Wednesday , April 24 2019
Home / Sosial & Politika / KI Husu Jornalista Sira Tenke Fo Solidariedade Ba Malu, Problema Liberdade Imprensa Ita Hotu nian
Jornalista hosi insitituisaun media tomak iha Timor-Leste organiza asaun selensiu hodi kontra lalaok ne'ebe komesa hamate liberdade imprensa iha TImor-Leste.[Foto: Zevonia Vieira | TAFARA.TL | 29.05.2017].

KI Husu Jornalista Sira Tenke Fo Solidariedade Ba Malu, Problema Liberdade Imprensa Ita Hotu nian

“Problema liberdade imprensa ne’e ita hotu nia problema, ne’ebe se deit mak infrenta problema ita hotu tenke fo solidaridade ba malu. Solidaridade hosi liu kobertura”. Prezidente KI

Iha servisu jurnalismu presiza solidariedade entre jornalista sira bainhira entre jornalista sira sai vitima ka hetan presaun iha durante halo servisu hanesan jornalista.

Relasiona ho akontesementu ba jornalista timoroan sira ne’ebe dalaruma sai vitima durante halo servisu, liu hosi konferensia imprensa, Prezidente Konselho Imprensa, Virgilio Guterres ba jornalista sira hateten, jornalista sira tenke fo solidariedade ba malu.

“Labele hare tanba nia iha GMNtv entaun ne’e nia problema, ida ne’e tanba hosi RTTL entaun ne’e nia problema. Problema liberdade imprensa ne’e ita hotu nia problema, ne’ebe se deit mak infrenta problema ita hotu tenke fo solidaridade ba malu. Solidaridade hosi liu kobertura, tenke ba konfirma los ka lae Constansiu hetan ameasa hosi Xefe Gabinete SEKOMS. Ita halo verifikasaun konaba situasaun sira ne’ebe jornalista ka media sira hasoru”, tenik Virgilio 01/02.

Prezidente KI hatutan katak keta haluha katak intervensaun politika no ekonomia sei kontinua, ne’e bele akontese iha ne’ebe deit. Tanba ida ne’e mak jornalista sira tenke preparadu, liu hosi kapasita jornalista sira no prepara sira atu hasae sira nia intelektualidade.

“Jornalismu ne’e hanesan ita nia vokasaun, prinsipiu ida hodi lori liberdade. Iha fatin ida kuandu laiha ona liberdade atu hakerek no koalia bele buka fatin seluk ne’ebe iha liberdade”, hateten Virgilio

Hatan ba TAFARA.TL liga ho index liberdade imprensa iha mundu, karik iha preokupasaun rangkin liberdade imprensa Timor-Leste sei tun, sekarik situasaun liberdade imprensa hetan ameasa makaas?

Prezidente KI hatan katak kestaun liberdade imprensa, demokrasia no korupsaun kada tinan sempre fo sai index, kestaun liberdade imprensa Timor-Leste nian laos diak liu maibe pelu menus ranking ne’e tinan ba tinan kontinua sae, iha tinan 2018 nia sae ba 95 tuir data hosi Reporters Without Borders.

“Ita hakarak katak iha tinan 2019 nia bele sae tan maibe preokupasaun ba intervensaun editorial no RTTL nian kuadru legal la dun forte atu garante nia independensia no ikus mai nakloke liu ba partidu politiku sira ne’ebe kaer ukun, atu sai instrumentu propaganda, “hau hanoin bele redus mos ita nia point iha index annual nian, tanba index sira ne’e ema hare hosi garantia ameasa ba jornalista sira laiha, jornalista ida nungka hetan ameasa, polisia ida nungka hatama jornalista ida ba kadeia no kuadru legal sira ne’’e eziste ka lae, kuandu buat sira ne’e iha, ita nia rangking bele sae, maibe ameasa komesa iha liu hosi telefone, intervensaun iha sala redasaun komesa iha ne’e bele fo impkatu mos ba rangking ne’e”, hateten Virgilio

Tuir jornalista senior ne’e mos hateten katak importante mak ita foka ba intervensaun politika iha redasaun maibe bainhira jornalista sira la hetan ameasa, livre atu halo servisu, livre atu asesu ba fontes informasaun, hanoin tinan ida ne’e rangking bele sae tanba diak liutan mais se ida ne’e kontinua bele redus.

Liu hosi konferensia imprensa, Prezidente KI mos informa katak intervensaun ne’ebe to’o iha nivel atu influensia fontes hodi koalia tuir orientasaun politika administrasaun nian, hahalok ne’e akontese ba Prezidente KI iha loron atu ba prense segimentu 7 minutus.

“Ida ne’e parte hosi hahalok intervensaun politika hosi administrasuan ba iha sala redasaun. Asumtu ida ne’e relasiona ho RTTL mai foti iha KI no intervista ho KI. RTTL konvida President KI ba priense 7 minutu no babain hau nia funsaun atu fo komentariu ba nutisia sira no hau sai protagonist, maibe too iha ne’eba Xefe Redasaun Felizarda no Bela Cortereal informa katak depois de asesor balun hare nutisia ne’e, desidi atu la hatun nutisia. Ba hau buat foun nutisia tun ka la tun ne desizuan redasaun nian no xefe redasaun iha dirietu atu foti desizaun, maibe laos asesor mak foti desizaun ba redasaun. Hau nia kestaun foti tanba se mak foti desizaun atu desidi nutisia ne’e la tun, e’e halo parte hosi intervensaun, no hau desidi fila”, hateten Virgilio.

Iha parte sorin Prezidente Konselho Administrasaun RTTL, Francisco Gari ba TAFARA.TL hateten simu ona karta notifikasaun hosi RTTL, nudar kritika ida atu bele hadia diak liutan funsaun RTTL. * [ Zevonia Vieira | TAFARA.TL | 01.02.2019 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *