sira.[Foto: Zevonia Vieira | TAFARA.TL | 19.10.2017].

Juventude Fretilin no PD: Parlamentu Sai Fatin Hadau Malu Ukun

Ho situasaun iha uma fukun Parlamentu Nasional, ne’ebe halo diskusaun kona ba programa VII Governu, ne’ebe hamosu preokupasaun boot hosi  juventude Fretilin no Partidu Demokratiku.

Liu hosi konferensia da imprensa Juventude Fretilin no PD reafirma pozisaun ba situasaun politika ne’ebe lao dadauk iha Timor-Leste.

“Reafirmasaun ida ne’e laos deit hanesan forsa politika partidaria, maibe hanesan sidadaun Timor no liu-liu reprezenta maior joven iha ita nia rain. Hare ba situasaun politika rai larna ohin loron, iha apresentasaun no apresiasaun programa VII Governu Konstituisional ne’ebe lao hela iha Parlamentu Nasional, hatudu momos katak forsa politika sira sedauk to iha intendimentu ida hanesan ba vida povu no nasaun ida ne’e nian”, esplika portavos Abrao Nokosiku.

Konferensia da imprensa ne’ebe halao iha largo, 19/10 ba jornalista sira portavos hatutan statementu katak, publiku tomak akompanna debate programa ne’e, katak debate ne’e muda ona hosi substansia ba jogu manutensaun poder .

“Parlamentu Nasional laos ona hanesan fatin ba diskusaun no konsentrasaun problema povu no nasaun nian, maibe saida mak ita hotu asiste, parlamentu sai fali ona fatin ba hadau malu ukun”, esplika Abrao.

Juventude Fretilin no PD mos hateten katak povu la preokupa se mak atu okupa kargu saida, korensia ka inkorensia? Konsistensia ka inkonsistensia? Maibe povu iha Timor laran tomak hein hela estrada diak, hodi transporta sira no sira nia produtu, bee moos ne’ebe besik ba sira nia uma kain, eskolah diak ho kualidade ba sira nia oan, servisu saude ne’ebe diak ho aimoruk ne’ebe la falta ba sira, eletrisidade ba to iha sira nia uma, uma ne’ebe diak ba kbiit laek sira, subsidies ba veteranus no idozus ne’ebe falta.

Liu hosi konferensia refere juventude Fretilin no PD husu ba lider nasional sira, atu kontinua halibur malu, tanba tina lima oin mai, hanesan tempu oportunu liu ba lider jerasaun foun sira, no tempu hanesan solusiona problema ne’ebe povu infrenta ohin loron, husu ba deputadu sira iha Parlamentu Nasional atu iha boa vontade iha debates ne’ebe konstruktiva no tau as liu interese povu nian, duke interese ema idak-idak nian no husu ba maluk juventude sira, atu akompanna debates no diskusaun iha Parlamentu Nasional ho pasifiku, mantein estabilidade no paz no labele monu ba tentative desestabilizasaun ita nia rain.

Hatan ba perguntas hosi TAFARA.TL liga hosi situasaun politika iha parlamentu, implika ba moris povu nian, liga vida ekonomia?

Portavos Abrao Nokosiku responde katak, ida ne’e mak reprezentante povu nian iha Parlamentu, sira la konsege kalkula iha prosesu ida hanesan ne’e.

“Ita hahu halimar ho jogu manutensaun poder, pois ita haluha tiha konsekuensia sira ba povu nia moris. Ita kuandu iha instabilidade politika konserteza investor Timor oan no rai liur la brani atu tau nia osan atu investe, se investimentu la konsege akontes,e laiha posu de trabalho, kuandu laiha servisu ba ema, laiha rendimentu ba ema, no ita nia povu laiha kbiit atu sosa. Ida ne’e ita nia reprezentante sira la konsege kalkula ida ne’e katak atetudi ne’ebe sira halo agora, sei iha konsekuensia ne’ebe liga direitamente”, hateten Abrao.* [Zevonia Vieira | TAFARA.TL | 19.10.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Kursu Promosaun Ofisial Inspetor PNTL, FM: Sei Hamosu Deskonte Barak

Ministeriu Interior hasai Diploma Ministerial N.o 35/2018 de 29 de Novembro hodi halo promosaun ba …

Leave a Reply

Your email address will not be published. Required fields are marked *