Lú Olo: UNDP harii KJFL, Centru Juventude Integradu Ba Inovasaun no Empreendorismu

“Iha ona inisiativa hosi UNDP harii Knua Juventude Fila Liman [KJFL], nudar sentru Juventude integradu ida ba inovasaun no empreendorismu. 400 mak simu ona formasaun nudar empreendedór no balun hala’o ona negósiu rasik”. Lú Olo

Asumtu juventude sempre sai issue importante hodi kontinua koalia, liu-liu konaba dezempregu. Liu hosi enkontru annual Forum ONG Timor-Leste [FONGTIL], Prezidente da Republika, Dr. Francisco Guterres Lú Olo mensiona konaba joven rihun ba rihun mak sai ba rai liur.

“Horiuluk ita-nia ema la hanoin moris iha rai-li’ur. Ita la iha tradisaun buka moris di ‘ak liu, iha rai seluk. Funu mak obriga ita-nia ema barak sai ba rai-li‘ur. Ohinloron, ita haree joven rihun ba rihun mak sai ba rai-liur. Biar sira kontribui maka’as ba dezenvolvimentu ho osan ne’ebé sira haruka mai família iha Timor-Leste, situasaun ida ne’e obriga ita rekonese katak ita hasoru problema boot ida hanesan Problema dezempregu”, hateten Lú Olo.

Lú Olo hatutan katak problema ida ne’e afeta maka’as maioria Povu Timor-Leste no maioria ne’e mak joven sira ho otas 35 ba kraik.

Prezidente da Republika husu organizasaun sosiedade sivíl atu ajuda Governu haree oinsá rezolve problema ida-ne’e. Iha ona inisiativa hosi UNDP harii Knua Juventude Fila Liman [KJFL], nudar sentru Juventude integradu ida ba inovasaun no empreendorismu. 400 mak simu ona formasaun nudar empreendedór no balun hala’o ona negósiu rasik.

“Imi ho ha’u hanoin katak moris-di’ak Povu nian tenke sai preokupsaun ba ita hotu. Se ita-nia povu la moris diák, ida ne’e signifika katak Estadu Timor-Leste seidauk kumpri ho di’ak ninia funsaun. Signifika demokrasia laiha folin”, tenik Lú Olo

Iha Salao Paraquail São José, Prezidente da Republika hus ba organizasaun sosiedade sivíl bele mobiliza tan joven sira seluk atu tuir formasaun kona-ba oinsá halo negósiu rasik ho susesu. Liuhusi dalan kria empregu ba ninia an rasik, joven ida-idak sei dezenvolve ninia talentu no matenek atu hamosu produtu foun no hetan rendimentu ba ninia moris no família sira-nian. Liuhusi dalan empreendorismu, rai balun konsege hamenus dezempregu. Ita timoroan bele mós tuir dalan ida ne’e .

“Ha’u husu mós organizasaun sosiedade sivíl atu ajuda hamoris no haforsa valór sira hanesan onestidade, respeitu no domin ba malu, nu‘udar sidadaun no membru família. Bainhira ita kuda beibeik valor morál iha ida-idak ninia fuan no iha ita-nia uma laran, ita-nia sosiedade tomak bele moris ho pás, armonia no estabilidade. Valores sira ne’e moris ho ema, atu fó tutan ba ema, hodi fó karáter ba ema, atu hametin demokrasia no liberdade, ne’ebé ita konkista ho ita-nia sakrifísiu boot”, hateten Lú Olo

Liu hosi deskursu Prezidente da Republika mos husu ba organizasaun sosiadade sivil sira atu diskute no haklean didiak liu, hodi kontribui ba área agricultura, eduksaun, saúde, justiça, programa kontra violénsia hasoru feto no labarik, programa hakbiit feto, programa ba ema ho defisiénsia, dezenvolvimentu turizmu iha rai-laran no seluk tan hodi bele tulun governu atinji meta moris-di’ak ba Povu doben ida-ne’e.

Sosidade sivil mos tenke kontinua servisu nafatin ho governu, atu hakbiit Povu oinsá halo kontrolu sosiál ho di’ak no apoia Programa Governasaun di’ak.

Iha Timor-Leste laiha ema ka sidadaun ida mak laiha valór! Hothotu serve ba buat ruma!

Mai ita la‘o ba oin ho fiar katak, ita sei lori Povu tomak ba moris-di’ak!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.