Saturday , November 17 2018
Home / Opini / Kritikas ba Inisiativa g7+, Fo Benefisiu ba Se?
Ato ‘Lekinawa’ Costa, nudar Ativista RENETIL. [Foto: Dokumentu privadu | 06.08.2018]

Kritikas ba Inisiativa g7+, Fo Benefisiu ba Se?

Inisiativa g7+ ka Kooperasaun Entre Estadu Frajil, ne’ebe ikus mai popular liu ho naran The New Deal, oras ne’e dadaun lidera no finansia hosi Timor-Leste. Maibe g7+ la fo benefisiu real ba povo, halao deit agenda elites nian, no fo todan deit ba orsamentu estadu.

Kona ba g7+

Tuir g7+ nia publikasaun hatete katak modelu kooperasaun ida ne’e tau preokupasoens estadu frajil sira nian kona ba prosesu harii dame no harii estadu iha diskursu publiku ho intensaun atu halo mudansa iha narativu sistema tulun internasional nian sira ba estadu frajil.

Iha 10 Abril 2010, iha Dili, bainhira halao tiha Dialogu Internasional Harii Dame no Harii Estadu, nasaun 17, mesak estadu frajil deit, hato’o sira nia preokupasaun no deklara establesementu g7+ nudar instituisaun intergovernamental independente ida mak lori hamutuk nasaun sira iha konflitu ka experiensia hela konflitu no fajilidade. Sira mos deklara mekanizmu sira hodi servisu iha estadu frajil sira. Deklarasaun ne’e sira halo mak ikus mai koinesidu liu ho naran The New Deal. Kontinuasaun hosi deklarasaun The New Deal mak establese mos Sekretariadu g7+ iha Dili, no mos ikus mai establese tan ida iha Portugal. Finansiamentu ba inisiativa ida ne’e mai hosi orsamentu estadu Timor-Leste nian.

Timor-Leste estadu frajil?

Bainhira observa deklarasaun The New Deal no dezenvolvimentu hosi inisiativa ne’e, perguntas bo’ot mosu kedas, oinsa mak Timor-Leste mos prega ba nia an rasik, estatuta ida nudar estadu frajil? Kriteria establesidu hodi hatama Timor-Leste nudar estadu frajil ne’e mak saida?

Iha definisaun oin-oin kona ba frajilidade, depende se mak define. Doadores, organizasaun regional ka organizasaun tulun internasional sira iha sira nia definisaun rasik kona ba saida mak estadu frajil. Buat ida klaru mak estadu frajil ne’e laos estadu failadu. Estadu ida sai frajil tanba iha konflitu tinan naruk mak akontese iha rai laran ka tanba influensia ka tanba intervensaun external nian. Internalmente, iha ator nivel nasional ka nivel lokal nian sira produs sira nia definisaun rasik kona ba saida mak konstitui nudar estadu frajil. Dala barak difinisaun internal nian sai aseitavel liu ba ator external sira duke ba ator sira iha rai laran.

Uniaun Europea, organizasaun rejional ida mak fo tulun barak ba estadu frajil sira, define katak, estadu fajil mak estadu ne’ebe iha “estrutura fraku, no iha situasaun sira mak kontratu sosial nakfera ona tanba inkapasidade estadu nian atu halao ninia funsaun baziku sira hodi hatan ba nia obrigasaun no responsabilidade atu fornese servisus ba nia sidadaun sira, halo jestaun ba nia rekursu sira, hatur lei no orden, asesu mak hanesan ba poder, fo seguru no seguransa ba nia populasaun, proteze no promove dereitu no liberdade sidadaun sira nian.”

Definisaun Uniaun Europea nian bele reprezenta situasaun balun kona ba estadu frajil. Maibe, ator internal ka nasional sira bele hatete katak definisaun ne’e reprezenta deit doadores ka ema liur nia vizaun kona ba saida mak konstitui nudar frajilidade estadu nian. Reprezentasaun kona ba saida mak konsidera los ka sala bele sai nudar sasukat iha kooperasaun ho estadu frajil sira.

Los duni, Timor-Leste mak rai ida mak joven hela no ninia instituisaun estadu sira sei nurak. Maibe bainhira haree ba experiensia, estadu Timor-Leste iha experiensia mak rai barak la iha, inklui bele lidera rasik ninia prosesu rekonsiliasaun, establese relasaun diak hikas ho Indonesia, resolve krizi politik internal, hametin ninia instituisaun estadu sira, promove dereitus umanus no libredade expresaun, no dezenvolve ninia planu dezenvolvimentu estratejiku no ezekuta nia planu dezenvolvimentu sira. Hosi buat lubuk ida mak Timor-Leste halo ona, loloos ne’e ita labele tau an nudar estadu frajil nafatin.

Kritikas ba g7+

Iha nasaun frajil sira balun mak sai ona membru ba g7+ hahu tiha ona implementa The New Deal hosi 2012, maski nudar pilotu deit. Nasaun sira ne’e inklui Afghanistan, Congo, Chad, Liberia, Sierra Leone, Sudan Sul no Timor-Leste. G7+ mos dezenvolve tiha ona relasaun servisu ho institute finansial internasional sira, inklui ho Banku Mundial, Banku Dezenvolvimentu Asiatiku, FMI, no WTO. The New Deal mos halo ligasaun inisiativa harii dame no harii estadu ho Objetivu Dezenvolvimentu Sustentavel no. 16 nian.

Maski nune’e organizasaun sosiedade sivil sira, iha rai sira mak g7+ hahu ona tama no implementa dadaun enkudramentu balun, hahu kestiona inisiativa ida ne’e. Organizasaun sosiedade civil balun foti kestaun relasiona ho involvimentu sosiedade civil, seluk fali kestiona kona ba benefisiu hosi The New Deal.

The New Deal iha ninia plataforma unique hodi rekoinese sosiedade civil nudar parseiru hodi hasai nasaun frajil sira hosi sira nia frajilidade. Temi tiha ona iha The New Deal katak susesu ba harii dame no harii estadu sei sai posivel bainhira tau konsiderasaun ba relasaun sosiedade-ho-estadu. Maski nune’e, lian negativu mos sei mosu relasiona ho involvimentu sosiedade sivil nian. Avaliasaun ida ne’ebe halo hosi Wall, K. ho Fairhurst, R. 2014 kona ba dezafiu no opurtunidade involvimentu sosiedade civil nian iha The New Deal fo sai pontus positivus no mos negativus hosi sira nia involvimentu. Avaliasaun ne’e halo ba lider organizasaun sosiedade civil iha Afghanistan, Congo, Liberia, South Sudan, no Siera Leone. Avaliador sira ne’e hatete katak organizasaun sosiedade civil involve ho seriu iha implementasaun. The New Deal kontribui ba dezenvolvimentu relasaun no komunikasaun entre ator sira mak iha konflitu, no maski sira nia relasaun antes ne’e la akontese.

Maski nune’e, avaliador sira ne’e hatutan katak organizasaun sosiedade civil mos dehan katak estadu membru g7+ sira ladun hakarak atu involve organizasaun sosiedade civil nudar parseiru permanente. Estadu membru sira ne’e mos preokupa karik organizasaun sosiedade civil sira sei husu akuntabilidade membru estadu g7+ ba sira nia komitmentu. Estadu membru sira mos ladun siente haksolok ho partisipasaun sosiedade civil sira hodi bolu atensaun ba indikadores global no mos indikadores bazeia ba presepsaun. Tanba ne’e sira nota katak prezensa sosiedade civil nudar ameasas ba lejitimidade membru estadu nian duke nudar meius atu fasilita dezenvolvimentu efetivu hosi The New Deal. Iha situasaun balun membru estadu g7+ tenta atu servisu deit ho organizasaun sosiedade civil mak sira hili ka apoio ona duke organizasaun sosiedade civil sira mak independente/imparsial.

Benefisiu real g7+ la iha

Iha semana hirak liuba, bainhira reprezentante g7+ ba halo aprezentasaun kona ba servisu g7+ nian iha FONGTIL. Reprezentante ne’e fo sai katak g7+ komplementa politika externa Timor-Leste nian, lori Timor-Leste ba hetan rekoinesementu internasional, reforsa pozisaun ita nian ba asuntu internasional, no aprende hosi nasaun seluk kona ba Adesaun ba WTO.

Iha aprezentasaun ne’e, organizasaun sosiedade civil sira reazen ho maka’as no halo kritika ba inisiativa ida ne’e. Notisia TVTL publika kona ba komentariu Diretur FONGTIL nian, Daniel do Carmo, ne’ebe lamenta ho servisu Sekretariadu g7+ nian no hatete mos katak inisiativa g7+ la fo benefisiu ba povo.

Perguntas ne’ebe mosu mak apakah MNEC ladun halo ninia servisu ho diak tanba ne’e presija orgaun extra ida tan hodi komplementa politika externa Timor-Leste nian? Rekoinesementu internasional saida mak Timor-Leste hakarak buka atu hetan? Iha rai hotu-hotu, servisu politika externa sempre halo ho intensaun atu lori benefisiu ba situasaun domestiku. Benefisiu domestiku ne’e bele aumenta hasa’e prestijiu estadu nian no lori investementu, lori preokupasaun internal ba mundo, no halo sidadaun sira sai urgullu. Inisiativa g7+ karik lori Timor-Leste ba hetan prestijiu ruma, se iha, maibe prestijiu ne’e fo benefisiu ekonomia saida ba Timor-Leste.

Timor-Leste mos la halo ninia politika externa hodi konsidera nia an nudar estadu metade ilha (negara setengah pulau) ka estadu ki’ik. Estadu ki’ik sira nia diplomasia ne’e tau konsiderasaun ba ninia karakteristiku rasik, inklui iha rekursu umanu limitadu, rekursu naturais limitadu, ekonomia ki’ik, vulneravel ba seguransa regional (Sudeste Asiatiku no Oceania) en termus dezastre naturais, seguransa umanu, no seguransa geo-politiku. Inisiativa g7+ ne’e laos karakteristiku diplomasia estadu ki’ik hanesan Timor-Leste. Interesante mos atu nota katak Ramos Horta, diplomata ida ne’ebe halo politika externa ho briliante tebes, hamutuk ho ninia kolega sira seluk, konsege lori Timor-Leste ba to’o ukun rasik an maibe la hetan papel ruma iha inisiativa g7+ ne’e.

Nota mos katak nasaun sira iha rejiaun Sudeste Asiatiku ne’ebe konsidera nudar frajil la hola parte iha The New Deal laran. Nasaun sira iha rejiaun Sudeste Asiatiku mak tama iha lista Fragile State Index 2018 ne’e mak Myanmar, Vietnam, Cambodia, Laos, Indonesia no Thailand. Karik, nasaun sira ne’e la hola parte tanba partisipasaun iha The New Deal ne’e voluntariu, nune’e nasaun sira iha Sudeste Asiatiku mak frajil livremente desidi atu la partisipa. Bele mos tanba sira la haree benefisiu hosi hola parte iha inisiativa ida ne’e.

Se nia agenda mak g7+?

Iha mos diskonfiansa ba agenda se nian ka saida nian mak g7+ promove hela. Agenda ida mak diskonfia mosu mak intensaun hosi g7+ nian hodi promove aprosimasaun liberal ba prosesu harii dame ho estadu. Agenda ne’ebe dala barak ona falla tanba fo atensaun barak liu ba rasionalidade estadu no demokrasia liberal nian hodi harii dame no harii estadu. Estadu frajil barak ladun iha experiensia demokrasia liberal no laos lidera hosi ator sira mak mak sira nia nivel rasionalidade ne’ebe hanesan ho ator estadu iha nasaun liberal mak dezenvolve an diak ona. Demokrasia liberal la tau importansia ba sidadaun sira mak la iha repezentasaun iha estadu, la tau atensaun ba papel ator non-formal sira, no ladun fo atensaun maka’as ba ema lokal nudar nain ba prosesu harii dame.

Agenda rua mak diskonfia g7+ promove hela mak agenda privadu hosi elite politiku sira nian ne’ebe halo hela esforsu atu transforma an hosi elite nasional ba elite mundial nian. Interese hosi elite sira nian ne’e sai tiha ‘rai-metan’ ba interese instituisaun finansas internasional sira hodi koopera no dezenvolve liutan. Kombinasaun ne’e fo fatin ba kresimentu agenda liberal nian, no sei tau ema babain iha dalan ninin dezenvolvimentu nian.

Atu konklui hakarak hatete katak inisiativa g7+ ne’e ninia finalidade ema ida la hatene. Estadu sei kontinua finansia nafatin no la iha retornu real mak povo Timor-Leste hetan. Kritikas mak fo ona sai deit ezersisiu kakutak hodi kontribui ba hadiak saida sala ona.* [ Ato ‘Lekinawa Costa | Hakerek nain ativista RENETIL, no artikel ida ne’e opiniaun pesoal, la reprezenta instituisaun mak hakna’ar an ba | TAFARA.TL | 16.10.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Demokrasia Iha Republika Ida Ne’e Sofre Moras Epilepsia, “Cabeça Não Têm Coração” Ulun La Iha Fuan

Aiknanoik melodrama iha kultura politika demokrasia nian furak tebes. Nai ulun sira grava no toka …

Leave a Reply

Your email address will not be published. Required fields are marked *