Wednesday , June 19 2019
Home / Sosial & Politika / Lú Olo: Labele Uza Fronteira Maritima sai materia kampanye, Lalika Koalia Hatun Malu
Prezidente da Republika, Dr. Francisco Guterres Lú Olo hatoo deskursu iha kongresu RENETIL iha CCD. [Foto: Media PR | 17.03.2018]

Lú Olo: Labele Uza Fronteira Maritima sai materia kampanye, Lalika Koalia Hatun Malu

“Kampanna ida agora dadauk ne’e, para atu hatoo deit programa politiku kada partidu idak-idak nian, atu ne’e povu hili, povu laos atu hili fali ida hatun no hasae malu. Povu presiza moris diak, hakmatek ho kondisaun ne’ebe diak, hanesan hau hatoo iha hau nia deskursu, tanba ne’e duni partidu politiku sira atu ba koalia ho povu tenke koalia ho jujur”. Lú Olo

Liga ho kampanna politiku ne’ebe besik ona, Prezidente da Republika, Dr. Francisco Guterres Lú Olo ba TAFARA.TL iha CCD 17/03 hateten, husu ba partidu no koligasaun sira atu hatoo programa politiku ba povu sira, laos atu hatun ka hasae malu iha kampanye.

“Kampanna ida agora dadauk ne’e, para atu hatoo deit programa politiku kada partidu idak-idak nian, atu ne’e povu hili, povu laos atu hili fali ida hatun no hasae malu. Povu presiza moris diak, hakmatek ho kondisaun ne’ebe diak, hanesan hau hatoo iha hau nia deskursu, tanba ne’e duni partidu politiku sira atu ba koalia ho povu tenke koalia ho jujur [honestu. Red], koalia lolos programa saida, edukasaun atu halo oinsa, saude atu halo oinsa no infrastrutura atu halo oinsa, atu nune’e bele sai servidor ba povu, no estadu ne’e atu metin liutan. Lalika ba koalia hatun malu no hasae malu, ida ne’e la serve ida”, hateten Lú Olo

Lú Olo reafirma liutan katak hanesan Xanana Gusmao hateten ona katak labele uza fronteira maritima ka negosiasaun ida ne’e sai fali materia kampanye partidu ida nian, tanba ida ne’e interese nasional nian, ne’ebe ema ka partidu ida labele uza ida ne’e, “hau hare tempu ida ikus antes ita nia maun Xanana to mai, balun-balun komesa uza ona hanesan bukai politiku, maibe ne’e labele hau hatete ba partidu hotu labele uza ida ne’e. Buat ida interese nasional nian no interese grupu nian la hanesan, ita labele halo konfuzaun ba ida ne’e. povu agora ne’e matan moos tiha ona”.

Liu hosi kongresu RENETIL ba dahituk mos, Prezidente Lú Olo hatoo nia lia menon katak hafoin restaurasaun independensia, ita harii estadu no hametin respeitu ba dignidade, direitu no liberdade ba sidadaun hotu, maibe atu afirma bebeik Timor nudar nasaun no identidade nasional, tenke dezenvolve rai ida ne’e no hadia kondisaun moris ba povu tomak.

“Ita nia demokrasia lori ona respeitu ba dignidade, mori hakmatek no seguransa. Maibe demokrasia laos deit atu ita hetan direitu, atu hili ita nia lider sira kada tinan lima. Demokrasia ne’e loke dalan ba direitu hotu ne’ebe Konstituisaun RDTL fob a sidadaun sir, liu-liu direitu sidadauk sira nian atu moris diak liu iha ita nia rain”, hateten Lú Olo.

Xefe Estadu ne’e mos hateten respeitu ba Timor-Leste nia naran iha mundu, depende ba kapasidade atu uza restaurasaun independensia nudar instrument ba ita nia unidade, hodi servi povu nia moris diak. Objetivu ida ne’e ezije espiritu servisu hosi sidadaun sira, hosi lider sira no ita hotu, hodi bele harii nasaun ida buras liu, forte liu no seguru liutan. Estadu tenke tanen aas sidadaun sira nafatin.

“Nudar ema ira hotu hakarak servisu hodi hadia ita nia moris ni ita nia familia, tanba ne’e ita servisu hodi dezenvolve nasaun no harii ekonomia ida ne’ebe serfikadu no sustentavel, maibe ita presiza hatene haketak saida ma interese nasional no saida mak laos”, tenik Lú Olo. * [ Zevonia Vieira | TAFARA.TL | 19.03.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *