Wednesday , June 19 2019
Home / Sosial & Politika / Lú Olo: Estadu Iha Dever Liu Hosi Polisia, Defende Sidadaun Nia Direitu no Seguransa Rai Laran
Prezidente da Republika lidera seremonia insar bandeira iha aniversariu PNTL ba dala 18 iha Akademia PNTL Comoro. [Foto: Media PR | 27.03.2018}

Lú Olo: Estadu Iha Dever Liu Hosi Polisia, Defende Sidadaun Nia Direitu no Seguransa Rai Laran

“Mai ita hamutuk hametin ita nia espiritu de sakrifisiu ho hanoin ida katak, ita mak nain ba rai ida ne’e, ita tenke tane aas independensia ida ne’e nia valor, labele fo espasu ba se deit, ne’ebe hakarak kria estabilidade, liliu iha ambitu eleisaun antesipada ida ne’e”. Julio Hornai

Polisia Nasional Timor-Leste [PNTL] selebra nia aniversariu ba dala 18, liu hosi deskursu Prezidente da Republika, Dr. Francisco Guterres Lú Olo hateten ho orgullu boot nu’udar Prezidente da Republika, hodi hahii loron boot ida nee, hamutuk ho ita boot sira [PNTL. Red], tanba povu tomak hatene PNTL fo an tomak, ho haraik an no domin halao servisu atu kumpre misaun, fo seguransa ba hotu-hotu. Dala barak PNTLsira sakrifika an, hodi fo hakmatek ba rain Timor-Leste no povu mos bele moris ho laran metin no hakmatek, iha hela fatin ka iha fatin ne’ebe deit.

Lú Olo hateten serimónia ida ne’e importante tebes no iha signifikadu boot ba Timor-Leste. Liu hosi serimónia ida ne’e, bele fo hatene ba ema hotu katak instituisaun ida ne’e hakat dadaun ba oin ho ninia identidade no kbiit rasik.

“Hau hakarak saúda ita boot sira hotu, mane no feto maluk sira, ne’ebe loron-loron fo an tomak ba kauza publika, defende estadu de direitu demokratiku no liberdade ba ita ida-idak no ba ita hotu-hotu, no fo ita-boot sira nia kapasidade tomak, atu serve rai ida ne’e no serve maluk Timoroan hotu”, hateten Lú Olo

Iha seremonia aniversariu PNTL, iha polisia Akademia Polisia Komoro, 27/03, Prezidente Lú Olo hateten estadu ninia knaar boot ida mak oinsa garante seguransa ba ita nia ema no ba ita-nia rikusoin. Ita moris hatuir Estadu de Direitu Demokrátiku. Tuir Konstituisaun RDTL, ida ne’e signifika katak sidadaun sira iha direitu atu moris ho liberdade no seguransa. Nune’e, Estadu iha devér, liu hosi Polísia, atu defende sidadaun sira nia direitus, legalidade demokrátika no seguransa iha rai laran. Estadu iha devér atu harii kultura demokrátika kona-ba seguransa. Tenke harii sistema seguransa ida ne’ebe serve sidadaun sira, iha Timor-Leste, tuir lei haruka ho kontribuisaun hotu-hotu nian, “atu ita nia sistema seguransa iha susesu, sidadaun hotu tenke partisipa ho responsabilidade. Atu sidadaun sira partisipa ho laran metin, sira tenke fiar katak ita nia sistema fo duni seguransa ba ita hotu, maibe, garante seguransa laós deit kaer metin órden públika, proteje ita ema no ita nia riku soin no tau matan atu ita nia ambiente hakmatek nafatin no ita la iha perigu. Garante seguransa signifika mos kaer metin Ita nia Estadu no ita nia sistema direitu demokrátiku.

Liu hosi deskursu Xefe Estadu ne’e mos apelu katak Timor oan hotu hein no hakarak PNTL ida ne’ebe kaer metin Timor-Leste nudar país ida ne’ebe seguru, ne’ebe hatene taka dalan ba krime, tanen metin valór demokrátiku sira, tau matan ba direitus ema nian no ba instuituisaun demokrátika sira.

Prezidente da Republika husu ba membru Polisia sira hotu atu halo diferensa momoos entre prosesu krime no prosesu ne’ebe mak laós krime. Ita nia lei sira estabelese prosedimentu la hanesan kona-ba prosesu krime no prosesu ne’ebe laós krime. PNTL ninia lejitimidade no autoridade mai hosi ajente PNTL ida-idak, liuhosi ida-idak nia komportamentu loroloron. Polísia ida-idak ninia ko’alia no hahalok di’ak kontribui ba hasa’e ema nia respeitu no fiar ba instituisaun PNTL.

Tuir Xefe Estadu katak estratéjia Seguransa iha rai laran tenke hatuir Konseitu estratéjiku ba defeza no seguransa nasionál ne’ebe aprova foin lalais ne’e, hodi haklaken kompeténsias forsas no servisus seguransa nian, iha ámbitu sistema seguransa nasionál. Bainhira presiza, forsas seguransa bele simu tulun hosi forsas defeza, atu garante seguransa interna, tuir hanoin, prinsípius komplementaridade no regras instituisaun rua nian.

“Ha’u hakarak akompaña prosesu hadi’a no moderniza forsas no servisus seguransa nian, hamutuk ho órgaun soberania sira seluk, nune’e, ha‘u sei buka hakbit instituisaun sira seluk, atu servisu hamutuk, hodi haforsa di’ak liután seguransa, iha Timor-Leste, atu ema hotu bele hare’e momoos liután katak ita iha duni sistema seguransa diak ida”, espektativa Prezidente da Repbublika

Entretantu Komandante Jeral PNTL, Julio Hornai iha deskursu hatoo katak liu hosi seremonia ida ne’e, manifesta rekonnesementu estadu no gvoernu ba instituisaun halo hosi loron ba loron no afirma konta nafatin esforsu no dedikasaun elementu sira ne’ebe ho firmeza fo dedikasaun no determinasaun ba estabilidade no paz iha rai ida ne’e.

“Durante periodu ida ne’e, instituisaun PNTL lao hamutuk ho transformasaun ba ita nia sosiedade, buka atu servi ba publiku tuir prinsipiu ne’ebe hatur iha Konstituisaun katak atu defende legalidade demokratika no garante seguransa sidadaun sira nian no partidaria no la inklina ba grupu ida”, hateten Julio Hornai

Julio esklarese katak iprosesu dezenvolvimentu iha institusaun ida ne’e lao diak, mesmu lao neneik maibe tinan ba tinan sempre iha mudansas balun. Progresu hirak ne’e akontese tanba iha apoiu makaas hosi governu, liu hosi Ministru Interior no actual Ministru Defeza e Seguransa ne’ebe tutela ba pasta seguransa, tanba ne’e tenke fiar governu katak prosesu dezenvolvimentu instituisaun ba oin sei lao diak.

Julio fo hanoin katak PNTL nudar forsas seguransa ba rai ida ne’e, ho misaun klaru iha Konstituisaun RDTL, ne’ebe ema hotu tenke halo ho responsabilidade masimu. Alende ne’e iha Lei organika PNTL nian rasik, determina kompetensia hahu hosi komandante jeral to nivel eskuadras , ida ne’e regula ona iha regulamentu disiplinar PNTL.

Julio Hornai mos rekonnese katak maske instituisaun PNTL eziste tinan 18 ona, maibe iha buat balun ne’ebe sei lao ladiak iha individus membru PNTL, hodi hafoer instituisuan nia naran, maibe liga indisiplinar ida ne’e, suspensaun multas ba membru sira lao nafatin

“Situasaun ne’e hamosu kritikas barak husi sosiadade sivil no komunidade sira ba atetudi hirak ne’ebe temi ona. Kritikas hirak ne’e hatudu katak sosiadade sivil no komunidade iha domin ba instituisaun ida ne’e, hakarak institusaun ida ne’e nia ema serve nia povu ho dignu no respeita, tamba ne’e sira kritika atu hadia ida ne’e, ita simu hanesan balansu, ida hodi hadia instituisaun ba oin nafatin”, hateten Julio

Julio hatutan iha ambitu disiplina nian, komando PNTL kontinua hadia lalaok prosesu disiplinar ne’ebe aplika ba membrus PNTL, ne’ebe viola regras servisu no aplika sansaun dimisaun suspensaun tuir faktus ne’ebe komete. Kazu ne’ebe involve membru PNTL no FDTL, asina ona diretiva konjunta hodi kria ekipa konjuta, komando PNTL ho FFDTL asina ona diretiva konjunta hodi kria ekipa investigasaun, ba problema ne’ebe involve membrus PNTL ho FDTL nian, no nia rezultadu sei intrega ba komandu rua, hafoin kada komando foti medidas disiplinar tuir regulamentu disiplina ida-idak nian.

Komandante PNTL ne’e  rekomenda ba governu, hodi tau importansia ba situasaun instituisaun seguransa nian, hodi halo kolokasaun orsamentu annual tenke diferente ho sira seluk, hodi hadia kondisaun ne’ebe dignu ba membru sira, utiliza halao sira nia knaar, tanba defisil atu hatudu sira nian profesionalismu, bainhra kondisaun servisu nia la favorese.

Komandante Julio mos apela ba nia membru PNTL sira liga ho eleisaun antesipada ne’ebe besik ona, hodi mantein estabilidade no paz.

“Hau husu ba membrus PNTL tomak feto no mane, husi nasional to ba iha baze, atu servisu makaas, sakrifika aan nafatin, hodi asegura nafatin estabilidade no paz iha teritorio laran tomak, nune ita nia komunidade bele avontade partisipa iha festa demokrasia ida ne’e. Mai ita hamutuk hametin ita nia espiritu de sakrifisiu ho hanoin ida katak, ita mak nain ba rai ida ne’e, ita tenke tane aas independensia ida ne’e nia valor, labele fo espasu ba se deit, ne’ebe hakarak kria estabilidade, liliu iha ambitu eleisaun antesipada ida ne”e”, esperansa boot hosi Julio Hornai

Iha loron aniversariu ida ne’e tuir observasaun TAFARA.TL hatudu katak hetan partisipasuan hosi membru governu sira Kapolri Nusa Tenggara Timur [NTT], Xefe BNN, korpu diplomatiku sira no familia PNTL. * [ Virginia Pereira | Editor: Zevonia Vieira | TAFARA.TL | 27.03.2018 ]

About Virginia Pereira

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *