Saturday , November 17 2018
Home / Divertimentu / Kopa Mundial 2018: Flashback Equipa 16 mak La Passa ba Faze Knock-Out

Kopa Mundial 2018: Flashback Equipa 16 mak La Passa ba Faze Knock-Out

Selesaun Nasional 32 mak partisipa jogus Kopa Mundial 2018 Russia finaliza ona ida-idak nia jogus iha faze grupu no rezulta equipa 16 hakat ba oitavos de final (faze knock-out), no mos equipa 16 seluk tenqui halot roupa hodi fila ba ida-idak ninia familia.

01. Arabia Saudita

Selesaun Nasional Arabia Saudita agrupamentu iha Grupu A hamutuk ho Russia, Uruguay, no Egipto. Iha jogus primeiru equipa Arabia Saudita simu derota hasoru equipa Russia ho score 0 – 5. Nune’e mos iha jogus segundu hasoru Uruguay sira lakon ho score 0 – 1. Iha jogus terseiru Arabia Saudita konsege halakon Egipto ho score 2 – 1 no tur iha pozisaun terseiru iha Grupu A ho total valor 3 hafoin Uruguay (valor 9) no Russia (valor 6). Hodi nune’e, Arabia Saudita eliminadu hosi jogus Kopa Mundial 2018 Russia.

02. Egipto

Hamutuk ho Arabia Saudita, Uruguay, no Russia iha Grupu A Selesaun Nasional Egipto fila ho “tanis” tanba nunka manan dala ida iha sira nia jogus iha grupu ne’e, maske lidera hosi Muhamad Salah, jogador nebe fenomenal tebes iha liga Inglatera. Equipa Egipto lakon ho Uruguay 0 – 1 iha jogus primeiru mak halao iha dia 15 de Junho de 2018. Hasoru Russia iha jogus segundu, Egipto simu derota ho score ikus 1 – 3. Iha jogus ikus sira lakon ho Arabia Saudita ho score 1 – 2. Ho rezultadu hirak ne’e, Equipa Egipto tuir iha pozisaun ikus liu iha Grupu A ho valor 0, hafoin Uruguay, Russia, no Arabia Saudita.

03. Iran

Selesaun Nasional Iran agrupamentu iha Grupu B hamutuk ho Espanha, Portugal, no Marocco. Iha jogus primeiru equipa ne’e konsege halakon Marocco ho score 1 – 0. Iha jogus segundu simu derota hasoru equipa Espanha ho score 0 – 1. Iha jogus terseiru konsege iimpata ho Portugal 1 -1.  Ho rezultadu hirak ne’e equipa Iran konsege kolheta pontus 4 no tur iha pozisaun terseiru hosi Grupu B hafoin Espanha (pontus 5) no Portugal (pontus 5). Hodi nune’e, selesaun nasional Iran eliminadu hosi jogus Kopa Mundial 2018 Russia.

04. Marocco

Selesaun Nasional Marocco so hetan pontus 1 iha Grupu B (hamutuk ho Espanha, Portugal, no Iran) rezultadu hosi impata dala ida ho Espanha 2 – 2 iha jogus datoluk nian. Equipa ne’e hetan derota hosi Iran iha jogus primeiru ho score 0 -1 no lakon mos hasoru equipa Portugal ho score 0 -1 iha jogus segundu.

05. Peru

Hamutuk ho Franca, Denmark, no Australia iha Grupu C selesaun nasional Peru konsege rekolha pontus 3 nudar terseiru lugar iha Grupu C, iha Espanha no Portugal nia okos. Rezultadu ne’e akumula hosi manan jogus dala no lakon dala rua. Iha jogus primeiru equipa Peru lakon 0 – 1 hasoru Denmark. Nune’e mos hasoru Franca iha jogus segundu, sira lakon ho score 0 – 1. So iha jogus terseiru hosoru Australia, Peru konsege manan ho Score 2 – 0. Hodi nune’e, selesaun nasional Peru eliminadu mos hosi jogus Kopa Mundial 2018 Russia.

06. Australia

Selesaun nasional Australia so hetan pontu 1 iha Grupu C (hamutuk ho Espanha, Portugal, no Peru) no tuir iha pozisaun ikus liu iha grupu refere. Iha jogus tolu mak sira hala’o, equipa Australia simu derota hosi Franca 1 – 2 iha jogus primeiru, impata ho Denmark 1 – 1 iha jogus segundu, no lakon iha jogus terseiru hasoru Peru ho score 0 – 2. Ho rezultadu ida ne’e Australia mos “fila uma” sedu iha eventu Kopa Mundial 2018 Russia.

07. Nigeria

Selesaun nasional Nigeria konsege manan dala ida, maibe lakon dala rua iha jogus faze grupu Kopa Mundial 2018. Agrupamentu iha Grupu D, hamutuk ho Croatia, Argentina, no Iceland, Nigeria so tur iha terseiru lugar ho pontus 3, hafoin Croatia (pontus 9) no Argentina (pontus 4). Iha jogus primeiru Nigeria tenqui rekonhese Croatia no hetan derota ho score 0 – 2. Iha jogus segundu Nigeria iha espetativas bot hodi hakat ba faze knock-out hafoin manan hasoru Iceland ho score 2 – 0. Maibe iha jogus ikus sira la konsege manan hosi Argentina no lakon ho score  1 – 2. Hodi nune’e,  selesaun nasional Nigeria eliminadu hosi eventu Kopa Mundial 2018 Russia.

08. Iceland

Equipa “kuda metan” Iceland hatudu ninia performa nebe diak tebes wainhira “obriga” Argentina impata ho score 1 – 1 iha jogus primeiru mak halao iha dia 16 de Junho de 2018. Maibe susesu ida ne’e la konsege kontinua iha jogus segundu hasoru Nigeria, sira lakon ho score 0 – 2. Nune’e mos iha jogus terseiru equipa Iceland simu derota hosi Croatia ho score 1 – 2. Ho rezultadus hirak ne’e Iceland so rekolha deit pontu ida iha Grupu D, (hamutuk ho Croatia, Argentina, no Nigeria) no tur iha pozisaun ikus liu. Nune’e, Iceland mos tenqui “fila uma” sedu iha eventu Kopa Mundial 2018 Russia.

09. Serbia

Selesaun nasional Serbia, nebe hamutuk ho Brazil (pontus 7), Switzerland (pontus 5), no Costa Rica (pontu 1) iha Grupu E mos tenqui fila ba uma sedu hosi eventu Kopa Mundial 2018. Hosi jogus dala tolu mak sira halao, equipa ne’e so konsege rekolha pontus tolu, rezultadu hosi manan dala ida hasoru equipa Costa Rica ho score 1 – 0 iha jogus primeiru, lakon ho Switzerland iha jogus segundu 1 – 2, no mos derota hasoru Brazil ho score 0 – 2 iha jogus ikus liu.

10. Costa Rica

Selesaun nasional Costa Rica okupa pozisaun ikus liu iha Grupu E (hamutuk ho Brazil, Switzerland, no Serbia) ho pontu ida, rezultadu hosi impata dala ida no lakon dala rua. Iha jogus primeiru sira derota 0 – 1 hasoru Serbia. Nune’e mos iha jogus segundu sira lakon 0 – 2 hasoru Brazil, no iha jogus ikus konsege impata 2 – 2 ho Switzerland. Hodi rezultadu ne’e,  selesaun nasional Costa Rica eliminadu hosi eventu Kopa Mundial 2018 Russia.

11. Korea do Sul

Hamutuk ho Sweden, Mexico, no Alemanha iha Grupu F equipa Korea do Sul rekolha pontu 3 no okupa pozisaun terseiru iha grupu ne’e, iha Alemanha (pontu 3) nia leten, hafoin Sweden (pontus 6) no Mexico (pontus 6). Maske lakon ho score 0 – 1 iha jogus primeiru hasoru Sweden, no simu mos derota hosi Mexico 1 – 2 iha jogus segundu, maibe sira konsege surpreza publiku iha jogus ikus hasoru Alemanha, ne’ebe equipa Korea do Sul manan ho score 2 – 0 hodi obriga Alemanha mos halot roupa fila ba uma. Maske pontus hanesan ho Alemanha, pontus 3, maibe Korea do Sul mak okupa terseiru lugar tanba produtivu iha golu (selisih gol) kompara ho Alemanha. Hanesan ho Alemnha, Korea do Sul mos tenqui fila ba uma sedu hosi eventu Kopa Mundial 2018 Russia.

12. Alemanha

Nakonu ho fitun futebolista mundial la garante susesu iha eventu bot hanesan Kopa Mundial. Situasaun ida ne’e mak akontese ba selesaun nasional Alemanha iha Kopa Mundial 2018. Hamutuk ho Sweden, Mexico, no Korea do Sul iha Grupu F, Alemanha so konsege rekolha pontus 3 (hanesan ho Korea do Sul maibe diferente iha produtividade golu), rezultadu hosi manan dala ida hasoru equipa Sweden ho score 2 – 1 iha jogus segundu, lakon 0 – 1 iha jogus primeiru hasoru Mexico, no lakon mos iha jogus ikus hasoru Korea do Sul ho score 2 – 0. “Trajedia” Alemanha iha Kopa Mundial 2018 ne’e justifika tan “maldicao da copa mundial(kutukan piala dunia), katak kampiaun kopa mundial anterior sei la ultrapassa faze grupu.

13. Tunisia

Selesaun nasional Tunisia agrupamentu iha Grupu G hamutuk ho Belgium, Inglatera, no Panama. Hafoin manan iha jogus ikus hasoru Panama ho score 2 – 1, Tunisia so rekolha pontu tolu no okupa pozisaun terseiru iha grupu ne’e (hafoin Belgium ho pontus 9 no Inglatera ho pontus 6), hodi falha ultrapassa ba faze knock-out Kopa Mundial 2018 Russia.  Iha jogus primeiru, Tunisia lakon hasoru Inglatera ho score 2 – 1, no mos lakon maka’as 2 – 5 hasoru equipa Belgium iha jogus segundu.

14. Panama

Selesaun nasional Panama nunka manan dala ida hasoru Belgium, Inglatera, no Tunisia iha Grupu G Kopa  Mundial 2018 Russia. Ho rezultadus ne’e Panama okupa pozisaun ikus liu iha grupu refere no tenqui fila sedu ba hasoru familia. Lakon 0 – 3 hasoru Belgium iha jogus primeiru, derota maka’as 1 – 6 iha jogus segundu hasoru Inglatera, no mos lakon iha jogus ikus mak halao iha dia 29 de Junho de 2018 hasoru Tunisia ho score 2 – 1.

15. Senegal

Senegal tama iha Grupu H hamutuk ho Colombia (pontus 6), Japaun (pontus 4), no Polandia (pontus 3). Hafoin jogus ikus hasoru Colombia no sira lakon ho score 0 – 1, equipa ne’e konsege rekolha pontus 4, hanesan ho Japaun, maibe Senegal mak tenqui fila uma no Japaun hakat ba faze oitavas de final tanba valor fairplay Japaun diak liu Senegal, Japaun hetan Kartaun Kinur 4 hosi jogus 3, Senegal hetan 6 hosi numeru jogus mak hanesan iha Kopa Mundial 2018. Iha jogus primeiru Senegal konsege halakon Polandia ho Score 2 – 1 no impata 2 – 2 hasoru Japaun iha jogus segundu.

16. Polandia

Iha Kopa Mundial 2018 Russia, Polandia hamutuk ho Colombia, Japaun, no Senegal iha Grupu H. Maske manan dala ida iha jogus ikus hasoru equipa Japaun ho score 1 – 0, maibe la azuda Polandia hodi hakat ba faze knock-out, tanba so rekolha pontus 3 deit. Iha jogus primeiru Polandia lakon hasoru Senegal ho score 1 – 2, no mos lakon hasoru Columbia 0 – 3 iha jogus segundu.

Maske equipa 16 temi iha leten la kontinua ba faze tuir mai iha Kopa Mundial 2018 Russia, maibe sira ida-idak hatudu duni jogus ho kualidade as teb-tebes, enkuadra iha espiritu fairplay no fraternidades entre futebolistas mundial, ne’ebe konsege dada adeptus rihun ba rihun hosi paises oi-oin ba halibur no hasoru malu iha Russia iha ambiente paz no harmonia.* [MC. Moniz | TAFARA.TL | 29.06.2018].

About Metodio Caetano Moniz

Metodio Caetano Moniz, nudar Senior Editor & Fundador TAFARA.TL, hamutuk ho Fernando A. da Costa & Zevonia Vieira.

Check Also

Bintang Festival Sei Realiza Konsertu ba Daruak iha Timor-Leste.

Banda Musika rai laran no Jamrud hosi Indonesia sei anima komunidade Timor sira iha municipio …

Leave a Reply

Your email address will not be published. Required fields are marked *