Tuesday , March 26 2019
Home / Eleisaun Parlamentar / Labarik Kontinua Partisipa iha Elisaun kampanna Politika ELPAR

Labarik Kontinua Partisipa iha Elisaun kampanna Politika ELPAR

Ita hotu Iha Konsiensia Proteje no Prevene labarik sira la involve iha kampanna partidu polittiku. Labele husik labarik abandona eskola, labarik mobiliza labarik ba kampanna politika.”

Tama ona semana ida partidu hamutuk 21 hala’o sira nia kampanna haleu Timor laran tomak, hodi faan sira nia programa, hodi hetan fiar hosi povu, no sira bele determina votus ba partidu ne’ebe sira hakarak.

Observasaun jornalista TAFARA.TL rasik katak involmentu labarik sira ne’ebe idade minoria sei nafatin partisipa, hodi lori emblema partidu no bandeira partidu nian, sae trek hodi hakilar viva.

Iha konstituisaun RDTL artigu 18 koalia kona ba protesaun ba labarik oan sira. Iha artigu ne’e esplika klean katak, “Labarik sira iha direitu ba protesaun espesial husi familia, komunidade no mos estadu liuliu hasoru hahalok hotu hanesan la tau matan, diskriminasaun, violensia, operasaun, abuzu seksual no explorasaun.”

Iha Konvensaun Internasional ne’ebe estadu ratifika ona, esplika klaru katak, labarik sira hetan direitu hotu ne’ebe mundu rekoñese, labarik hotu ne’ebe moris iha kazamentu nia laran ka lae, iha direitu hanesan kona-ba protesaun social.

Bainhira jornalista TAFARA.TL dada lia ho ekipa susesu hosi partidu PD ida ne’ebe halo hela nia kampanna politika iha Dili, iha loron 26/06, hateten orientasaun hosi partidu rasik hatun ona ordem atu la fo spasu ba labarik sira hodi partisipa iha kampanna politika tanba, liu-liu ba idade minoridade.

“Ami esforsu ona hodi fahe informasaun liu hosi strutura Partidu PD maibe karik sira mak sae trek tuir mai, tanba ne’e mak ami sei hakas hodi toma atensaun makas hodi labele akontese iha kampanna tuir mai. Ida ne’e di luar ami nia orientasaun, ami sei halo evaluasan para antisipa ida ne’e labele akontese tan”, esplika Xefe Komisaun Organizadora PD.

Iha fatin kampanna politika PD nian, iha Becora Kulau, loron 25/06, TAFARA.TL konfirma ho koordenador ba ekipa Monitorizasaun PDHJ, Jose Manuel Fereira esplika katak antes hahu kampanna politiku, iha ona ekipa konjuta ne’ebe involve PDHJ rasik, komisaun Direitus Labarik no KAK, halo ona konferensia da imprensa ne’ebe fo sai ba publiku, katak husu partidu politiku sira atu labele involve labarik sira iha kualker kampanna parpol, tanba ida ne’e violasaun ba direitu labarik nian.

“Ita hotu akampanna katak sei iha labarik mak involve iha atividade kampanna parpol. PDHJ nudar observador to ikus sei hato’o relatoriu no sei rekomenda ba orgaun kompenente hodi hare asumtu hirak ne’e, hodi iha future bele hadia”, hateten Jose Manuel.

Jose Manuel informa liuatan katak PDHJ halo ona esforus lubuk ida, hodi hasae konsensia lider partidu politiku sira no mos inan aman labarik sira, tanba impaktu ne’ebe labarik sira sei hetan, mak se karik involve labarik sira iha kampanna politiku, iha loron babain no oras eskola nian, sira sei lakon oportunidade ba estuda, no mos bele impaktu ba saude tanba hare hosi rai rahun no iklima ne’ebe ladun diak labarik minoridade sira.

Komisaun Direitus Labarik mos hato’o ona ba publiku no partidu politiku sira, atu labele involve labarik sira iha kampanna politiku, “Ita hotu Iha Konxiensia Proteje no Prevene labarik sira la involve iha kampanna partidu polittiku. Labele husik labarik abandona eskola, labarik mobiliza labarik ba kampanna politika no labele tau labarik iha risku hahalok at.

Iha fatin kampanna partidu PD nian, jornalista TAFARA.TL konsege dada lia ho inan Ana Paula (46),ne’ebe partisipa iha kampanna refere, hodi esplika kestaun oan sira ne’ebe partisipa. Ana Paula hateten la lori oan sira hodi partisipa tanba strutura PD rasik aviza ona atu la lori labarik sira mai partisipa.

“Hau la lori labarik sira mai tanba hetan ona aviza hosi strtutura PD atu labele lor labarik sira, tanba hare kestaun ne’ebe mak bele fo risku ba labarik karik akontese violensia, se mak sei responsabiliza”, Hateten Ana Paula.

Kampanna politika sei kontinua hala’o to loron 19 Julhu, komunidade, organizasaun direitus humanus, komisaun direitus labarik sira hotu espera involvimentu labarik sei menus no karik la iha tan ona labarik iha kampanna.* [Zevonia Vieira | TAFARA.TL | 25.06.2017].

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *