Thursday , May 23 2019
Home / Sosial & Politika / KJEUTL Ezizi ba Membru PN Atu Tau As Interese Povu
Konjunta Juventude no Estudantes Universitariu TL halo konferensia imprensa ho jornalista sira. [Foto: Zevonia Vieira | TAFARA.TL | 13.10.2017].

KJEUTL Ezizi ba Membru PN Atu Tau As Interese Povu

“Ami nia ezijensia ne’e ba membru parlamentu sira, atu tetu programa governasaun ne’ebe iha, atu nune’e deskuti ho honestu no seriedade, hodi refleta ba nesesidade povu nian, ami la koalia kona ba plataforma sira seluk” KJEUTL

Konjuta Juventude no Estudantes Universitarius Timor-Leste hatoo sira nia ezijensia ba membru Parlamentu Nasional hodi defende povu nia interese.

Liu hosi konferensia da imprensa ne’ebe halao iha jardim 5 de Maio, portavos Mariano Ribeiro ‘Tati Isi’ deklara katak liu tiha ona tinan 15 maibe povu maubere sei nafatin sai vitima ba ukun nain sira no sedauk sente lolos independensia ida ne’e. Komunidade sira iha fatin barak sei halerik ba bee moos, eletrisidade, estrada, saude, edukasaun, agrikultura no problema social seluk

Protavos ne’e afirma katak, reprezentante povu iha uma fukun Parlamentu Nasional atu defende povu nia interese, hodi hatoo aspirasaun povu nia ba iha governante, hodi nune’e povu fiar kata iha duni povu nia reprezentante iha uma fukun.

Konjuta Juventude no Estudante Universitariu Timor-Leste (KJEUTL) lamenta ho Prezidente Bankada CNRT, Arão Noe ne’ebe halo entrevista iha iha jornal STL, iha loron 10/10, iha pagina 23 katak, “horas ne’e dadaun planu governu ida ne’e atu prioritize infra-estrutura bazika, liu-liu ba kestaub estrada, eletrisidade, bee moos maibe oras ne’e estrada sira iha teritorio Timor-Leste kuaze diak, Estrada laos kestaun atu tau iha programa, maibe estrada sira hanesan Dili, Manantuto no Baucau diak hela no inklui estrada sira seluk”.

KJEUTL lamenta ho lia fuan ne’ebe hatoo hosi Deputadu Arão, tanba hatudu iresponsabilidade nudar reprezentante povu.

“Deputadu hatudu inresponsabilidade nudar reprezentante povu nia, hodi taka matan no taka tilun ba preokupasaun povu nian, no durante ne’e tenta atu ignora problema povu nian. Realidade estrada kuaze teritoriu Timor laran tomak, laiha kondisaun hodi asesu ba publiku. Karik deputadu Arão sae deit prado nune’e la sente, maibe ami povu sente duni kondisaun estrada sira ne’ebe at tebes.”

Ho situasaun no nesesidade povu nian ne’ebe sei infrenta problema barak liu hosi KJEUTL ezizi ba membru parlamentu sira, liu-liu Xefe Bankada CNR, Arão Noe hanoin atu hatoo lia fuan rum aba iha publiku ka governante sira relasiona ho povu nia ezijensia tenke tuir realidade ne’ebe mak iha. Husu ba membru Parlamentu Nasional no reprezentante povu iha uma fukun Parlamentu Nasional katak povu presiza eletrisidade, bee mos, saude, edukasaun, agrikultura, estrada no seluktan. KJEUTL husu ba deputadu sira estuda no deskuti ho onestu ba programa ne’ebe VII Governu aprezenta ona ba Parlaemntu Nasional, hodi refleta diak liu nesesidade no interese povu nian, labele uza momentu ne’e hanesan oportunidade hodi hadau malu poder, maibe uza hanesan momentu diak liu hodi serbi povu.

Liu hosi konferensia imprensa KJEUTL mos ezizi ba membru Parlamentu Nasional III Legislatura ne’ebe balun sedauk entrega kareta prado, tenke entrega lalais iha tempu badak, se la intrega mak KJEUTL prontu organiza malu hodi tun ba eiz deputadu III legislature sira nia rezidensia, hodi foti hikas kareta prado ne’ebe mak sosa ho osan povu nian.

Hatan ba perguntas hosi TAFARA.TL liga ho pensaun vitalisa, tanba iha parte sorin partidu opozisaun mos asina ona plataforma AMP?  Portavos Mariano hateten katak, ezijensia hosi KJEUTL hodi fo hanoin ba Parlamentu Nasional atu nune’e bele deskuti programa VII Governu ne’ebe bele responde povu tomak nian nesesidade.

“Ami nia ezijensia ne’e ba membru parlamentu sira, atu tetu programa governasaun ne’ebe iha, atu nune’e deskuti ho honestu no seriedade, hodi refleta ba nesesidade povu nian, ami la koalia kona ba plataforma sira seluk. Sira tenke hare programa VII Governu ne’ebe iha no Pensaun Vitalisia tenke kontinua hodi halakon”, hateten Mariano.

TAFARA.TL konsege halo konfirmasaun ho Prezidente Bankada CNRT, Arão Noe, hodi konfirma kona ba deklarasaun ne’ebe hatun iha jornal STL 10/10.

Ba TAFARA.TL via telefone hatete katak informasaun ne’ebe hatun iha STL ne’e la los.

“Hau hakarak klarifika deit katak, nutisia ida ne’e la los, hau foin asesu jornal horseik lokraik ne’e, no hau hetan ona agitasaun hosi media social (facebook). Informasaun ne’e la los, tanba nutisia ne’ebe fo sai iha jornal STL 10/10, edisaun no.206/2017, ne’e la tuir realidade ne’ebe mak hau hateten. Tanba ne’e mak hau prepara ona karta no haruka ba STL, hodi klarifika asumtu ida ne’e”, esplika Arão.

Deputadu CNRT ne’e hatutan katak, iha tempu halo entrevista ho STL, koalia kona ba estrada ne’ebe lao hela liu hosi emprestisimu, laos katak dehan estrada iha Timor laran diak hotu.

“Hau husu ba STL atu bele fo sai gravasaun momentu halo entrevista, atu nune’e bele konfirma fali ba publiku. Iha entrevista ne’e hau temi kona ba estrada ne’e liga ho Dili-Manatuto, Dili-Baucau, Liquisa mai Dili, hosi Ermera mai Dili no Dili-Aileu no Maubisi to ba Kasa, hau laos dehan estrada iha Timor laran tomak diak hotu ona”, afirma Arão ba TAFARA.TL, 13/10.* [Zevonia Vieira | TAFARA.TL | 13.10.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

MEDSOS Sai Obstaklu Ba Servisu Jurnalismu, Akara: Tenke Halo Edukasaun Sivika Konaba Internet Saudavel

“Kna’ar importante hosi jornalista professional sira atu fo informasaun ne’ebe los, kredibel ba publiku, no …

Leave a Reply

Your email address will not be published. Required fields are marked *