Liberdade Imprensa Sei Mohut Iha Nasaun Demokratiku Timor-Leste?

Serve duni ka lae? kriminaliza servisu jurnalismu nian? Serve duni ka lae jornalista ne’ebe halo nian kna’ar hodi publika informarsaun ba publiku tenke sai hetan alegasaun nudar kriminozu?

Asosisaun Jornalista Timor-Leste ho Timor-Leste Press Union halao asaun selensia no long march hosi edifisiu Timor-Post Bebora to iha Palacio Governu.

Asaun ne’e halo tanba liga ho kazu ne’ebe jornalista Timor Post Raimundus Oky, hetan alegasaun hosi Ministeriu Publiku pena ativa tinan ida. Ho razaun ida ne’e AJTL no TLPU hanoin katak servisu jurnalismu komesa hetan ameasa tanba laiha spasu ona hodi halo kna’ar hodi publika informasaun, tanba jornalista iha nian servisu ne’ebe importante hodi kontrola social.

Advogadu hosi International Federation of Journalist (IFJ), Jim Nolan ne’ebe durante ne’e sai hanesan advogadu ba kazu Raimundus Oky, ba jornalista sira iha loron asaun ne’ebe AJTL ho TLPU organiza hateten katak, bainhira lider politiku ka membru governu ne’ebe mak lori jornalista ba tribunal no ikus tenke tama komarka, ida ne’e falansu boot ida tanba hamate ona demokrasia iha rai ne’ebe foin ukun an iha tinan 1999.

“Salah boot bainhira jornalista ida tenke tama komarka, tanba jornalista laos kriminozu. Iha dalan seluk hodi resolve kazu ne’ebe jornalista halo. Timor-Leste iha Lei Komunikasaun Sosial ne’ebe mak diak hodi, maibe la uza lei ida ne’e. Tenke respeita servisu jornalista nian, tanba jornalista parte ida hodi kontrola social, nia halo servisu importante ba nasaun ida ne’e. labele kriminaliza servisu jurnalimu nian,” tenik Jim Nolan.

Iha parte sorin Ativista hoi NGO Lao Hamutuk, Juvinal Dias, ne’ebe partisipa iha asaun ne’ebe hala’o iha loron 29/05, hateten katak bainhira impede ona liberdade imprensa ne’e laos jornalista mak sai vitima, maibe povu mak sai vitima tanba povu lakon nian direitu hodi asesu informasaun. Bainhira jornalista la halo nian servisu hodi publika informasaun tanba hetan intimidasaun ka ameasa, oinsa mak povu bele asesu informasaun tuir Konstituisaun RDTL haruka.

Mosu perguntas boot ba iha situasaun ida ne’ebe komesa hatudu, serve duni ka lae bainhira jornalista sira ne’ebe halo sira nian kna’ar tuir kriteria no Lei Komunikasaun Sosial ne’ebe iha, no tenke kriminaliza fali sira nian profisaun?

Serve ka lae jornalista ne’ebe halo sira nian kna’ar hodi publika informasaun ba publiku tenke hetan sangsaun bainhira jornalista ida halo salah, tenke resolve iha tribunal ka komarka?

Bainhira jornalista ida ne’ebe halo nian kna’ar tuir kriteria jurnalistiku no Lei Komunikasaun Sosial no tenke hetan alegasaun iha tribunal, klaru katak alegasaun ne’ebe iha nudar falansu hosi ema ne’ebe implementa Lei no bele hamosu indikasaun katak uza salah poder no kontra ona konstituisaun ne’ebe vigora.

Iha parte sorin bainhira jornalista sira konfirma ho Premeiru Minsitru, Dr.Rui Araujo kona ba asaun ne’ebe jornalista sira organiza, Dr. Rui hateten katak, “hau labele intervene asaun ne’ebe jornalista sira halo, hau intrega ba tribunal mak sei desidi”.

Kazu ne’ebe jornalista Oky hasoru tanba nutisia ne’ebe hatun iha tinan 2010, bainhira Dr. Rui Araujo sei hanesan adviser iha Minsiteriu Finansas kona ba projetu single source ne’ebe kompania hosi Indonesia asina.

Tuir observasaun TAFARA.TL katak jornalista sira hatudu nian solidaridade no unidu tanba mayoria jornalista tauk ida ne’e sei bele akontese tan iha futuru, ba jornalista sira seluk. Iha asaun ida ne’e jornalista sira sunu lilin no kari aifunan iha tasi ibun, nudar simbolu katak jornalista sira hatudu solidaridade ba jornalista ne’ebe sai vitima no iha esperansa ba boot katak politiku nain sira la hamate liberdade imprensa iha Timor-Leste.

Alegasaun final liga kazu jornalista Raimundus Oky sei publika iha loron 1 de Junhu liu hosi tribunal.*[Zevonia Vieira | TAFARA.TL | 29.05.2017].

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.