Lere: Importante Situasaun Tenke Hakmatek, FFDTL Prontu Fo Apoio

“Se karik Prezidente toma ona desizaun, atu resolve situasaun Timor, atu atende necessidade povu nian, hanoin katak laiha problema tanba ida ne’e mak ami fo apoio. Elisaun antisipa ka laiha, solusaun tomak iha Prezidente nia liman”. Lere

Xefe Estado Maior F-FDTL, Maijor Jeneral Lere Anan Timur, hasoru malu ho Prezidente da Republika, Dr. Francisco Guterres Lú Olo hodi informa situasaun atual ne’ebe lao hakmatek iha teritoriu tomak.

Hafoin remata enkontru ho Prezidente Lú Olo, ba jornalista sira, Lere Anan Timur hateten esplikaba ba Xefe Estadu kona ba situasaun forsas armadas no politika iha rai laran katak iha nível nasional situasaun lao diak.

“Ema agora halo preparativu atu simu santo natal no tinan foun. Ita nia populasaun, liu-liu iha área rurais hakmatek, sira preokupa sira nia moris lor-loron, halo toos, halo natar, hein sira nia karau no hein bibi. Situasan politika ne’ebe agora lao dadauk iha Dili la afeta ba sira nia moris. Tanba dala ida tan ita nia povu hatudu sira nia maturidade ba ita nia líder sira, liu-liu ba líder tuan no líder foun. Tinan ida ne’e balun iha espekulasaun, iha pesismismu katak tinan ida ne’e no tinan foun bele la hakmatek, maibe hau nudar responsável ba defeza nian, hau dehan sei hakmatek, maske sei iha problema tanba osan, populasuan balun dehan sasan folin sae, tanba orsamentu retifikatiu la aprova maibe hau bele dehan katak orsamentu retifikativu ne’e ba funsionariu no impresariu sira, ita nia populasaun iha rural moris ho nia modo no animal, ne’e ba sira sei la afeta. Importante mak situasaun tenke hakmatek duni”, hateten Lere.

Eis girileiru ne’e mos informa ba Prezidente da Republika kona ba situasaun politika ne’ebe lao hela, governu sedauk apresenta programa governu nian ba dala rua, opozisaun halo karta mosaun sensura, buat oin-oin ne’ebe la dun favorese ba situasuan politika rai laran.

“Bele mosu situasaun krizi instituisional, instituisoens bele paraliza. Hau husu ba Prezidente no nudar comandante superior forsas armadas nian, hau dehan katak toma kualker desizaun, kompetensia tomak iha ita nia liman laran , ne’ebe Konstituisaun haruka no forsas armadas prontu apoia ita boot nia desizaun. Se karik Prezidente toma ona desizaun, atu resolve situasaun Timor, atu atende necessidade povu nian, hanoin katak laiha problema tanba ida ne’e mak ami fo apoio. Elisaun antisipa ka laiha, solusaun tomak iha Prezidente nia liman. Ita nia politika sira tenke hanoin, servi ba interesse nasaun nia”, hateten Lere.

Iha enkontru refere Komandate Lere mos informa kona ba Ró ne’ebe mai hosi nasaun Xina atu fo asistensia saúde ba forsas armadas, ba polisia no komunidade tomak no ró ne’e sei desloka ba Atauro, atu fo asistensia ba comunidade sira iha Atauro. Ró refere sei iha Timor to loron 21/12 mak foin fila ba Xina. Atividade refere realiza tanba FFDTL halo koperasaun nasaun Xina, atu beke konvida mai halo asistensia saúde iha Timor.*[Zevonia Vieira | TAFARA.TL | 13.12.2017]

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.