Saturday , November 17 2018
Home / Sosial & Politika / Malnutrisaun Iha TL Sei Aas, Ego: Tenke Esforsu an hodi Asegura Ai-han Iha Rai Laran
Komunidade agrikultor sira koeleta batar. [Foto: copyright SAPO.TL | 15.10.2018]

Malnutrisaun Iha TL Sei Aas, Ego: Tenke Esforsu an hodi Asegura Ai-han Iha Rai Laran

“Politika orsamental governu Timor-Leste nian la buka atu responde ba situasaun difisil iha setor agrikultura. Investimentu estadu nian ba setor agrikultura tun ba bebeik”. HASATIL

Hametin Agrikultura Sustentavel Timor-Leste [HASATIL] komemora loron mundial ai-han, ho tema Promove Ai-han Lokal Nutritivu hodi Hakotu Hamlaha no Mal-nutrisaun iha Tmor-Leste.

Liu hosi komemorasaun refere, Direitor PERMATIL, Ego Lemos hatoo deskurus katak promove no hasae seguransa ai-han iha Timor-Leste importante tebes, atu garante ema hotu bele asesu hahan no iha nia nutrisaun ne’ebe diak ba ema hotu nia saude.

Ativista ba agrikultura ne’e hateten katak Timor-Leste nasaun foun, hetan influensia barak hosi agensia internasional no nasaun boot sira, maibe governu iha hanoin diak hodi promove agrikultura sustentavel, ida ne’e pasu diak ida ne’ebe ita tenke kontinua hamutuk.

“Ne’e sinal diak ba Timor, labele para no kontinua fo hanoin ba governu atu respeita matenek loka sira nia pratika ne’ebe halo ona no kontinua promove ai-han iha rai laran”, hateten Ego iha sede HASATIL Farol.

Ego hatutan katak koalia konaba seguransa ai-han laos koalia deit konaba foos, maibe koalia ai-han sira seluk hanesan fehuk, batar, aifarina, talas no seluktan, “ita tenke hahu eduka ita nia povu no jerasaun foun oinsa han ai-han oin-oin hanesan fehuk, batar, aifarina. Ita tenke esforsu an hodi asegura ai-han iha rai laran.

Iha fatin hanesan Diretor Jeral Centru Logistika Nasional [CLN], Agusto Junior hateten katak iha fator importante ne’ebe presiza hatene liga ho seguransa alimentar mak hanesan stock [ketersediaan. Red] iha ka lae, oinsa nia distribuisaun ba ema hotu hodi bele asesu ka consume ai-han, oinsa ho konsumedor sira, saida mak sira han loron-loron no ikus liu konaba estabilidade ai-han, bele garante ai-han ne’e bele fornese to tempu naruk ka lae?

Diretor Agusto informa mos katak CLN halo esforsu hodi deteka ho didiak ba ai-han hun [main food. Red] iha Timor, tanba tuir rezultadu peskiza hatudu katak kada tinan Timor presiza hahan prinsipal 14000 ton no kada tinan Timor produs deit hahan 3815 ton. Sei halo mos peskiza konaba persentazen hira komunidade iha Timor laran toma han ka consume batar kada tinan.

Iha problema no risku boot ne’ebe akontese iha global liga ho asumtu agrikultura, liu hosi eventu loron mundial ai-han, Diretor Agusto informa katak, problema no ameasa ne’ebe hasoru mak hanesan rai nia bokur lakon [degradasi lahan. Red], ham aka pestisidade ne’ebe bele estraga ai-han sira ne’ebe kuda, krizi bee global no hadau malu rai.

Agusto husu ba HASATIL atu kontinua servisu makaas hodi halo kampanna kona ba agrikultura sustentavel no mos halo kampanna boot konaba fila fali ba toos.

Iha fatin hanesan liu hosi konferensia da imprensa ne’ebe organiza hosi HASATIL, portavoz HASATIL, Mariano Fereira ba jornalista sira katak HASATIL bolu governu, Parlamentu Nasional, Prezidente Republia no publiku tomak nia atensaun ba situasaun real iha Timor-Leste liga ba produsaun ai-han ira rai laran no dependensia ba importasaun ai-han hosi rai liur.

Timor-Leste nia situasaun produsuan ai-han sei nafatin laiha progresu boot, hafoin liu tiha tinan 15, maske governu Timor-Leste no ajensia dezenvolvimentu sira gasta ona osan barak ba seitor ne’e. Tuir dadus estatistika agrikultura nian hosi governu hatudu katak produsaun agrikultura kontinua tun.

“Ita nia merkadu sira nafatin domina hosi ai-han importadu no mal nutrisaun kontinua sai problema boot. Produsaun foos kontinua tun maske durante ne’e governu tau atensaun boot liu ba parte ne’e, liu hosi investimentu makaas ba iha irigasauan eskala boot hodi fornese bee ba natar sira no mos distribui trator 4000 resin ba agrikultor sira. Governu rasik rekonnese ona katak ho kondisaun ne’e Timor-Leste sei susar atu atinji tarjetu autosufsiente ai-han iha tinan 2030”, hateten Mariona Fereira, 15/10.

Protavoz HASATIL mos deklara katak politika orsamental governu Timor-Leste nian la buka atu responde ba situasaun difisil iha setor agrikultura. Investimentu estadu nian ba setor agrikultura tun ba bebeik. Alokasaun Orsamentu Jeral Estadu [OJE] tinan 2015 aloka orsamentu tok $34.457, iha 2016 tun ba tokon $24.826, iha 2017 tun ba tokon $21.926 no iha 2018 tun ba $14.679.

Tuir dadus MAP & FAO hatudu katak iha tinan 2007 Timor-Leste nia produsaun hare hare hamutuk 60.424 ton, hafoin sae tun hosi 2008 to 2014. Iha tinan 2015 produsaun foos total hamutuk 60.361ton. Tinan kotuk 2017, produsaun tun makaas ba 37.000 ton no iha previzaun katak sei tun liu tan ba 30.000 ton.

Dokumentu MAP nian konaba Seguransa ai-han no nutrisaun 2017 hatudu katak Timor importa mais menus 40% hosi sereais [foos no batar] ne’ebe ita consume. Malnutrisaun nafatin aas ho persentazen stunting ka kerdil 50.2%, wasting ka forsa laiha 11.0% no underweight ka krekas 37.7%.

Liu hosi loron mundial ai-han HASATIL husu ba governu tenke fo atensaun makaas no investe ba promove produsaun ai-han iha rai laran no promove produtu ai-han loka, hortikultura, produtu pesla no pekuaria inklui ai-han indigenous no a-han fuik sira ne’ebe eziste nanis ona iha Timor-Leste, tanba iha valor nutrisaun diak liu ba ema, sauda, ambiente no ekonomia rai laran. * [ Zevonia Vieira | TAFARA.TL | 15.10.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Juventude La Hakarak Promesas no Hakribi Atitude Koruptu

Hau fiar katak joven sira iha talentu atu hamosu no habelar idea foun no tau …

Leave a Reply

Your email address will not be published. Required fields are marked *