Monday , October 22 2018
Home / Sosial & Politika / Lú Olo Husu Servisu Fo Laran Ba Povu, Espiritu Servisu Ho Haraik an No Laran Moos
Prezidente da Republika, Dr. Francisco Guterres Lú Olo simu sapeo no kamizola hosi Jose AMX Gonsalves. [ Foto: Zevonia Vieira | 17.03.2018 ]

Lú Olo Husu Servisu Fo Laran Ba Povu, Espiritu Servisu Ho Haraik an No Laran Moos

“RENETIL laos deit instrument importante ida luta nian. RENETIL sai mos eskola ida ba sidadania no nasionalizmu. Eskola ida ne’ebe tulun kapasita jerasaun foinsa’e sira ne’ebe boot durante tempu okupasaun nian”. Lú Olo

Prezidente da Republika, Dr. Francisco Guterres Lú Olo iha kongresu dahituk RENETIL nian, hateten RENETIL nia lalaok iha universidade barak Indonezia nian kontribui mos ba fo hatene ba povu Indoneziu konaba povu maubere nia luta atu hetan direitu ba autodeterminasaun no independensia.

Tuir Lú Olo katak RENETIL nia relasaun kooperasaun no amizade ho organizasaun sira ne’ebe luta atu hatuur demokrasia iha Indonezia hatusu valor boot ida hosi povu nia rezistensia, “ita luta hasoru okupasaun, hasoru violasaun dignidade povu nia, ita laos luta hasoru povu Indoneziu, tanba ita nia luta, ba ita nia autodeterminasaun no liberdade, ita kontribui mos ba povu Indonezia atu hetan sira nia liberdade”.

Xefe Estadu ba kongresista sira hateten katak RENETIL laos deit instrument importante ida luta nian. RENETIL sai mos eskola ida ba sidadania no nasionalizmu. Eskola ida ne’ebe tulun kapasita jerasaun foinsa’e sira ne’ebe boot durante tempu okupasaun nian.

“Hare ba lalaok tinan 30 liuba, ita bele dehan katak RENETIL sai eskola diak ida. Ohin loron membrus RENETIL barak halao knaar ho responsabilidade aas tebes iha estadu no universidade sira, fahe ba partidu politiku oin-oin, sai kuadru tekniku kualifikadu no esperiente ne’ebe ita nia rain presiza tebes. Timor-Leste presiza kuadru nasional hotu atu lori ba oin ita nia planu nasional sira ba dezenvolvimentu. Ita hotu tenke partisipa, ita labele hasees ema ida. Ida ne’e mak ita nia nesesidade boot liu ohin loron. Timor-Leste presiza mos jerasaun mos nasionalista sira ne’ebe mai hosi RENETIL. Presiza ita boot sira nia esperiensia no matenek teknika atu tulun hametin estadu no haburas ekonomia nasional, liu-liu atu haburas lalais ekonomia diversifikadu no sustentavel, hodi bele garante povu nia moris diak ba ohin loron no ba jerasaun tuir ita boot sira”, hateten Lú Olo

Prezidente Lú Olo hatoo lia menon ba kongresista sira katak tenke buak fo liman ba malu, fahe liutan matenek ba malu, haree hamutuk oinsa haburas lalaok iha area akademika, iha setor emprezarial, oinsa hadia mos servisu publiku sira, oinsa hasae kualidade infrastrutura, edukasaun no saude nian. Atu bele hetan buat sira ne’e hotu, presiza investe iha kualidade ensinu no edukasaun no hatene hasai lisaun hosi ita nia esperiensia rasik. Tenke hatene oinsa uza matenek hosi Timor ona hotu.

“Hau apela bebeik ona ba partisipasaun veteranu sira nian hodi tulun lorit ita nia nasaun ba oin, inklui mos jerasaun RENETIL nian ne’ebe halibur sidadaun barak ho esperiensia, maturidade no kualifikasaun teknika. Ita nia rain presiza tan buat ida, esperitu servisu ho laran tomak. Durante okupasaun jerasaun RENETIL fo an tomak no simu sakrifisiu oioin atu Timor-Leste afirma an nudar nasaun no povu ho identidade rasik. Ba veteranu sira, atu kaer metin valor sira ne’ebe lori nasaun Timor-Leste ba vitoria hanesan fo laran ba povu, espiritu servisu ho laran tomak no haraik an no laran moos”, hateten Lú Olo.

Iha situasaun politika ne’ebe agora la dadauk Lú Olo hatoo katak presiza nakfila valor sira rezistensia nian, atu say matadalan no dada juventude sira atu ajuda apoia estadu ida ne’ebe moos, ho ema ne’ebe hakaas an ba estuda no servisu ho responsabilidade hosi idak-idak atu iha future diak liu. Ba sidadaun hotu atu servi povu, hametin fiar no hametin nasaun. *[ Zevonia Vieira | TAFARA.TL | 17.03.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

MOFFE – CAUCUS Realiza Treinamentu Ba PARPOL, Marcelina: Hau nia Kontribuisaun Iha Partidu Importante

“Feto sira iha partidu laran halo mos servisu barak ba partidu nia susesu. Hau hakarak …

Leave a Reply

Your email address will not be published. Required fields are marked *