Lú Olo: Rota do Sândalo Sei Promove Komérsiu no Turismu Iha RAEOA

Transporte aéreo loke dalan ba kresimentu no desenvolvimentu ekonómiku. Meiu transporte ida ne’e sei fasilita integrasaun enklave ida ne’e iha ekonomia rejionál no internasionál”. Lú Olo

Prezidente da Republika, Dr. Francisco Guterres Lú Olo partisipa iha aniversariu RAEOA no inagurasaun Aeroporto internasional Rota Sândolo iha Rejiaun Administrativa Espesiál Oé-Cusse Ambeno (RAEOA). Liu hosi deskursu Prezidente da Republika hatoo katak Oé-Cusse hanesan fatin istóriku ida hosi ita-nia país Timor-Leste.

Iha duni rai ida ne’e mak iha tinan atus lima liu bá dominikanu dahuluk hosi Portugal, Frei António Taveira, to’o iha Pante Macassar, Ambeno no hosi fatin ida ne’e mak Evanjellu namkari iha rai Timor-Leste tomak. Fiar Katóliku mak sai identidade povu no país Timor-Leste nian. Ita bele dehan Oé-Cusse é o berço do país! Katak Timor-Leste hahú hosi Oé-Cusse.

Iha tinan lima liu bá, liu hosi Dekretu Lei N.o 3/2014, ne’ebé Parlamento Nasional aprova ho unanimidade, Estadu konkretiza ona artigu 5 no artigu 71 ita-nia Lei-Inan hodi hari’i Rejiaun Administrativa Espesiál Oé-Cusse Ambeno no Zona Espesiál Ekonomia Sosiál de Merkadu, tamba Oé-Cusse no Ataúro ninia estatu espesiál ne’ebé sei reje tuir polítika administrativa ho rejime ekonómiku espesiál. Aprova mós Decreto-Lei N. 5/2015 loron 22 fulan Janeiru ba Estatuto da Região Administrativa Especial de Oé-Cusse Ambeno (RAEOA).

Prezidente Lú Olo hateten katak loron ohin, mehi ida ne’ebé atu lori naroman foun ba ita-nia rai, hahú hosi hasai Oé-Cusse hosi enklavidade, ne’e katak hasai Oé-Cusse hosi raiketan.

“Hari’i RAEOA/ZEESM nu’udar produtu konjuntu entre fundador no líder-sira Nasaun ida ne’e nian ne’ebé mai ho vizaun ida deit mak atu hari’i, hahú hosi Oé-Cusse, zona espesiál ba komérsiu ho ninia karáter sosiál atu nune’e bele dudu kresimentu ekonomia ida ke bazeia ba ekonomia sosiál merkadu, atu nune’e bele sai modelu ba Nasaun tomak”, hateten Lú Olo iha loron aniversariu ba dala liman RAEOA, iha aeroporto Rota Sândolo, 18/06.

Bainhira Prezidente da Republika inagura aeroporto refere, Prezidente hateten katak iha tempu uluk liubá negosiante-sira hosi rai dok mai iha Timor tamba ‘Sândalo Branco e cor de limão que nasce em uma ilha chamada Timor’, “Ita nia foho nakonu ho ai-kameli ne’ebe hamorin ita nia rai no lori rendimentu mai tamba nia valor ekonómiku bo’ot los. Ohin ita hateke ba foho sira ne’e ita la hetan ona ai-kameli. Bele ka lae, ita kuda fali ai-kameli hodi hamorin fila fali foho sira ne’ebe haleu ita? Prezidente-Repúblika husik hela dezafiu ida ne’e ba ita hotu”, tenik Lú Olo.

Tuir Xefe Estadu ne’e katak, transporte aéreo loke dalan ba kresimentu no desenvolvimentu ekonómiku. Meiu transporte ida ne’e sei fasilita integrasaun enklave ida ne’e iha ekonomia rejionál no internasionál no sei oferese oportunidade hodi halo ligasaun ne’ebé importante tebes iha nível nasionál, rejionál no internasionál. Aeroporto Internasionál Rota do Sândalo sei promove komérsiu, turismu no oportunidade atu loke kampu de traballu.

Lú Olo mos haforsa liutan katak, turismu nu’udar atividade ida ne’ebé sei lori dinámika no mobilidade foun ba iha futuru ita nia-rai nian, no hanesan mós atividade ida ne’ebé sei loke dalan hodi diversifika ita-nia ekonomia.

Aeroporto Rota de Sândalo preenxe rekezitus seguransa fízika no aéreo iha nível internasionál, gasta osan hamutuk kuaze dólares millaun atus ida ruanulu [$120 milloens]. * [Zevonia Vieira | TAFARA.TL]

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.