Thursday , May 23 2019
Home / Sosial & Politika / Komemorasaun Loron Feto Hanesan Rekoñesimentu ba Luta Feto Timor-Leste
Partisipantes atividade komemorasaun Loron Feto Mundial iha Suco Manumera, Turiscai, Manufahi, dia 14 de Marco de 2018. [Foto: Yane Maia | TAFARA.TL | 14.03.2018].

Komemorasaun Loron Feto Hanesan Rekoñesimentu ba Luta Feto Timor-Leste

Komemorasaun loron internasional ba feto sai hanesan rekoñesimentu ba luta ne’ebe feto iha mundu halo no Timor-Leste mos rekoñese rasik luta nasional mak feto Timor sira halo ona.

Mensajen ne’e hato’o husi Diretora Fundasaun Alola iha nia diskursu ba abertura komemorasaun loron interansional ba feto, ne’ebe hala’o iha suku Manumera, Turiscai, Quarta-feira (14/03/2018) semana ne’e.

 “Loron ida ne’e iha mundu rekonese ba ita nia luta, ita mos tenki rekonese rasik luta nasional ne’ebe ita nia feto maluk sira halo, alen de kontente ita hanoin fila fali i halo reflesaun loron ida ne’e nia signifikasaun ba ita ida-idak hanesan feto no mane,” hato’o Diretora Fundasaun Alola Alzira Reis iha ninia diskursu.

Nia mos husu ba mane sira iha suku refere atu apoiu feto hodi bele dezenvolve sira nia-an. Tuir nia katak diskriminasaun akontese ba feto tanba mane la fo oportunidade ba feto sira hodi dezenvolve sira nia-an.

“Iha hau nia mensajen sira hau sempre hato’o katak, mane tenki apoiu feto, tanba mane hola parte apoiu feto atu dezenvolve nia-an. Feto mesak, sem apoiu hosi laen, ita la iha oportunidade atu asesu ba publiku, tanba dala barak ita hare disriminasaun akontese tanba mane la fo oportnidade ba feto sira,Alzira Reis hatutan.

Tema mundial Komemorasaun Loron Internasional ba Feto iha tinan ida ne’e mak: ‘Ativista Rural no Urbana Halo Transformasaun ba Feto Nia Moris’, no tema nasional: ‘Mai Ita Promove no Tane  As Badaen Feto Timor-Leste’.

Komunidade sira sente orgullu ho prezensa Fundasaun Alola hodi komemora loron internasional feto iha sira nia suku.

Ba programa ne’ebe mak fundasaun Alola bele mai to’o iha suku, bainbain ami rona deit naran ne’e, no ohin Fundasaun Alola marka duni presensa hodi fahe informasaun kona ba Saude, edukasaun, no sira bele esplika ho  klaru teb-tebes no hau senti orgullu tebes,” tenik Antonio de Jesus, komunidade suku Manumera, Turiscai.

Iha sorin seluk, estudante EBC Turiscai Juvita de Jesus Barbosa Nunes ne’ebe partisipa mos iha eventu ne’e senti kontenti tanba bele partisipa iha atividade hodi promove feto nia direitu.

Hau senti kontenti tebes tanba bele tuir eventu ida ne’e, tanba loron mundial ida ne’e hanesan loron ida ne’ebe mak bele promove ita nia direitu nu’udar feto,” akresenta Juvita.

Hetan suporta husi Sekretaria Estadu Igualdade Jeneru no Inkluzaun Sosial, no mos International Women’s Development Agency (IWDA) komemorasan loron internasional ba feto, ne’ebe realiza iza Suco Manumera, Turiscai, Manufahi, iha dia 14 de Marco de 2018 ne’e kompleta ho atividades oi-oin mak hanesan fahe informasaun kona ba saude inan ho oan, liu-liu konaba moras kankru susun no kankru servix, edukasaun sedu ba labarik sira, prevensaun violensia bazei ba jeneru, prevensaun isin rua sedu, inklui fahe informasaun kona ba hakbit ekonomia familia no asesu merkadu hodi kontribui ba familia saudavel.

Alem de partisipa hosi Ekipa Nasional Fundasaun Alola, atividades komemorasaun refere hola parte mos husi Estudante Ensino Báziku Central de Turiskai, Reprezentante SEIGIS Munisipiu Manufahi, Administrador Postu Administrativu Turiskai no inan-aman Suku Manumera, inklui Autoridade Lokal sira.* [Yane Maia | TAFARA.TL | 14.03.2018 | Editor: Metodio Caetano Moniz].

About Yane Elfrida Maia

Check Also

MEDSOS Sai Obstaklu Ba Servisu Jurnalismu, Akara: Tenke Halo Edukasaun Sivika Konaba Internet Saudavel

“Kna’ar importante hosi jornalista professional sira atu fo informasaun ne’ebe los, kredibel ba publiku, no …

Leave a Reply

Your email address will not be published. Required fields are marked *