Wednesday , April 24 2019
Home / Sosial & Politika / KI Gradua Jornalista 23, Virgilio: Ita Labele Sai Portavoz Ba Ukun Nain no Politiku sira”.
jornalista sira ne'ebe tuir formasaun hasai foto hamutuk ho formador sira. [Foto: Copy right Konselho Imprensa | 17.01.2019]

KI Gradua Jornalista 23, Virgilio: Ita Labele Sai Portavoz Ba Ukun Nain no Politiku sira”.

“Konnesementu deit, kapasidde teknika konaba jornalismu la sufsiente maibe tenke aumenta ho integridade professional”. Prezidente KI

Jornalista hamutuk 23 hetan graduasaun hosi Konselho Imprensa, liu hosi treinamentu jurnalismu komprensivu 2018-2019.

Liu hosi seremonia gradusaun ba daruak nian, Prezidente Konselho Imprensa [KI], Virgilio Guterres iha deskursu hateten katak kontente liu ba treinamenu jurnalismu komprensivu badahuluk nian, razaun tanba iha situasaun agora liu hosi media sosial publiku akompanna katak intervensaun politika no ekonomika iha sala redasaun instituisaun media komesa hatudu ona iha vida jurnalismu.

“Treinamentu tinan nee no tinan kotuk hau sente diferente tebes, maibe ida ne’e laos hanoin katak ita atu redus ita nia korajen, ita tenke luta lor-loron para hetan ita nia liberdade. Laos liberdade de direitu ne’ebe estadu ka ema boot sira fo deit maibe sidadaun hotu tenke luta no liu-liu jornalista sira tenke fo sai lian ba ema sira ne’ebe lian laiha”, hateten Prezidente KI

Prezidente KI mos deklara katak nudar pesoal baruk hare ka lee iha premeira pagina konaba nutisia politika sira ne’ebe hatoo hosi lider politiku sira, maibe hakarak rona no lee saida mak povu hatete konaba lider politiku sira, “ida ne’e mak papel jurnalismu nian, ita labele sai portavoz ba ukun nain sira no portavoz ba politiku sira”.

Ba partisipante sira ne’ebe durante ne’e tuir formasaun jurnalismu, jornalista senior Virgilio Guterres ne’e mos fo hanoin katak konnesementu deit, kapasidde teknika konaba jornalismu la sufsiente maibe tenke aumenta ho integridade professional.

“Sai integro ne’e importante katak bainhira hau hatun hau nia nutisia kritika hasoru lider boot sira maibe hau nafatin respeita sira no sira mos respeita nafatin hau. Ita nia kritiku ba ukun nain sira la halakon ita nia respeitu ba sira. Integridade mak sai hanesan savi susesu ba ita sai jornalista professional”, tenik Virgilio Guterres.

Country Director UNDP, Claudio Providas mos hatoo hanoin katak media nia papel importante iha sosiade, hodi publika informasaun ne’ebe mak sai preokupasaun povu nian liu-liu liga ho povu nia moris.

Claudio mos hateten katak instituisaun media ho jornalista sira tenke luta nafatin ba liberdade imprensa no promove liberdade imprensa iha nasaun demokratiku ida ne’e.

“Tenke hatudu imi nia responsabilide hanesan jornalista, koalia honestu, hatoo lia los, krtiku. Informasaun ne’ebe hatoo tenke liga duni ho interese nasional no povu nia moris”, hateten Claudio

Iha parte hanesan hatan ba TAFAR.TL konaba liberdade imprensa iha Timor-Leste ne’ebe mak lao iha nasaun demokratiku, Ambassador Extraordinary and Plenipotentiary, Hiroshi Minami ba TAFARA.TL hatan katak liberdade imprensa iha Timor-Leste lao diak maibe bainhira hakarak iha demokrasia ne’ebe diak liu mak tenke independente liutan, tenke iha liberdade liutan iha servisu jurnalismu nian.

“Knaar importante hosi jornalista sira mak tenke fo sai informasaun ne’ebe los no falsu ba publiku. Iha situasaun agora ema hotu asesu facebook dala barak publiku fiar liu informasaun ne’ebe ema publika iha facebook entaun media iha papel importante hodi hatoo informasaun ne’ebe los no kredibel ba publiku atu bele eduka publiku”, hateten Hiroshi

Liga ho treinamentu jurnalismu komprensivu ne’ebe hetan suporta hosi povu Japaun, liu hosi embaixada Japaun iha Timor-Leste ba TAFARA.TL Hiroshi hateten katak treinamentu ne’ebe oferese hosi UNDP no governu Japaun, ho objetivu atu hakarak suporta hodi hasae kapasidade jornalista timor no iha komitmentu ba iha future kontinua nafatin hodi suporta media Timor-Leste atu bele sai professional liutan.

Treinamentu jurnalismu komprensivu ba periodu ida ne’e partisipa hosi jornalista sira mai hosi radio komunidade, radio akademik UNTL, estudante universitariu UNTL no UNITAL hosi fakuldade Komunikasaun Sosial, media imprimpi no online.

Treinamentu ne’ebe lao durante fulan 4 partisipante sira aprende konaba data journalism, video no photo journalism, Sosial Media, jurnalismu investigasaun, debate no seluk-seluktan. Treinador sira ne’ebe oferese treinamentu mais hosi nasional no internasional. * [ Zevonia Vieira | TAFARA.TL | 17.01.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *