Saturday , May 26 2018
Home / Sosial & Politika / Lú Olo: RENETIL Halibur Foinsa’e Sira La Haree Ba Kór Politiku, Lasama Nia Memoria Tenke Dada Nafatin Juventude Ohin Loron
Prezidente da Republika, Dr. Francisco Guterres Lú Olo iha kongrese RENETIL dahituk iha CCD. [Foto: Zevonia Vieira | 17.03.2018]

Lú Olo: RENETIL Halibur Foinsa’e Sira La Haree Ba Kór Politiku, Lasama Nia Memoria Tenke Dada Nafatin Juventude Ohin Loron

“La Sama nia determinasaun, kapasidade no aten brani mak halo saudozu La Sama sai ezemplu id aba nia maluk foin sa’e sira durante luta ba libertasaun nasional. La Sama nia memoria tenke dada nafatin juventude ohin loron nian, atu partisipa iha prosesu hadia ba bebeik kondisaun moris ba povu tomak, ohin loron no aban bainrua”. Lú Olo

Prezidente da Republika, Dr. Francisco Guterres Lú Olo hatoo mesajen ba membru RENETIL sira iha kongresu ba loron tolu nian iha CCD, Dili. Iha Prezidente Lú Olo nia diskursu hateten katak RENETIL harii nudar frente foun ida ba povu nia rezistensia. Iha tinan 1988, matebian Prezidente Indonesia Suharto nia rejime buka hatudu ba mundu katak Timor-Leste hakmatek ona no povu moris iha paz nia laran, maibe bainhira rejime Indonezia dehan katak sira hamate tiha ona luta armada, nasionalista Timoroan sira lori rezistensia ba okupante sira nia uma laran, bainhira RENETIL iha Jakarta.

“RENETIL halibur foinsa’e sira la haree ba kór politiku no hakfila universidade Indonezia sira iha Bali no Java, ba sentru asaun politika organizadu hasoru okupasaun Timor-Leste nian. Iha tinan tutuir malu, RENETIL nia hahalok aten brani ajuda ita nia diplomata no ativista halao servisu diak liutan, iha Frente esterna. Nune’e mos frente esterna nia servisu ajuda mos RENETIL habelar lutan sira nia hahalok, hamutuk ho organizasaun oin-oin juventude no ho frente politika, klandestina no armada iha teritoriu laran”, hateten Lú Olo

Iha CCD 17/03, Lú Olo hatutan katak servisu hamutuk ida ne’e, liu hosi fo hanoin ba malu, hosi ita nia frente oin-oin no ho lideransa nasional mak sai fator estratejiku ba povu nia manan luta libertasaun nasional, lori povu Timor ba vitoria, “ita nia luta ida deit, lider hosi komandu politiku military ida deit, iha rezistensia armada no ita kore an duni hosi okupasaun estranjeiru. Tanba lider sira hamutuk, tuir objetivu hanesan mak ita konsege taka dalan ba rejime Prezidente Suharto nian no nune’e ita konsege dada komunidade internasional atu apoia ita nia libetasaun no kiuks mai ita konkista direitu ba referendu no ita nia restaura independensia”.

Lú Olo mos hatoo katak referendum mak dalan ne’ebe povu hetan nudar solusaun politika liu hosi negosiasaun ne’ebe hatuur tuir legalidade internasional ba Timor-Leste. Ida ne’e mak akontese duni iha tinan 1999 bainhira maioria povu, vota hasoru autonomia ho Indonezia.

RENETIL harii iha loron 20 Juñu 1988, Tinan ida ne’e sei komemora aniversariu RENETIL nian ba dala 30. Hamutuk ho RENETIL, Prezidente Lú Olo hanoin hikas fali memoria saudozu fundador Fernando La Sama de Araújo nian. La Sama nia determinasaun, kapasidade no aten brani mak halo saudozu La Sama sai ezemplu id aba nia maluk foin sa’e sira durante luta ba libertasaun nasional. La Sama nia memoria tenke dada nafatin juventude ohin loron nian, atu partisipa iha prosesu hadia ba bebeik kondisaun moris ba povu tomak, ohin loron no aban bainrua. * [ Zevonia Vieira | TAFARA.TL | 17.03.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Ran Ema Ida nian, Sei Salva Ema Ida nia Vida

Importante ida ba hau, e hau bele salva hau nia an mos no mos bele …

Leave a Reply

Your email address will not be published. Required fields are marked *