Wednesday , October 24 2018
Home / Sosial & Politika / KI Sensibiliza KEJ, Ana: Kodigu Etika mak Garante Jornalista ida Halo Servisu Ho Profesional
Estudante UNTL no UNITAL sira partisipa iha sensibilizasaun Kodigu etika Jornalistika ne'ebe organiza hosi Konselho Imprensa. [Foto: Martinho Moniz | 26.09.2018]

KI Sensibiliza KEJ, Ana: Kodigu Etika mak Garante Jornalista ida Halo Servisu Ho Profesional

“Bainhira Jornalista entende didiak Kodigu Etika Jornalistika [KEJ] no implementa ona iha pratika jornalismu, nia la presija tan ona regulamentu seluk atu regula nia, tanba nia la simu emvelope husi ema seluk, servisu ho faktus, rigór, ezatidaun, nia halo nia servisu ho profesional.” Ana Sequera

Konselho Imprensa [KI], halo sensibilizasaun kodigu etika jornalística ba estudante universitariu sira. Liu hosi sensibilizasaun kodigu etika, Diretora Ezekutivu KI, Ana Sequera iha intervensaun hateten liu hosi sensiblizasaun kodigu etika jornalística, parte ida hodi hasae jornalista no estudante sira nia konnesementu ba kodigu refere, ne’e KI aprova ona iha 2017.

“Presija halo sensibilizasaun ba jornalista sira, hodi iha koñesimentu klean konaba profisaun ida Jornalista ne’e, tanba atraves kódigu étika mak garante Jornalista ida bele hala’o nia servisu ho profesional”, hateten Ana Sequera.

Diretora Ana salienta katak, durante ne’e Konsellu Imprensa halo monitorizasaun ba publikasaun sira iha mídia, hetan iha infrasaun hasoru kódigu étika barak. Nune’e sensibilizasaun kona-ba kódigu étika tenke hahu kedas ba kandidatu jornalista sira, antes ba halo profisaun hanesan jornalista.

Iha sorin seluk Estudante Komunikasaun Sosial, UNITAL, Simeon Martins senti haksolok ho atividade refere, tanba bele loke nia hanoin hanesan estudante Komunikasaun Sosial, nune’e bainhira sai jornalista tenki la’o tuir kódigu étika.

“Hau sente formasaun ida ohin nenee, bele loke ita nia hanoin hanesan estudante ne’ebé mak estuda iha Komunikasaun Sosial. Karik iha futuru ita sai jornalista ita tenki implementa kódigu étika ne’ebé mak ohin orador sira kolia ona, nune’e ita bele sai jornalista nebe mak profesional”, hateten Simeon, 26/09 iha sentru kultural Indonesia.

Iha fatin hanesan, Estudante Komunikasaun Sosial, UNTL, Iriana D.A. Soares, hato’o apresiasaun ba Konsellu Imprensa ne’ebé oferese ona programa refere ba estudante komunikasaun sosial husi UNTL no mós UNITAL, hodi aprende kona-ba étika Jornalístika, oinsa atu sai jornalista ida ne’ebé mak profesional.

Iriana mós hato’o agradese ba Chefe Redasaun husi jornal STL no Independente ne’ebé fahe ona sira nia esperiensia kona-ba servisu redasaun nian ba partisipante sira. Iriana husu ba parte organizadora karik bele konvida mós Chefe redasaun husi mídia elektrónika hanesan televizaun, radio no mós mídia online, nune’e bele hatene mós servisu redasaun iha tipu mídia hirak ne’e.

“Moris iha mundu mídia nian ne’e la’os fasil, ida ne’e presija ema ne’ebé iha duni vokasaun atu servisu hodi servi povu liu husi informasaun mak hato’o liu husi mídia. Nune ba oin karik labele bolu deit Chefe Redasaun husi Midia imprime nian, maibé bele bolu mos sira husi midia elektronika hanesan rádio no televizaun, no mós online atu nune’e bele hatene diferensia servisu redasaun nian husi tipu midia imprime, elektronika no mós online,” dehan Iriana ba TAFARA.TL.

Atividade kolókiu públiku ho tema Hatudu Faktu ho Rigór, Ezatidaun, Onestidade no Independénsia” “ne’e hala’o iha salaun Sentru Kultural Indonésia, Dili, organiza husi Konsellu Imprensa no servisu hamutuk ho UNTL no UNITL iha Departamentu Komunikasaun Sosial, hetan apoiu husi UNESCO, no mós Governu Netherland.* [Martinho Moniz | Editor: Zevonia Vieira | TAFARA.TL | 25.09.2018].

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

MOFFE – CAUCUS Realiza Treinamentu Ba PARPOL, Marcelina: Hau nia Kontribuisaun Iha Partidu Importante

“Feto sira iha partidu laran halo mos servisu barak ba partidu nia susesu. Hau hakarak …

Leave a Reply

Your email address will not be published. Required fields are marked *