Monday , March 25 2019
Home / Sosial & Politika / Lú Olo: Estadu Tenke Halo Knaar Importante Ba Ekonomia, Presiza garante Bens no servisu Publikus
Prezidente da Republika, Dr. Francisco Guterres Lú Olo hatoo mesajen povu Tomak .[Foto: Media gabinete Prezidente da Republika].

Lú Olo: Estadu Tenke Halo Knaar Importante Ba Ekonomia, Presiza garante Bens no servisu Publikus

“Estadu tenke haree oinsa mak bele asegura finansiamentu ba despeza públika liu hosi reseitas hosi setór naun-petrolíferu ka liu hosi empréstimu. Maibé tusan ne’ebé de’it labele liu, Ita tenke preokupa maka’as ho difikuldade finanseira Estadu nian”. Lú Olo

Ekonomia nudar seitor importante iha nasaun ne’ebe mak foin hetan nia liberdade, hosi okupasaun Indonesia. Liu hosi deskursu Prezidente da Republka, Dr. Francisco Guterres Lú Olo, iha uma fukun Parlamentu Nasional hateten katak, iha prosesu harii Estadu no Nasaun, Timor-Leste hili ekonomia nakloke ba merkadu ho intervensaun husi Estadu. Maibé presiza hahú hanoin klean, se opsaun ida ne’e fó ka lae servisu di’ak ida ba sosiedade ho kondisaun no karaterístika ne’ebe ita iha ohin loron.

Lú Olo deklara katak Estadu ida ne’ebe depende de’it ba rekursu ida, minarai no gás, ne’ebé loron ruma sei hotu, ne’ebé uza rekursu ne’e no halo sidadaun no sosiedade sira, sai dependente hosi riku soin ida ne’e.

“Tuir ha’u-nia hanoin, Estadu ne’e la tuir polítika dezenvolvimentu sustentável. Ita-nia sosiedade rasik, ohin loron, hatoman-an dadaun ona atu simu de’it benefísiu no simu liu tán, ohin kedas, husi riku soin ne’e, biar dalan ida ne’e ladi’ak ba ita-nia futuru.Estadu no sosiedade gasta no uza kedas, la hala’o investimentus produtivus, la hamosu rikeza ohin loron, atu ita bele sustenta-an, ho dignidade, iha tempu tuir mai kedas”, hateten Lú Olo iha sesaun solene dahuluk, 17/09

Prezidente da Republika hateten katak Ita tenke haree ba ita-nia an, nu’udar sidadaun ho responsabilidade istórika, atu luta ba kaer metin no haburas babeibeik Estadu no Sosiedade timorense, “ita haree momoos hela katak, ita-nia Estadu tenke hala’o nafatin knaar importante ba ita-nia ekonomia. Estadu Timor -Leste presiza garante nafatin bens no servisus públikus ba sidadaun sira, ba empreza sira no presiza hatama rekursus husi Fundu Minarai iha ita-nia ekonomia. Presiza harii mós kondisaun sira ne’ebé fó fatin, ba haburas ekonomia diversifikada no sustentável, katak mai husi rekursu oioin, ita bele uza ba beibeik, atu bele kore-an husi ekonomia ida ne’ebé depende de’it husi minarai no gás”.

Eiz Prezidente Parlamentu Nasional ne’e mos fo hanoin fila fali membru parlamentu nacional sira katak kontas nasionais, nota katak hosi soren ida, ritmu kreximentu ekonomia nasional parese iha relasaun maka’as ho volume despezas públikas, liuliu ho orsamentu ne’ebé konsegue ezekuta. Sektór privadu formal sei fraku tebes no emprega ema, ho idade servisu, la to’o désimu ida hosi populasaun total, katak, fó servisu de’it ba ema 6000 resin liu oituan. Ita-nia ema hala’o liuliu servisu agrikultura nian, iha atividade informál ho produtividade kiik no saláriu mos kiik.

Hosi deskursu Prezidente Lú Olo esplika katak liu hosi Taxa kreximentu Produtu Internu Brutu [PIM], iha tinan sira ne’ebe volume investimentus as tebes, taxa kreximentu PIB mós bele aas tebes, hanesan akontese iha 2016. Nune’e, iha tinan ne’e, PIB naun-petrolíferu sae 5.3% tamba investimentu públiku hetan kreximentu 40%. Bainhira volume investimentus públikus tun, ekonomia naun-petrolífera bele tun tebes hanesan akontese iha 2014 no 2015, tamba kreximentu ekonomia sae de’it 4%. Iha tinan 2013, tamba investimentu públiku kiik tebes, kreximentu naun-petrolíferu sae to’o de’it 2.5%.

Situasaun ida ne’e akontese fila fali iha 2017. Iha tinan ne’e, ekonomia nasional tun oituan ho taxa kreximentu mos tun-sae entre 3% no 3.5%, tuir estimativas husi Fundu Monetáriu Internasionál no Banku Sentrál.

Tuir Lú Olo dadus ne’ e hatudu katak, hatama rekursus husi Fundu Petrolíferu iha ekonomia la’ós ona modelu kreximentu ne’ ebé bele kaer nafatin. Rekursus ne’ebé iha ohin loron sei lató, iha momentu ne’ebé de’it, atu hasoru dezafiu sira ne’ebé iha, ohin loron atu harii ita-nia Estadu no tau matan ba ita-nia sidadaun sira.

Eiz estudante Universidade Timor-Lorosa’e ne’e mos esplika katak investimentus públikus la depende de’it husi kapasidade atu gasta osan iha rai-laran, maibé depende mós ba oinsá uza finansas públikas ba tempu naruk. Importante hatete katak entre tinan 2012 no 2017, hare’e ba ezekusaun ne’ebé konsegue hala’ o duni, ita gasta $US 7,700.70 biliaun, husi total $US 9, 800.63 billaun.

“Ezekusaun orsamentál iha períodu ne’e, en-média, to’o de’it 79%, tuir informasaun hasai husi Portál Transparénsia Ministériu Finansas. Iha tinan ida ne’e. Iha fulan 8 nia laran ho rejime duodésimu, ho rekursus finanseirus ne’ebé ladún iha, kapasidade ezekusaun orsamentál kiik mós, no ezekuta de’it, en-média, besik 65%”, esplika Lú Olo

Tuir dadus ne’ebe Lú Olo esplika katak Fundu Petrolíferu, harii iha 2005, fó rendimentu ne’ebé permite, hodi uza ba finansia Estadu ninia funsionamentu no aplika ba investimentus ne’ebé presiza atu harii kondisiun sira ne’ebé lori dezenvolvimentu no moris-di’ak ba sosiedade timorense, ho respeitu ba kritériu Rendimentu Sustentável Estimadu.

Maibe tuir Lú Olo aplika osan husi Fundu Minarai ba despeza sira ho montante liu fali Rendimentu Sustentável Estimadu. Entretantu, la hamosu dalan sira seluk ne’ebé bele garante finansiamentu públiku, investimentu privadu no kapasidade atu hamosu rikeza liu hosi ekonomia diversifikada.

 ita-nia ekonomia la’ ós sustentável. Ita iha de’ it fundu soberanu ida, mak Fundu Minarai ne’ebé ita harii tuir artigu 139 Konstituisaun Repúblika. Artigu ne’e obriga ita uza rekursu naturál loloos no hanesan de’ it ba ema hotu no haruka kria rezerva finanseira obrigatória, hodi rendimentus hosi eisplorasaun, tuir interese nasionál. Lei Fundu Mina-Rai la’o tuir menon sira-ne’e no haktuir objetivus katak halo jestaun di’ak ba rekursus idrokarbonetus, fó benefísiu ba jeraşaun ohin-loron no aban-bainrua nian no sai matadalan ba polítika fiskál di’ak. Atu sai sustentável, ita tenke konta ho ita-nia kbiit rasik no haree mós oinsá ita uza rekursus renováveis, Ita hotu hatene ona katak mina-rai iha kampu Bayu-Undan besik hotu no ita seidauk hatene los bainhira mak ita bele hahú esplora Greater Sunrise”, hateten Lú Olo

Lú Olo mos deklara katak, estadu tenke haree oinsa mak bele asegura finansiamentu ba despeza públika liu hosi reseitas hosi setór naun-petrolíferu ka liu hosi empréstimu. Maibé tusan ne’ebé de’it labele liu, Ita tenke preokupa maka’as ho difikuldade finanseira Estadu nian, ne’ebé sei boot ba beibeik aban bainrua. * [ Zevonia Vieira | TAFARA.TL | 17.09.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Prezidente da Republika Promulga OJE 2019

Prezidente da Repúblika, Dr. Francisco Guterres Lú Olo, ohin, promulga Lei N. 5/V-Orsamentu Jerál Estadu …

Leave a Reply

Your email address will not be published. Required fields are marked *