Friday , September 21 2018
Home / Sosial & Politika / Kompania Hong Long La Iha Lisensa Ambiental, Peska Mos Spesie Protezidu
Presidente Komisaun D, Parlamentu Nasional, Deometrio Amaral halo entrevista ho TAFARA.TL iha uma fukun Parlamento Nasional.[Foto: Zevonia Vieira | TAFARA.TL | 03.10.2017].

Kompania Hong Long La Iha Lisensa Ambiental, Peska Mos Spesie Protezidu

Kazu Kompania Hong Long ne’ebe halo peska sai polemika iha publiku nia leet. Kazu ne’e halo ema barak preokupa ho prezensa kompania refere. Espesie protezidu hanesan Tubaraun mos kompania ne’e peska hotu. Kompania Hong Long halo Peska Ilegal ka Legal?

TAFARA.TL halo entrevista ho Prezidente Komisaun D ba Asumtu Ekonomia no Dezenvolvimentu (Agrikultura, Ekonomia no Meioambiente), iha Parlamentu Nasional, Demetrio Amaral esplika liga ho atividade kompania Hong Long ne’ebe asina kontratu iha Novembru 2016. Iha Abril nia laran iha tiha ona infrasaun ida no iha infrasaun premeiru ne’e governu multa $500 ka $500 mill.

“Iha kodigu penal ne’e governu aplika deit multa ida kiik liu. Ohin loron tan infrasaun ida boot liu, tanba ninia kontinuidade barak liutan no kaer spesies protezida lubuk ida”, hateten Demetrio.

Demetrio hatutan katak, bainhira governu fo lisensa ba kompania Hong Long, governu emiti deit lisensa ba peska, maibe laiha lisensa negosiu, laiha mos lisensa ambiental ba peskas industriais. Hosi ne’e bele dehan katak atividades peskas hosi atividade Hong Long ne’e, nia halo violasaun ba Lei ba Sosiadade de Negosiu. Iha dekretu Lei ida ne’e mak Lisensiamentu Ambiental Lei No.5/2011. Loloos nia atividade ba peska industria tenke iha lisensiamentu ambiental, mais durante ne’e halao tiha no laiha lisensa ambiental.

Tuir informasaun hosi Demetrio ne’ebe iha koinesementu diak ba asumtu ambiente nian, katak kompania Hong Long selu ba estadu Timor, selu kada tonelada $150/tonelada, ne’e dehan katak 1kg ne’e $0.15cen.  Ho kondisaun ida ne’e, bankada PLP hatoo katak kompania ne’e la iha seriedade atu respeita Lei iha Timor no la merese atu hetan lisensa.

Ba TAFARA.TL Demetrio husu ba governu Timor-Leste bainhira fo lisensa peskas, ne’ebe tama ona iha zona teritoria Timor nian mais 15 miles/ 18 miles ba laran, governu Timor tenke halo revizaun uluk, kapasidade saida mak iha. Sa roo mak Governu Timor iha hodi atribui ba Polisia Maritima, atribui ba Naval, hodi bele kontrola to teritoriu sira ne’e, ne’ebe partensia ba Timor,

“ita presiza ekipa ho kondisaun ne’ebe diak, atu nune’e ita bele iha kondisaun adekuadu fo respostas. Ministeriu ne’ebe fo lisensa ne’e mos, iha kondisaun atu bele halo monitorizasaun ba atividade ne’e, atu asegura katak lisensa ne’ebe sira fo, halo tuir duni”, Hateten Deometrio.

Iha parte sorin Xefe Bankada Fretilin, Francisco Branco, ba TAFARA.TL iha uma fukun Parlamentu Nasional, loron 2/10, hateten katak bainhira haree ba kestaun Hong Long, estadu mos tenke haree ba kestaun uluk nian ne’ebe akontese iha area Tasi Mane

“Uluk ita nia tasi nakloke hela, ema mai naok, ema mai halo peska illegal, riku soin ita nian ne’e, ita la hatene lakon hira. To agora mos sedauk iha autoridade ne’ebe halo kalkulasaun lolos, Timor-Leste lakon tonelada hira iha tasi mane nian, no folin hira mak ita lakon. Agora mais menus ita bele hare no kontrola ona saida mak kompania rua ne’e halo”, Dehan Branco.

Liga ho kazu refere, bankada Fretilin mos hein prezensa hosi Ministru Agricultura e Pescas, Eng. Estanislao Aleixo Da Silva, hodi bele marka prezensa iha Parlamentu Nasional hodi bele halo esplikasaun tuir governu nian parte, relasiona ho polemika ne’ebe agora dadauk publiku koalia.

“Ba kazu Hong Long konserteza ita tenke rona lai Ministru Agrikultura nia koalia, tenke halo balansu ba rezultadu investigasaun ne’ebe halo tiha ona. Se ida ne’e grave tenke fo duni sansaun penal ba kompania. Ita presiza duni para taka falta ida ne’ebe durante ne’e ita laiha, atu nune’e ita bele hatene tonelada hira mak sira kaer, hosi tonelada ne’e hira mak sira viola, pelu menus agora ita hatene ona. Mais uluk ne’e ita sik deit. Ne’ebe iha situasaun agora Ministru nia prezensa mai klarifika diak liu, atu publiku mos hatene tanba to agora ita rona deit hosi parte ne’ebe laos mai hosi governu nian”, esplika Branco.

Tuir hosi observasaun Francisco Branco hatudu katak, kapasidade hodi kontrola tasi nian sedauk lao ho masimu, tanba iha tempu uluk membru parlamentu sira sempre hakilar no ezizi bebeik, no IV Governo AMP konsege sosa roo iha tempu ne’eba, maibe  roo ne’ebe hola ba kondisaun bee midar nian, laos bee masin nian no labele kontrola riku soin tasi nian.

Tuir dadus hosi Ministeriu Agricultura e Pescas hatudu katak, peska ilegal iha tasi Timor sai razaun ka justifikasaun lori Governu AMP sosa ró rua hosi Xína ho emerjensia liu husi Orsamentu Ratifikativu hodi apoia F-FDTL atu kontrola peskas illegal. Maibe Ró rua ne’e nia kondisaun la bele patrolla ba tasi mane, hodi kontrola riku-soin Timor nian.

Bainhira hahu mandatu VI Governu Konstituisional, 2015, preokupasaun peska ilegal bo’ot liutan, tuir informasaun husi Plataforma Rejional ne’ebe halo asaun kontra peska ilegal (RPOA-IUU), katak iha tasi Timor nakonu ho ró peska ilegal nian, dala ruma loron ida ró ilegal 25 to’o 30 maka halo atividade iha tasi Timor.

Preokupasaun ne’e lori estadu Indonezia no Timor-Leste asina Joint Comunique ida hosi Prezidente Indonezia Jokowi no Premeiru Ministru Dr. Rui  de Araujo hodi reafirma komitmentu estadu rua nian ba kombate atividade peskas ilegal, la regula no la reporta IUU – Fishing. Iha komitmentu ida ne’e, iha agustu 2015, Ministra Tasi no Peska Indonesia,  Susi no MAP TL Eng. Estanislau, asina MoU, ne’ebé iha pontu ida koalia kona-ba fahe informasaun peska ba malu entre Indonezia no TL.

Bazeia ba troka informasaun entre Indonezia no Timor no mos faktu balun, iha 2015 nia rohan, Ministru Estanislau hapara lisensa peskas 2 ne’ebé emite hosi V Governu no duni sai ró rua ne’e husi tasi Timor, husi kompaña ho naran Fidelity.

Tuir esplikasaun hosi Xefe Gabinete MAP, Abrão Salsinha katak, iha tinan 2016, Kompanna Hong Long aprezenta proposta investimentu ho valor millaun $ 100, ba atividade Peskas industrial, akikultura (hakiaiak ikan no boek) ho fazeadamente.

Liga ho asumtu peska illegal ba Tubaraun, MAP aprezenta dadus katak iha Abril 2017, mosu problema tubaraun, ró hirak ne’e peska mos tubaraun. Governu deside kria ekipa konjunta ida involve Komponente Naval, Polisia Marítima, Polisia Investigasaun Kriminal, Imigrasaun, Quarentena, Alfandega, Peskas no Gabinete PM.

Governu haruka relatoriu investigasaun refere ba Ministeriu Publiku atu halo prosesu investigasaun kontinua ba asuntu krime nian. Nota katak iha problema balun ho diploma ne’ebé bandu espesie akuátiku, liu-liu espesies tuberaun nune’e halo altersaun hodi bandu deit tuberaun sira ne’ebé tama iha lista CITES (the Convetion on International Trade in Endangered Species of Wild Fauna and Flora) inklui mos lista espesies sira ne’ebé bandu husi Indonezia no Australia.

Iha parte sorin informasaun ne’ebe habelar liu hosi social media hatudu dadus katak kontratu ró ahi Xines nian hodi legaliza peska iha tasi Timor, hodi kaer ikan tubaraun ne’ebe nia preso karun iha merkado mundiál ho presu pound ida ba 0.45Kg hosi tubaraun, nia ikun presu $200. No Presu tuir kontratu entre MAP ho Kompania Fuzhou Hong Long Ocean Fishing Co.Ltd ho presu $150/tonelada ka $0.15cen.

Publiku preokupa ho riku soin tasi nian, publiku iha ezijensia atu Ministeriu Publiku bele halo investigasaun klean kona ba kompania refere. Governu Liu hosi MAP mos hein Polisia Investigasaun hala’o investigasaun ba ró 15 ho indisius katak kaer mos tubaraun espesie protejidu. Ministru oreinta tékniku sira atu kolabora no ofornese dadus ba polisia investigasaun hodi fasilita prosesu investigasaun.

Tuir informasaun neebe iha kazu ne’e iha Ministeriu Públiku no Tribunal Baucau nia liman hodi hein desizaun tribunal nian.* [Zevonia Vieira | TAFARA.TL | 03.10.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Estadu Tenke Halo Knaar Importante Ba Ekonomia, Presiza garante Bens no servisu Publikus

“Estadu tenke haree oinsa mak bele asegura finansiamentu ba despeza públika liu hosi reseitas hosi …

Leave a Reply

Your email address will not be published. Required fields are marked *