Kontribui 0,05 centavus Hodi Salva Clinica Bairo Pite No Pasiente Kbi’it La’ek.

Movimentu Solidariedade Salva Klinika Bairo-Pite, halo asaun solidariu hodi kontribui 0,05 centavus hodi salva povu kbi’it la’ek sira nia vida husi moras sira. Movimentu refere halibur ema sira hanesan estudante reljiosu, ativista, povu aileba, media, inan aman no entidad estadu nian, hodi halo asaun solidariedade umanu ba povu kbiit laek sira ne’ebe mak moras iha clinica Bairo Pite.

Liu hosi komunikadu imprensa Movimentu ne’e hateten katak clinika Bairo Pite nia misaun umanidade, hahuu iha tempu okupasaun Indonezia tinan 1998 ate ohin loron. Haree no rona katak clinika refere, agora enfrenta krize finanseiru, hanesan osan atu hola aimoruk laiha, osan atu selu médiku sira laiha, tamba ne’e iha risku boot ba cilnika refere atu taka agora.

Maske klinika ne’e rasik mos hahuu produs ona aimoruk tradisional, hodi distribui ba ema moras oi-oin, ne’ebe ikus mai nia rezultadu progresu tebes maibe governu rasik mós seidauk foti medida hodi haforsa no promove aimoruk sira ne’ebe clinika ne’e rasik produz, ne’ebe fo benefisiu ba hamenus despeza no forsa imunidade ema moras ne’ebe bele haforsa rezistensia moras sira ne’ebe mai tan.

“Ita hotu konsidera katak klinka ne’e kuandu taka, ne’e hanesan impede oportunidade ba povi kbiit laek nia vida moris. Tanba ne’e, movimentu ida akumula malu hakarak tun ba iha dalan hodi husu maluk hotu-hotu nia kontribuisaun oinsa mak bele hametin klinka refere nia ezistensia hodi salva povu kbit laek nia vida iha tempu agora no future”, esplika iha komunikadu imprensa, 5/03

Ho situasaun refere Movimentu ne’e husu ba publiku katak, husu ba inan-aman sira, maluk taxista sira, no povu aileba sira ne’ebé iha capital DIli atu la bele hakfodak ho movimentu ida ne’e nia prezensa iha ita nia let tanba ita nia oan no alin sira ne’ebé hakbesik ita hodi husu kontribuiasaunn ba salva klinika refere. Husu ba PNTL sira atu kontribui no aseguira Movimentu ida ne’e nia atividade bazeia ba rutina ne’ebé ami mensiona.

“Ami laran metin ba estudante sira, poupa ita nia osan atu ajuda hodi salva ita nia inan aman no maun sira ne’ebé hetan moras. Ami agradese ba estudante no professor sira iha Municipio Manufahi no povu aileba sira iha Municipio Covalima ne’ebé hato’o ona sira nia solidariedade ba klinika Bairo-Pite, espera katak Municipio sira seluk mos bele halo asaun solidariedade hodi salva Klinka refere ba tempun agora no future”, haktuir iha komunikadu imprensa

Portavoz Movimentu Solidariedade Salva Klinika Bairo-Pite, Faustino Soares akresenta liu tan katak hakarak apela ba maluk media sira, sei la taka dalan ba media sira, bele dezenvolve diak liu tan, atu nune’e bele fanu povu doben Timor-Leste nia fuan, oinsa mak sira bele fo solidariedade ba klinika ida ne’e.

Iha tempu hanesan Sisto introdus katak Movimentu ida ne’e parte kompostu, husi media sira, tanba ne’e media nia papel importante, oinsa mak bele fanu povu Timor nia fuan, hanesan nakonu ho solidariu no umanismu iha nasaun ida ne’e.

Liu hosi konferensia imprensa ne’ebe halao iha Y-HAK Palapaso, Movimentu Solidariedade Salva Klinika Bairo-Pite informa ba publiku katak kaixa solidariedade ne’e iha simbolu no emblem Movimentu ne’e rasik, iha karimbu Ngo HAK, tanba nia posku temporal iha fatin refere.

Ezijensi hosi Movimentu ne’e rasik halibur osan oituan liu husi maluk maluk Timor oan hotu no estranjeiru sira ne’ebé mak Timor atu bele ajuda netik osan hahu husi 0,05 centavos ba leten ba Clinica refere, nebe mak hetan krize finanseiru. Ida ne’e imporante tebes, atu salva klinika refere nia ezistensia hodi halo tratamentu ba povu kbiit laek sira.

Movimentu ne’e mos konfesa katak to ohin loron sedauk husu kontribuisaun ba governu, maibe sei halo advokasia barak, hodi governu bele tau matan mos ba ida ne’e, tanba governu mak jere povu nia osan, hodi garante sustentabilidade.

Tuir planu Movimentu sei lao iha dalan publiku, liu-liu ba emprejariu nasional no internasional ne’ebe halao negosiu iha rai laran no liu-liu autoridade local sira, hodi sira hotu bele kontribui para bele salva clinca refere.* [Maria do Ceu | Editor: Zevonia Vieira | TAFARA.TL| 05.04.2018].

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.