Tuesday , May 21 2019
Home / Sosial & Politika / Komemora Loron Proklamasaun, Negosiante Kiik Sira Ezije Governu Keta Haluha Promesas
negosiante kiik leba hela nia ai fuan iha palacio governu bainhira komemora loron proklamasaun. [Foto: Virginia Pereira | 28.11.2018]

Komemora Loron Proklamasaun, Negosiante Kiik Sira Ezije Governu Keta Haluha Promesas

Povu Timor-Leste komemora loron proklamasaun independensia ba dala 43. Dalan primeiru ne’ebe fundador Republika Demokratika Timor-Leste ho sira nia esperitu ho aten brani, Timor-Leste konsege proklama independensia iha loron 28 Novembru 1975.

Ohin loron povu Timor-Leste liberta an ona hosi ukun kolonialismu, bandeira ho rin besiasu hamrik metin, no povu hananu ho hino nasional patria patria, maibe sei servisu uma nian barak ne’ebe estadu presiza halo, oinsa mak povu bele sai hosi mukit?

Iha komemorasaun proklamasaun independensia ne’ebe selebra hamutuk iha palacio governu TAFARA.TL dada lia ho negosiante kiik no sei joven ne’ebe leba nia ai fuan, hodi faan iha fatin seremonia isar bandeira RDTL.

Negosiante ne’e nia naran Luis Manuel Soares, ba TAFARA.TL Luis Soares hatoo sentimentu kontente tanba povu tomak kontente hodi komemora loron importante ida ne’e. Luis kontente liutan tanba tanba lukru ne’ebe nia hetan la hanesan loron baibain.

“Ohin ami faan iha ne’e osan tama barak no la hanesan loron baibain. Hau ho hau nia kaben faan sasan hotu, para hare oan sira nia moris loron-loron ho eskola”, tenik Luis.

Luis ne’ebe mai hosi Municipio Aileu, tanba deit hakarak sustenta moris lor-loron nian, Luis ho nia kaben tenke tun mai Dili hodi faan ai fuan sira hanesan sabraka, has no hodi.

Esperansa Luis nian iha loron importante ida ne’e, Luis husu ba governu atu tau matan ba ai leba sira, ai leba sira labele lao rungu ranga, “ita nia nasaun ida ne’e presiza hadiak diak liu tan. Hau la hatene tinan 5 oin mai, ita nia mina rai bele fo moris diak ba povu hotu ka lae? iha munisipiu ema sei hela iha uma duut”, tenik Luis Soares.

Iha fatin hanesan Ana Maria Pinto ne’ebe mos lori nia ai fuan hodi faan iha fatin refere hatoo sentimentu ba governu atu bele tau matan ba ema kbiit laek sira, hodi bele hetan moris diak liutan. Lalika promete deit maibe oinsa mak realiza promesas ne’ebe imi hatoo iha kampanya

Ana Pinto maske hanesan estudante maibe nia foti tempu feriadu hodi buka osan netik, hodi bele tulun nia an hodi sosa buat ruma ne’ebe nia presiza.

“Ami lori ho has mai faan iha ne’e, ami sai eskola ona faan has atu ajuda ami nia apa ho ama, atu bele hare mos ami nia han no hemu bele mos selu ami nia eskola”, tenik Ana

Lian hanesan mai hosi negosiante Joao Pereira, ezije ba governu atu tau matan povu ai leba sira, tau fatin diak ba negosiante kiik sira, hodi bele halao sira nia negosio ho diak. * [ Virginia Pereira | Editor: Zevonia Vieira | TAFARA.TL | 29.11.2018 ]

About Virginia Pereira

Check Also

Governu Japaun Inagura Renovasaun Eskola Hospitalidade no Turismo, Minami: TL Presija Rekursu Umanu Kualifikadu Iha Area Turismo

“Atu bele atrai turista internasional, Timor-Leste presija investe maka’as liu iha setor infrastrutura, atu bele …

Leave a Reply

Your email address will not be published. Required fields are marked *