Friday , January 18 2019
Home / Sosial & Politika / Komemora Masakre 12 Novembru, Lú Olo: Juventude Mak Kriador, Enerjetiku no Idealista
Prezidente da Republika, Dr. Francisco Guterres Lú Olo hatoo deskursu iha loron masakre 12 Novembru iha Santa Cruz. [Foto: Nug Katjasungkana | 12.11.2018]

Komemora Masakre 12 Novembru, Lú Olo: Juventude Mak Kriador, Enerjetiku no Idealista

“Konsekuensia hosi masakre ne’e laos deit joven liu 200 lakon sira nia vida, iha fatin ne’e. Barak konsege halai hosi ne’e lakon sira nia vida iha fatin seluk . Joven liu 200 mos lakon deit, to ohin loron. Inan aman no maun bin alin sira la hatene sira mate ka moris”. Lú Olo

Kilat lian, bala musan tesik mai hirus matan la hare nia feto ka mane, ran suli ba rai, ema tanis, hakilar hodi temi Nai maromak nia naran, tanba joven balun hakotu duni sira nia is iha tempu ne’eba.

Masakre 12 Novembru 1991, nudar istoria importante ida ba rai doben ida ne’e, hosi masakre 12 Novembru 1991, joven sira hatudu aten brani la tauk ba tropas Indonesia katak mate ka moris ukun rasik an.

Iha komemorasaun masakre 12 Novembru, liu hosi deskursu Prezidente da Republika, Dr. Francisco Guterres Lú Olo, hateten katak Juventude loriku aswain la para ho manifestasaun 12 Outubro 1989. Iha Janeiru 1990, hatudu dala ida tan ba mundu konaba okupasaun ne’ebe nakonu ho ran, liu hosi manifestasaun hasoru Embaixador Estadu Unidus, John Monjo iha 1990, juventude banati tuir rezistensia armada.

Prezidente Lú Olo hateten konsekuensia hosi masakre ne’e laos deit joven liu 200 lakon sira nia vida, iha fatin ne’e. Barak konsege halai hosi ne’e lakon sira nia vida iha fatin seluk . Joven liu 200 mos lakon deit, to ohin loron. Inan aman no maun bin alin sira la hatene sira mate ka moris.

Liga ho situasaun agora, Prezidente da Republika hateten juventude ohin loron hasoru dezafiu oioin, juventude presiza banati tuir ezemplu hosi lider sira. Juventude la hakarak promesas no lia fuan sira, juventude hakribi attitude ne’ebe korupto.

“Ema hotu hateten juventude mak futuru nasaun, saida mak future nasaun? Oinsa ita konstroi nasaun ohin loron? Ta konstroi ita nia nasaun liu hosi servisu sidadania responsavel, Ema idak-idak hatene saida mak tenke halo. Sidadaun idak-idak tenke kontribui ba produsaun riku soin nasional. Ita tenke hadomi ita nia nasaun”, hateten Lú Olo, iha rate santa cruz 12/11.

Prezidente Lú Olo informa katak ohin loron dezempregu sai problema seriu nasaun nian, tanba ne’e presiza esforsu ema hotu nian. Iha era ukun an ida ne’e, juventude Timor-Leste iha tarefa importante tolu mak hanesan reforsa estadu, konsolida demokrasia no dezenovlve nasaun. Juventude hatudu tiha ona iha luta ba ukun rasik an, juventude mak kriador, enerjetiku no idealista, “mai ita valoriza independensia hodi banati tuir aswain”. [ Zevonia Vieira | TAFARA.TL | 12.11.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

OJE 2019, TMR: PR Sei Desidi Tuir nia Kompetensia, Hau Uluk Mos Veta No Haruka Fila Fali Ba PN

“Prezidente iha tempu para estuda, kuandu nia promulga nia bele halo, mais se imi hare …

Leave a Reply

Your email address will not be published. Required fields are marked *