Monday , December 10 2018
Home / Sosial & Politika / Lú Olo: Tuir Konstituisaun Laiha Ema Ida Bele Interfere, Tamba Sa Membru Nain 3 Lakoi Simu Pose?
Prezidente da Republika, Dr. Francisco Guterres Lú Olo halo entrevista ho jornalista sira iha palacio prezidensia. [Foto: Media PR | 20.06.2018]

Lú Olo: Tuir Konstituisaun Laiha Ema Ida Bele Interfere, Tamba Sa Membru Nain 3 Lakoi Simu Pose?

Prezidente da Republika, Dr. Francisco Guterres Lú Olo deklara katak nudar Prezidente da Republika sempre foti desizaun politika atu garante sidadaun sira, partisipa iha vida politika no kaer metin funsionamentu demokrátiku Estadu nian, tuir Lei inan, Konstituisaun Repúblika, no lei sira seluk. Lia hirak ne’e Prezidente da Republika hatoo iha sesaun solene, hodi loke sesaun dahuluk ba V Lejislatura Parlamentu Nasionál. Liu hosi deskursu Prezidente da Republika hateten

“Ho kbiit ne’ebé Konstituisaun Repúblika fó, ha’u nomeia General Taur Matan Ruak, nu’udar Primeiru-Ministru, indijita husi koligasaun partidus ne’ebé manán eleisaun lejislativa 2018. Tuir mós Konstituisaun Repúblika, ha’u nomeia no fó posse ba membrus Governu ne’ebé Primeiru-Ministru propoin, hodi nune’e, ha’u garante VIII Governu Konstitusionál harii kedas atu hahú hala’o ninia knaar”, hateten Lú Olo, 17/09/18

Lú Olo hatutan katak ho regra hanesan ho mos sentidu Estadu mak Prezidente da Republika halo diálogu ho laran nakloke ho Primeiru-Ministru, kona-ba nomeasaun no fó posse ba membrus Governu sira seluk. Tuir prosedimentu konstitusionál, Primeiru-Ministru mak propoin membrus Governu. Presidente Repúblika mak nomeia no fó posse. Nune’e, iha prosesu hili membrus Governu, bele haree katak Konstituisaun Repúblika fó dalan ba Prezidente Repúblika, Primeiru-Ministru atu tetu hamutuk kandidatu sira, molok sira kaer sira-nia knaar, nu’ udar membru Governu ba tinan lima.

Liu hosi deskursu liga ho impasse politika ne’ebe akontese, Prezidente Lú Olo hateten husi lista proposta ho naran 43, hato’o husi Primeiru-Ministru, “ha’u nomeia no fó posse ona ba membrus Governu 32. Hare’e ba ita-nia relasaun ho responsabilidade institusionál, ha’u la kompreende tamba sá mak membru tolu ne’ebé propoin husi Primeiru-Ministru no ha’u nomeia ona, lakoi simu posse. Iha ami nia diálogu, ne’ebé ha’ u halo nafatin ho laran nakloke no moos. Katak ha’u husu atu tetu didiak kandidatu sira ne’ebé Primeiru-Ministru propoin maibé ha’u seidauk nomeia”.

Eiz Prezidente Parlamentu Nasional ne’e mos deklara katak, tuir Konstituisaun, la iha ema ida mak bele interfere, halo presaun ka ezije ba titulár ne’ebé de’it, husi órgaun soberania sira kona-ba sira-nia kbiit Konstitusionál. Atu kompreende momoos, liu-liu líderes husi partidu polítiku sira, Deputadus, Membrus Governu katak, sidadaun hotu, tenke respeita liberdade ne’ebé Konstituisaun fó ba Prezidente Repúblika atu foti desizaun polítika kona-ba nomeasaun membrus Governu ne’ebé propoin husi Primeiru-Ministru. Prezidente da Repúblika foti desizaun hafoin sukat klean, hatene loloos ona katak sei proteje interese nasional no Estadu nian, tuir Lei haruka, “interese pesoál ka polítiku partidáriu la tama iha ha’u-nia desisaun, nu’udar Prezidente Repúblika, atu nomeia ka la nomeia membrus Governu propoin husi Primeiru-Ministru”. * [ Zevonia Vieira | TAFARA.TL | 17.09.2018 ]

 

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Komemora Loron Invasaun, PR Lú Olo Sauda CNC nia Inisiativa Hodi Hametin Memoria Kolektiva

Prezidente da Republika, Dr. Francisco Guterres Lú Olo sauda Centro Nasional Chega! no ekipa toma …

Leave a Reply

Your email address will not be published. Required fields are marked *