Saturday , April 20 2019
Home / Sosial & Politika / Komunidade Ermera Husu Aprova Programa Governu, Hodi Kria Servisu ba Joven
kominidade sira asiste hela karavana iha largo lecidere.[Foto: Zinho MD | TAFARA.TL].

Komunidade Ermera Husu Aprova Programa Governu, Hodi Kria Servisu ba Joven

Situasaun politika ne’ebe mak lao dadauk, halo komunidade sira iha area rural, halo sira laran la hakmatek. Liu hosi elisaun jeral 2017, povu hotu ezerse ona sira nia aspirasaun, hodi hili sira nia partidu ne’ebe mak sira fo fiar.

Maibe ohin loron, sira sei moris nakonu ho preokupasaun tanba situasaun politika ne’ebe dala barak halo sira atu lakon esperansa.

Komunidade iha Ermera, Celestino ne’ebe halo servisu nudar agrikultor, hela oha suku Poetete, bainhira hasoru jornalista sira, nia konfesa katak hare ba situasaun politika ne’ebe mak komunidade asiste, husu ba lideransa sira atu aprova programa governu nian, atu nune’e bele fo servisu ba jovens sira ne’ebe mak sei dezempregu, atu nune’e sira labele hola parte iha Problema.

Ami husu ba Governu no Nai ulun sira atu aprova programa atu nune’e bele kria servisu ruma mai ami, atu nune’e joven sira laiha servisu ne’e labele tur demais iha dalan, tanba ami iha Ermera ne’e joven barak mak gosta buka problema, tanba servisu laiha, sira buka mete problema deit, balu buka lanu deit sadik malu, boot sira bele tur hamutuk ona, para bele lori govenu ne’e lao ba oin”, tenik Celestinu.

Tuir Celestino nia haree katak, bee mos iha Ermera la dun sai problema boot, maibe estrada mak presiza hadia tanba at no rai rahun barak. Komunidade sira ne’ebe hela besik estrada, moris tersu liu tanba impaktu hosi rai rahun, ahi mos lakan mate.

Iha parte sorin, komunidade Madalena Maria Soares moris iha suku Poetete, ba jornalista hateten katak komunidade sira iha foho rona informasaun la los hosi Dili. Madalena espera katak informasaun falsu sira la los, tanba lakohi atu halai tun sae, tanba Madalena hakarak servisu ho hakmatek.

 “Ami iha foho ne’e ami rona isu-isu oioin mai husi Dili, ami povu ki’ik ne’e lakohi atu rona ami nia oan sira eskola iha Dili ne’e halai ba mai, ami hkarak deit ami nia oan sira eskola lolos atu nune’e ami iha ne’e mos hakmatek halao ami nia servisu hanesan lor-loron nian iha ne’e. ami husu ba boot sia atu koalia didiak ba malu atu governu ne’e sai diak ba oin, atu nune’e haree katuas ferik sira, ema difisiente sira ne’e importante liu”, tenik Madalena ho esperansa boot.

Iha parte sorin, Joven Dezempregu, Rogeiro Fernandes hela iha Suku Legimea, hateten katak  problema ne’ebe mak sei iha mak estrada.

Problema ne’ebe ami hasoru mak estrada ne’ebe ho kondisaun ladiak, tanba ne’e ami husu ba governu atu tau matan ba  ami nia estrada, atu nune’e kareta motor sira bele lao ba mai ho seguru, tanba Ermera ne’e Estrada Diak mak husi Dili to Gleno deit, mais ba tan laiha ona”,  dehan Rogeiro

Ermera oan nee mos deklara katak, husu ba governu foun atu servisu hamutuk ho Igreja katolika atu bele koalia didiak ho joven sira no kria servisu ba sira.

Komunidade barak mak hatudu sira nia esperansa ba lideransa sira, tanba hosi elisaun mak povu determina ona, oinsa ukun nain sira bele ukun tuir duni aspirasaun povu nian.  Negosiante Antoneta de Jesus, husi Suku Dukurai, hatete sira hakarak kontinua sira nia moris negosiante hanesan babain, atu nune’e bele sustenta sira nia oan ba eskola. Husu ba governu foun ne’ebe mak iha, kria mos kondisaun merkadu atu nune’e sira labele hadau malu fatin faan Sasan.

Ami hakarak faan ami nia sasan lao ba mai ho diak, atu hetan osan hodi haree ami nia oan sira nia eskola, ami husu ba governu foun mai ne’e, bele mos hasae ami nia kafee nia folin, tanba iha ne’e ema hotu iha kafee maibe balun oituan,  balu nian mak barak, se kafee nia folin ki’ik, ami susar los tan iha Ermera ne’e ema hatene deit ona lia mos barak, problema ne’ebe ami hasoru iha merkadu mak hanesan fatin ladun sufisiente, tanba ema sira faan sasan mos barak to dala ruma ami hadau malu fatin”, esplika Antoneta.

Povu fo sira nia votu liu hosi elisaun, sira iha fiar ba ukun nain sira atu bele realiza promesa ne’ebe sira koalia iha kampanna. Komunidade sira mosu preokupasaun tanba sa, situasaun politika la lao tuir mehi povu nian.

Komunidade sira fo fiar ba VII Governu Konstituisional hodi bele implementa duni programa ne’e ho diak, no laiha tan violensia ka konflitu, atu nune’e komundade sira iha area rural bele moris hakmatek.* [Zevonia Vieira | TAFARA.TL | Editor: Zevonia Vieira |29.10.2017].

About Bebiana Soares

Bebiana Soares, Jornalista TAFARA.TL, ativu desde tinan 2015, no mos nudar membru Asosiasaun Alumni Parlamentu Foinsa'e Timor-Leste (APFTL). 🇹🇱

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *