Tuesday , May 21 2019
Home / Sosial & Politika / Lú Olo: Forsas Defeza No Pais La Haluha Falintil, Lere: Atu Halo EA, Forsas Armada Mantein Neutralidade
Serimónia Aniversáriu FALINTIL-FDTL ba dala 17. [Foto: Virginia Pereira | 02.02.2018]

Lú Olo: Forsas Defeza No Pais La Haluha Falintil, Lere: Atu Halo EA, Forsas Armada Mantein Neutralidade

“Atu iha páz ba bebeik, ita presiza hatene oinsá defende páz. Atu defende paz, ita presiza forsas armadas. Pais ida ne’ebe ita mehi no hakarak, tenke iha forsas armadas ida ne’ebe hetan fiar hosi ema hotu, ho ekipamentu no kualifikasaun atu kumpre ho diak ba ninia misaun”, Lú Olo

Falintil Forcas Defeza Timor-Leste [F-FDTL], harii, nudar instituisaun, tinan 17 liu ba, hanoin hikas momentu istoriku ida ne’ebe akontese iha Aileu iha tinan 2001. Instituisaun ida ne’e harii iha rai doben Timor-Leste, hafoin Falintil no povu Timor-Leste halao rezistensia metin, durante tinan 24 nia laran, ho dedikasaun no espiritu patriotiku, biar la simu apoiu military hosi rai liur no moris iha susar nia laran. Prezidente da Republika, Dr. Francisco Guterres Lú Olo, hatoo lia fuan ida ne’e, iha loron Falintil nian ba dala 17, iha kuarter jeral F-FDTL, 02/02.

“Ita fo hanoin fila fali ita nia domin ba ita-nia rai doben, no ita nia espíritu unidade nasionál. Ita hotu haksolok ita nia pasadu ho orgullu. Pasadu ida ne’ebe kesi ita hamutuk nudar povu no fo hanoin beibeik, valór sira ne’ebe lori ita harii Timor-Leste, nudar nasaun livre, soberanu no independente. Hau fo hau nia saudasaun espesial ba veteranus no maluk hotu ne’ebe haka’as an, ho laran luan no dedikasaun rohan laek, hodi tanen Falintil durante itania luta hodi kore Pátria no Povu. Tanba asua’in sira ne’e, mak ita iha F-FDTL ohin loron. instituisaun ida ne’ebe lori Istoria luta nian no hametin an, nudar instituisaun estadu nian, atu defende ita hotu. Forsas Defesa no País tomak la haluha Falintil”, hateten Lú Olo

Iha seremonia refere, Lú Olo hateten katak estadu atu garante seguransa no moris diak ba ema hotu. Timor-Leste nudar pais ida ne’ebe halo povu hotu sente orgullu, nudar nain ba rai ne’e, presiza ema ho formasuan sivika, ema ne’ebe bele azuda ganrate ema hotu nia seguransa, moris diak no kaer metin identidade nudar Timor oan.

Xefe Estadu fo hanoin katak, forsas armadas nudar riin principal nasaun ida ne’e nian, nudar eskola ba virtudes no ba sidadania, nudar instituisaun ne’ebe garante soberania no defeza ba rai doben ida ne’e. Halao funsaun social importante ba vijilansia, atu hasess no korije factor sira ne’ebe hamenus ita nia dignidade no bolu bebeik atensaun, atu tanen as valores sira ne’ebe identifika ita nudar Timor oan.

“Atu iha páz ba bebeik, ita presiza hatene oinsá defende páz. Atu defende paz, ita presiza forsas armadas. Pais ida ne’ebe ita mehi no hakarak, tenke iha forsas armadas ida ne’ebe hetan fiar hosi ema hotu, ho ekipamentu no kualifikasaun atu kumpre ho diak ba ninia misaun, atu tau matan ba teritoriu nasional ida ne’ebe kompostu ho rai keta-ketak. Ita-nia area tasi luan tebes no ita presiza hare’e mos oinsa ita proteje no hala’o esplorasaun atu bele uza ho diak rikusoin tasi nian ba tempu naruk”, hateten Lú Olo.

Liu hosi deskursu Prezidente da Republika, iha loron selebrasaun FFDTL ba 17, apela ba forsas armadas atu servisu liutan no reforsa bebeik prinsipiu kultura militar nian, nudar riin sira ne’ebe tanen. Instituisaun militar ida ne’ebe forte no importante ba ita-nia identidade no unidade nasiona, “ha’u hare ba futuru Timor-Leste nian ho fiar, tanba ita-nia povu ninia brani no determinasaun mak ita halo istória. Ho istória ida ne’e, mak ita sei hatutan ita nia afirmasaun nudar povu no nudar nasaun”.

Iha fatin hanesan, Xefe Estado Major-Jeneral F-FDTL, Lere Anan Timur, liu hosi deskursu hatoo katak Falintil forsa gerilha nian, ne’ebe lori rai Timor-Leste ba libertasaun nasional, transforma ka nakfila ba forca convensional no profesional iha tempo ukun rasik an nian Falintil Forcas de Defeza de Tmor-Leste [F-FDTL] Iha tinan 2000.

“Ita nia Forsas da defeza ho tinan 17, nia ezistensia iha diak no at. Nia diak ita hametin no dezenvolve diak liutan, ne’ebe at ita foti lisaun, moris lao ba oin nafatin. Ita tenke investe nafatin ba future ho kbiit no enerjia tomak. iha tinan 2016, ita hahu transfere lideransa ba jerasasun foun, iha parte operasional nian, konfiansa ba jerasaun foun, implika katak tenke iha inicsativa barak, husi komandantes jerasaun foun sira. Tempo iha ailaran, komandante das unidades, sira sobrevive, hamoris nafatin rezistensia armada ho sira rasik nia inisiativa. Sira la depende tomak ba komandante iha munisoes no armamentu, maibe konsege duni lori rai no povu ne’e ba independensia. Ami hakarak fo hanoin nafatin ba jerasaun foun sira, ba komandantes de komponentis no unidades, atu hatene idak-idak nia knaar, labele haluha idak-idak nia responsabilidade no labele hakat liu imi nia kompetensia, regras no regulamentus sira”, hateten Lere.

Lere fo hanoin katak defeza no segurana nia konseitu ne’ebe luan, katak seitor hotu-hotu, estadu no sosiadade nian iha responsabilidade servisu hamutuk, hodi kontribui ba justisa, paz, estabilidade, hametin valeres tradisional no uma kain nian

“Disiplina wainhira halao misaun, sei lori ita atu hetan duni rezultadu masimu, no ita bele to duni objektivo sira.   Ita presiza fo arquertelamentu ne’ebe dignu ba militares sira. Ita mehi atu hari hospital militar, ita hein katak mehi ne’e sai mos realidade. Konaba modernizasaun forcas armadas nian, ami husu ba governu atu halao dadaun ona, tuir possibilidade ne’ebe iha, maibe tuir ezijensias ne’ebe mosu, laos atu halao dala ida deit, maibe hahu halao dadaun ona”, tenik Lere

Lere afirma liutan katak iha Konstituisaun hatete momos katak F-FDTL labele involve iha partidu politiku no rona deit orgaun soberanu tuir kompetente sira nian.Timor-Leste atu halo eleisaun antesipada, forsas armadas tenke mantein nian neutralidade nudar liman kroat povu nian, hanesan uluk Falintil mantein nia pozisaun de neutralidade. Mai hamutuk kaer nafatin valores Falintil nian, buka solusaun ne’ebe diak liu, hodi dezenvolve rai doben ida ne’e no hametin nafatin estabildade nasional.

Entretantu veteranu, Sebastioa Soare, ho naran kodiku “Maucuri”, mai hosi municipiu Manatuto, ba TAFARA.TL hateten haksolok tebes tanba iha tinan 2015, reforma hosi FFDTL, ho instituisaun ne’ebe mak hari hosi Falintil sira durante tinan 24 nia laran.

“Ohin loron hau haksolok no fo lia menon ba joven no estudante sira, mantein pozisaun hodi hakmatek iha ita nia fatin, hare ita nia atividade, apoiu ita nia aman sira, no garante katak sei hetan solusaun ne’ebe diak”, tenik Sebastio.

Tuir observasaun TAFARA.TL, liu hosi seremonia ne’ebe dirizi hosi Prezidente Republika no nudar Komandante Supremu Forsas Armada lao ho hakmatek. Hetan partisipasaun hosi membru governu, PNTL, no Jeneral Gato Nurmantyo ho nia esposa hosi Indonesia, Brigadeiro Jeneral Australia, Tanenti Koronel, Luis Bernadino, Profesor Dr. Nunu Canas Mendes hosi Portugal, veteranus no media sira. *[Virginia Pereira | Editor: Zevonia Vieira | TAFARA.TL | 02.02.2018]

About Virginia Pereira

Check Also

Governu Japaun Inagura Renovasaun Eskola Hospitalidade no Turismo, Minami: TL Presija Rekursu Umanu Kualifikadu Iha Area Turismo

“Atu bele atrai turista internasional, Timor-Leste presija investe maka’as liu iha setor infrastrutura, atu bele …

Leave a Reply

Your email address will not be published. Required fields are marked *