Sunday , June 24 2018
Home / Sosial & Politika / Lú Olo: Brigadeiru Jeneral Nain 4 Merese Rekonnesimentu Publiku, Sira Hatudu Kualidade Komandu
Brigadeiru Jeneral Falur Rate Laek, Sabika Bessi Kulit, Maunana, Aluc Descartes simu promosaun ofisias hosi PR. [Foto: Copyright Media PR | 07.06.2018]

Lú Olo: Brigadeiru Jeneral Nain 4 Merese Rekonnesimentu Publiku, Sira Hatudu Kualidade Komandu

“Estadu tenke rekonnese sira nia sidadaun ne’ebe hatudu nasionalismu no patriotismu ne’ebe as tebes. Rekonnese no valoriza sira ne’ebe mak uluk la moris susar no terus, ho ideologia politika ketak-ketak, tanba sa mak labele renkonnese maluk Timor oan ne’ebe terus no kompremete nia an ba rai no fo ba povu doben ida ne’e”. Lere Anan Timur

Prezidente da Republika, Francisco Guterres Lú Olo fo promosaun ofisias superiors FFDTL ba Brigadeiru Jenerais nain haat, tuir dekretu Prezidente da Republika, ofisias nain haat mak Koronel Domingos Raul “Falur Rate Laek” dekretu do Prezidente da Republika no.14/2018 30 de Maio, Koronel Américo Ximenes “ Sabika Bessi Kulit”, dekretu Prezidente da Republika no.15/2-18 30 de Maio, Koronel Cornélio Ximenes “Maunana” dekretu Prezidente da Republika no.16/2018 30 de Maio no Koronel João Miranda “Aluc Descartes” dekretu Prezidente da Republika no.17/2018 de 30 de Maio.

Liu hosi seremonia refere Prezidente da Republika, hatoo deskursu katak hosi seremonia ida ne’e hatudu nudar sasin ita nia domin ba patria, ba koezaun nasional no mos Instituisaun MIlitar nia importanisa ba povu hotu.

“Ohin ita haksolok hamutuk ho pasadu ida ne’ebe kesi metin ita hotu no ba bebeik. Ohin ita hotu haksolok ho valor sira ne’ebe hametin ita hotu ne’ebe hakarak harii Timor-Leste nudar nasaun livre, soberana no independente”, hateten Lú Olo iha palacio prezidensia, 07/06.

Lú Olo afirma mos katak lalaok ida mak halo omenajen ba maluk sira ne’ebe fo an no mate durante ita nia luta ba libertasaun, hodi ohin loron ita moris iha Timor-Leste livre no independente. Lalaok ida seluk mak oinsa estadu rekonnese maluk sira ne’ebe halao duni nia responsabilidade hori uluk no sei hamutuk hela ho ita ohin loron. Maluk sira ne’e halo sakrifisiu oi-oin no fo an tomak ba ita nia luta ukun rasik an, nune’e sira manan direitu atu estadu rekonnese sira, hare liu-liu ba kriteiru tuir meritu, brani no fo an tomak.

Liu hosi kompetensia ne’ebe Prezidente da Republika iha mesak mak halo promosaun ba military F-FDTL sira, ba postu ofisial jeneral no promosaun ofisial jeneral sira nian, hafoin simu proposta hosi Konsellu Ministru. Kompetensia rasik ida ne’e mais hosi komandante supreme F-FDTL.

Lú Olo hateten tuir Lei, kriteriu distinsaun mak fo dalan ba estadu, halo promosaun ba ofisial jeneral sira ne’ebe hatudu makaas komandu, diresaun ka xefia ho nivel kualidade aas tebes, iha sira nia lalaok military ne’ebe fo gloria ba patria ka prestijiu ba intituisaun military.

“Brigadeiru Jeneral FFDTL sira ne’ebe hetan promosaun ohin, halibur kualidade espesial sira ne’e hotu. Sira nia esforsu no dedikasaun tomak, iha misaun sira ne’ebe idak-idak simu, hosi hori uluk to ohin loron, merese rekonnesimentu publiku. Iha sira nia karreira military tomak, sira nain haat hatudu kualidade komandu, diresaun no xefia aas tebes, iha ita nia luta libertasaun nasional”, hateten Lú Olo.

Iha fatin hanesan, Xefe Estadu Maior Jeneral FFDTL, Lere Anan Timur hatoo deskursu katak VII Governu Konstituisional hatene no oinsa valoriza ita nia veteranu sira ne’ebe mak ativu hela iha FFDTL, tanba sira presta hela servisu ida ne’ebe extra ordinariu ba ita nia rain no povu Timor-Leste, hafoin liberta tiha ita nia rain. Ezemplu ida ne’ebe sei la haluha no serve ba jerasaun foun sira atu banati tuir, sakrifisiu ne’ebe mak sura labele, atu hodi serbi ita nia rain no povu joven Timor-Leste tomak.

Lere mos hateten katak iha esperansa boot ba VIII Governu Konstituisional ne’ebe sei mai, kontinua halo ida ne’e iha sira nia ukun iha tinan lima nia laran, tanba sei iha veteranus, sarjentu sira ne’ebe mak servisu makaas no ativu hela iha instituisaun FFDTL.

“Estadu tenke rekonnese sira nia sidadaun ne’ebe hatudu nasionalismu no patriotismu ne’ebe as tebes. Rekonnese no valoriza sira ne’ebe mak uluk la moris susar no terus, ho ideologia politika ketak-ketak, tanba sa mak labele renkonnese maluk Timor oan ne’ebe terus no kompremete nia an ba rai no fo ba povu doben ida ne’e. Atu halakon justisa social iha Timor-Leste, estadu Timor-Leste tenke valorize herois sira ne’ebe mate, valorize no tau matan ba sira ne’ebe sei moris hosi jerasaun ba jerasaun, ida ne’e mak garante ba estabilidade no dezenvolvimentu ba rai doben Timor-Leste”, hateten Lere.

iha seremonia ida ne’e hetan partisipasaun hosi veteranu no vetarana sira, Primeiru Ministru, Prezidente Parlamentu Nasional, membru governu no membru parlamentu sira. * [ Zevonia Vieira | TAFARA.TL | 07.06.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Sistema Online Iha Klinika Becora, Fasilita Inan Isin Rua Sira

Saude nudar seitor importante iha ema ida nian moris, ho saúde ne’ebe diak sei salva …

Leave a Reply

Your email address will not be published. Required fields are marked *