Saturday , April 20 2019
Home / Sosial & Politika / Loron Mundial Menstruasaun, Cidalia: Ijiene Menstruasaun Importante Ba Oan Feto no Familia Sira
Espoza Prezidente Repúblika, Cidalia Mouzinho Nobre Guterres halo intervensaun iha loron mundial menstruasaun hamutuk Merie Stopes. [Foto: Media PR | 28.05.2018]

Loron Mundial Menstruasaun, Cidalia: Ijiene Menstruasaun Importante Ba Oan Feto no Familia Sira

Ijiene menstruasaun importante tebes atu konsidera mos fasilidade saneamentu hanesan haris fatin ne’ebe mos, iha be mos, no espasu adekuadu nune bele enkoraja ka motiva labarik feto sira hodi mantein ka kontinua estuda maske iha hela period menstrusaun nia laran, nune atu mantein partisipasaun labarik feto sira nia iha eskola”. Cidalia Guterres

Merie Stopes Timor Leste Selebra Loron Internasional Menstruasaun ho objetivu hetan partisipasaun máximu husi feto no mane foinsa’e sira, hodi bele aprende kona ba tópiku menstruasaun liu husi promosaun ba hahalok saudável kona ba menstruasaun.

Tema global hosi loron Menstruasaun “No More Limits” [ laiha limitasaun. Red] signifika katak Menstruasaun la’os deit problema feto, no feto deit mak tenke hatene, maibe involvimentu husi mane mós importante atu hatene no komprende kona ba menstruasaun hodi maluk mane sira bele komprende aspetu ida tan, kona ba feto ninia kondisaun.

Youth, Disability and Partnership Coordinator-MSTL, Helio Afranio Soares iha loron eventu ne’e hateten katak hakarak enkoraja ema hotu, la iha tan limitasaun ba iha se-se deit, hare ba realidade agora, dala balu alin feto sira sempre hetan problema iha menstruasaun wainhira sira ba iha eskola, sira tenki falta eskola ka sira tenki husu lisensa wainhira iha periodu ida ne’e, dala balu mos hetan diskriminasaun husi kolega mane sira tanba sira konsidera wainhira ema ne’ebe iha periodu ida ne’e hanesan ema moras entaun tenkiser husu lisensa no fila ba uma, no mos maioria komunidade barak fiar katak ou sira fiar seterotipu negativu ba feto nebe mak iha mensturasaun katak, menstruasaun hanesan moras, entaun ema tenki ser iha uma deit, no limita sira atu asesu tan ba atividade seluk ne’ebe mak sira atu ba.

Helio fo hanoin ba ema hotu, hodi fo liman ba malu atu luta ba saude foinsa’e sira nian, liu-liu ijiene menstruasaun hodi hametin komitmentu katak la iha tan ona limitasaun.

Espoza Prezidente Repúblika, Cidalia Mouzinho Nobre Guterres iha selebrasaun Menstruasaun ne’e, ba foinsa’e sira ne’ebe partisipa, Cidalia hateten rekuñese katak labarik feto sira barak mak seidauk iha kuñesementu lolos konaba menstruasaun, mak nudar prosesu bilojia nebe normal. Mayoria labarik feto sira hatene menstruasaun bainhira akontese ba sira ba dala uluk liu.

“Ha’u hakarak fo hanoin katak assuntu ijiene menstruasaun la’os de’it importante ba ita-nia oan feto sira, maibe mós ba família sira, tan labarik feto sira seidauk esperiensia tan ne’e inan sira ne’ebé normalmente sai fatin, husu no buka hatene ba sira nia oan feto sira persiza tebes atu fahe esperiensia no matenek sira ho oan no alin sira. Labarik sira barak mak sei moe, iha presaun nia laran, no preokupa bainhira alunus seluk hatene sira menstruasaun. Enkuantu sira aguenta hodi la troka durante tempu eskola nune sei fo implikasaun hanesan infesaun. Perigu ne’ebe bele deit akontese kuandu la troka no la hamos oin lulik husi ran bele deit akontese infesaun saluran kencing, infeksi saluran reproduksi, dan iritasi kulit”, hateten Cidalia

Cidalia afirma katak labarik ka foinsa’e feto sira sente moe, ta’uk no lafiar án tamba menstruasaun hanesan konsekuensia husi esperiensia no koñesimentu ne’ebé menus ka lahatene katak menstruasaun ne’e parte normál husi sira-nia kreximéntu biolójiku.  La’os de’it presaun social, fasilidade saniamentu iha eskola ne’ebe la adekuadu mos sai dezafiu ida ba estudante sira hodi troka no hamos an regular. Tamba ne’e bainhira ko’alia konaba ijiene menstruasaun importante tebes atu konsidera mos fasilidade saneamentu hanesan haris fatin ne’ebe mos, iha be mos, no espasu adekuadu nune bele enkoraja ka motiva labarik feto sira hodi mantein ka kontinua estuda maske iha hela period menstrusaun nia laran, nune atu mantein partisipasaun labarik feto sira nia iha eskola, parte kompetenti persiza toman atensaun ba iha fasilidade infrastrutura basika iha eskola hanesan haris fatin ne’ebe separa entre feto no mane no kompletu mos ho eletrisidade no be mos hodi bele fasilita labarik feto sira.

Iha sorin seluk, reprezentante organizasaun foinsa’e membru APFTL, Esmeralda da Conceição Guterres hato nia sentimentu orgullu nu’udar feto foinsa’e, loron ne’e bele fahe informasaun kona ba ijiene mensturasaun ba foinsa’e feto no mane.

“Hau nu’udar feto foinsa’e, partisipa iha eventu ida ne’e, hau senti orgullu teb-tebes, tanba loron internasional ijiene menstruasaun hanesan dalan ida hodi kapasita ita nia maluk feto foinsa’e sira atu hatene lala’ok kona ba menstruasaun nian, no mos atu bele ajuda foinsa’e mane sira oinsa atu ita nia feton ou ita nia inan sira ne’ebe mak hetan menstruasaun atu komprende ou la halo barreira kona ba ida ne’e/la fo tan ona limitasaun”, hateten Esmeralda

Eventu ne’ebe oraganiza hosi Merie Stopes Oferese, iha loron 28/05 fahe informasaun mos konaba ijiene menstruasaun, kuiz, expozisaun kona ba tematiku eventu refere no iha atividade relasionadus seluk tan.

Selebrasaun nee realiza tanba Merie Stopes Timor Leste servisu hamutuk ho WaterAid em parseira ho Ministeriu Saude, Ministeriu Edukasaun no Sekretaria Estadu Juventude no Traballu. Eventu ne’e mos hetan abertura husi espoza Prezidente da RDTL, ne’ebe hetan Partisipa husi estudante ensinu sekundariu balu iha Dili, Organizasaun Foinsa’e, reprezentante Ministeriu Saude, espoza Prezidente da RDTL, no NGO Internasional balu, ne’ebé realiza iha resintu Eis Sekretaria Estadu Juventude no Desportu.

About Yane Elfrida Maia

Check Also

Bankada Fretilin Sauda no Respeita PR nia Desizaun Promulga OJE 2019

Relasiona ho Prezidente da Republika, Francisco Guterres Lú Olo promulga Orsamentu Jeral Estadu [OJE] 2019, …

Leave a Reply

Your email address will not be published. Required fields are marked *