Lú Olo: Juventude La Hakarak Promesas no Hakribi Atitude Koruptu

Hau fiar katak joven sira iha talentu atu hamosu no habelar idea foun no tau iha merkadu produtu foun tuir nesesidade merkadu, bele halo jestaun diak ba sira nian negosiu no hetan rendimentu rasik”. Lú Olo

Juventude loriku aswain hatudu ona sira nia aten brani, hatudu sira nia hirus matan ba tropas Indonesia katak lakohi sai atan tan ba ukun kolonialismu. Juventude loriku aswain kontribui ona ba ukun rasik an, maske tenke lakon sira nia vida maibe sira nungka hakiduk hodi hapara sira nia luta ba rai doben ida ne’e.

Tinan 27 ona Timor-Leste komemora loron masakre 12 Novembru, ohin loron juventude sira kontinua kontribui ba dezenvolvimentu no kontinua hatutan lia menon sira ne’ebe loriku aswain sira husik hela ba. Liu hosi deskursu Prezidente da Republika, Dr. Francisco Guterres Lú Olo hateten juventude ohin loron hasoru dezafiu oioin, juventude presiza banati tuir ezemplu hosi lider sira. Juventude la hakarak promesas no lia fuan sira. Juventude hakribu attitude ne’ebe koruptu.

Tuir Prezidente Lú Olo ohin loron estudante rihun ba rihun mak hetan graduasaun tinan-tinan hosi universidade, iha area oioin no balu seluk remata kursu vokasional. Maioria joven buka mak servisu publiku, maibe estadu laiha kbiit atu fo servisu ba ema hotu ne’ebe remata kursu universitariu ka formasaun vokasional ka ensinu sekundariu. Ho nune’e joven sira tenke buka dalan seluk atu oinsa hetan rendimentu atu sustenta an no familia sira. Ida ne’e signifika katak joven idak-idak tenke buka dalan atu sai empreendedor.

“Atu sai empreendedor joven tenke fiar an, iha talentu, kapasidade atu foti desizaun, determinasaun atu hakat dezafiu ne’ebe deit no iha kbiit finanseiru rasik no simu intensive ruma atu fila-liman no moris ho kbiit rasik. Hau fiar katak joven sira iha talentu atu hamosu no habelar idea foun no tau iha merkadu produtu foun tuir nesesidade merkadu, bele halo jestaun diak ba sira nian negosiu no hetan rendimentu rasik”, hateten Lú Olo

Liu hosi komemorasaun masakre 12 Novembru, Prezidente Lú Olo mos informa katak iha ona inisiativa oioin atu habelar empreendorismu iha Timor-Leste. Knua Juventude Fila-Liman, ne’ebe UNDP harii nudar centru juventude integradu ida ba inovasaun no empreendorismu, fo dadaun hela formasaun. VI Governu lansa centru refere iha loron 15 Agusto 2017 no joven 400 mak simu ona formasaun hosi Knua Juventude iha tinan ida nia laran.

Lú Olo husu ba entidade relevante sira no governu, presiza haree ho BNCTL oinsa fo tulun ba joven empreendedor atu hahu negosiu kiik, ho tulun hosi linha de kreditu ida ne’ebe la obriga selu kedas ka selu ho juru kiik

“Ita hotu tenke tau atensaun ba juventude, hatene hatan ba sira nia nesesidade no kapasidade no hatan sira nia aspirasaun. Atu lori juventude ba moris diak, lider sira tenke umilde, iha espiritu atu servi interese povu nian, sai transparente iha asaun, atua hodi halakon kiak no hatene hatan ba ema umilde sira nia nesesidade. Politiku sira tenke halo esforsu atu hetan solusaun ba problemas povu nian”, hateten Lú Olo

Iha ikus Lú Olo hatoo lia menon katak futuru nasaun nian iha juventude sira nia liman, “hau tau fiar iha juventude, hau fiar katak imi hadomi nasaun ne’e. Hau fiar ba imi nia kapasidade atu servisu interese povu nian”. * [ Zevonia Vieira | TAFARA.TL | 12.11.2018 ]

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.