Monday , June 17 2019
Home / Sosial & Politika / Konselho Imprensa TL no AJTL Partisipa Enkontru SEAPA nian
Konselho Konselho Imprensa Timor-Leste, Hugo Fernandes halo apresentasaun kona ba servisu KI nian ne'ebe implementa ona.* [Zevonia Vieira | TAFARA.TL | 16.10.2017].

Konselho Imprensa TL no AJTL Partisipa Enkontru SEAPA nian

“Situasaun media ba iha liberdade imprensa no obstaklu barak mak intituisaun media hasoru iha Sudeste Asiatiku, maibe diferente ho Timor-Leste ne’ebe nia liberdade imprensa diak liu fali”. Edgardo

Southeast Asian Press Alliance (SEAPA) realiza enkontru ho membru SEAPA sira iha regional hanesan Konselho Imprensa no Asosiasaun Jornalista, hosi Filipina, Indonesia, Thailand, Myanmar, inklui Konselho Imprensa Timor-Leste no Asosiasaun Jornalista Timor-Leste (AJTL).

Objetivu hosi enkontru ne’e atu bele hametin liu servisu entre Konselho Imprensa iha rejional, fahe esperiensia kada Konselho Imprensa ne’ebe implementa ona.

Chair SEAPA Eko Maryadi, iha loron dahuluk ba partisipantes sira hateten katak, SEAPA halo esforsu an nafatin hodi servisu ho membru SEAPA iha rejional, inklui Konselho Imprensa sira atu bele kontinua promove liberdade imprensa.

“SEAPA halo enkontru ida ne’e, atu nune’e Konselho Imprensa bele fahe servisu ne’ebe mak durante ne’e halo ona, atu nune’e kontinua haforsa liutan no promove liberdade imprensa no proteje jornalista sira, bainhira halo servisu iha hodi publika informasaun tuir kodigu etika, prinsipiu jurnalismu no tui Lei Imprensa ne’ebe iha”, esplika Eko.

Eko hatutan liutan katak, objetivu hosi enkontru ne’e atu promove independiensia media, dezenvolve servisu jurnalismu nian, liu-liu jornalista sira no Konselho Imprensa no Asosiasaun Jornalista sira fahe esperiensia hamutuk kona ba situasun atual ba servisu media ne’ebe mak durante ne’e halao.

Iha parte hanesan Executive Director SEAPA, Edgardo Legaspi, esplika ba participantes sira katak, jeralamente situasaun media iha sudeste asia, la hetan liberdade imprense ne’ebe masimu.

“Situasaun media ba iha liberdade imprensa no obstaklu barak mak intituisaun media hasoru iha Sudeste Asiatiku, maibe diferente ho Timor-Leste ne’ebe nia liberdade imprensa diak liu fali. Indonesia Thailand, Myanmar no Filipina sei nafatin hetan kontrola makas hosi governu, jornalista balun lakon no hetan oho hosi ema sira ne’ebe iha poder. Jornalista barak mak sai vitima iha durante halao sira nia servisu. Iha Sudeste Asiatiku, governu iha poder ne’ebe forte tebes, oinsa atu kontrola servisu jornalista nian, liu-liu bainhira jornalista sira halo publikasaun liga ho servisu governu nian. Ida ne’e mak ita presija servisu makaas nafatin hodi kontra hasoru governu ne’ebe nafatin impede servisu jornalista nian”,hateten Edgardo.

Konselhor Konselho Imprensa Timor-Leste, Hugo Fernandes halo aprezentasaun kona ba servisu KI nian ne’ebe durante ne’e lao ona. Ba partisipantes sira Hugo Fernandes hateten katak, KI mosu tanba iha Lei Komunikasaun Sosial esplika ona, ne’ebe harii hosi Governu Timor-Leste, maibe KI laos parte hosi governu maske hetan osan hosi Orsamentu Geral Estadu.

“KI iha nia statutu ne’ebe hateten katak intituisaun autonomi ne’ebe hetan orsamentu hosi Estadu. KI halo ona servisu durante ne’e iha tinan ida nia laran. KI halo monitorizasaun ba servisu jornalista nian, halo monitorizasaun ba publikasaun ka artigu ne’ebe durante ne’e jornalista sira hakerek (Media print, elektronik no online)”, hateten Hugo Fernandes.

Hugo mos hatutan katak KI konsege finalize ona 15 regulamentu liga ho saida mak iha Lei Komunikasuan haruka, hanesan halo regulasmentu kona ba kodigu etika jurnalistiku, rejistrasaun ba instituisuan media, mediasaun no karteira professional ba jornalista sira.

Tuir Konselho Imprensa nian observasaun hatudu katak, obstaklu ne’ebe media Timor-Leste hasoru mak liga ho etika ba iha publikasuan informasaun, tanba influensia hosi media social makaas tebes iha sosiadade. Ida ne’e sai obstaklu boot tanba publiku barak fiar informasuan ne’ebe publika iha media social, halo publiku sira sedauk komprende atu halo diferensia entre media social no media professional.

Hugo mos hateten katak obstaklu seluk ne’ebe infrenta media iha Timor-Leste mak media nain involve iha partidu politiku, ne’ebe dalaruma halo influensia  makaas iha redasaun. Obstaklu seluk mak media Timor-Leste maioria halo kobertura iha nivel nasional no informasuan hosi rai liur ka regional media Timor la dun kobre.

Enkontro Regional ne’ebe realiza hosi SEAPA, halao iha loron 16-17 Outubru, iha The Association Journalist Bangkok Thailandia.*  [Zevonia Vieira | TAFARA.TL | 16.10.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *