Wednesday , October 24 2018
Home / Eleisaun Parlamentar / Marí: Edukasaun Vokasional, Informal no Profesional Importante
Sekretariu Jeral partidu Fretilin, Dr. Marí Alkatiri esplika hela konaba sistema edukasaun ba juventude. [Foto: Zevonia Vieira | 02.05.2018]

Marí: Edukasaun Vokasional, Informal no Profesional Importante

“Estadu tenke kria sistema edukasaun ne’ebe diak, labele hotu-hotu tenke ba universidade, bele ba to iha universidade maibe tenke iha sistema ida ne’ebe integradu tanba atu dezenvolve rai ida, laos ho universitariu deit mak atu dezenvolve rai ida ne’e”. Marí Alkatiri

Partidu Fretilin organiza dialogu ho juventude sira, hodi koalia konaba programa politiku ba juventude. Iha dialogu ne’ebe marka prezensa hosi Sekretariu Jeral Fretilin, Dr. Marí Alkatiri, hatan ba preokupasaun ne’ebe mai hosi estudante UNTL, Domingos de Sousa liga ho kualidade edukasaun ne’ebe ladun favoravel ba estudante sira atu halo pratika.

Liga ho problema edukasaun, Mari Alkatiri responde katak edukasaun nudar seitor ida ne’ebe importante tebes, Iha tempu agora estadu tenke kria sistema edukasaun n’ebe diak, ne’ebe labele hotu-hotu tenke ba universidade, bele ba to iha universidade maibe tenke iha sistema ida ne’ebe integradu tanba atu dezenvolve rai ida, laos ho universitariu deit mak atu dezenvolve rai ida ne’e. Edukasaun vokasional, edukasuan informal no edukasaun professional importante tebes para atu dezenvolve rai ida ne’e.

Marí realsa katak tinan naruk nia laran, sei halo tan konstruksaun ba infrastrutura tanba se laiha infrastrutura dezenvolvimentu sei la mai. Infrastrutura tenke iha kualidade, atu nune’e edukasaun professional mos tenke lao no konsolida. Bainhira to ona iha universidade, se iha estudante ida mak estuda kona ba kimika bainhira laiha labotorium kualidade ne’e laos kimika, ne’e papel kimiku siginifika copy paste deit no hatene deit teoria. Tenke hadia sistema edukasaun nasional para labele vertical demais tenke horizontalidade oituan ne’e importante tebes.

“Formasaun vokasional no professional importante tanba bainhira dezenvolve infrastrutura ne’e servisu barak. Dala barak ita nia joven sira, ba servisu hanesan foti fatuk no rai henek tanba laiha formasaun professional. Halibur universidade, tenke hare sa kursu mak presija agora, hanesan siensias, matematika, kimikas no fizikas atu nune’e bele iha rasasinu lojiku, tanba matematika ne’e hanesan filosofia ho numerous”, esplika Marí Alkatiri ba juventude sira.

Iha programa politiku Fretilin nian, Mari Alkatiri afirma katak sei garante kualidade edukasaun, asesu ba eskola publika ba ema hotu ho igualdade no hamenus insusesu escolar hosi alunu sira, liu-liu iha ansisu basiku, liu hosi parseria ne’ebe metin liutan ho igreja Katolika no konfisaun relisiosa sira seluk.

Investe iha kualidade infrastrutura eskola sira nian, inklui dormitorio [hela fatin. Red] ba alunu sira ne’ebe hela dook hosi fatin eskola, no mos harii programa transporte escolar ba area ne’ebe prioritaria. Promove kultura nudar cavi hodi hakbiit prosesu aprendizajen valor sira konaba identidade nasional, sidadania no respeitu ba malu, hodi garante, uza ho domin no fahe valor patrimonial ne’ebe halo parte ba baze identidade Timor-Leste nian no harii biblioteka, museum no sentru kulutral.

Dialogu ne’ebe halao iha salaun Luz Clarita, 2/05, hetan partisipasaun masimu hosi reprezentante juventude sira hosi posto administrative Dom Aleixo, Cristo Rei, Vera Cruz, Nain Feto no estudante universitariu sira. Iha dialogu ne’e hetan observasaun direitu hosi Comisaun Nasional Eleisaun, PDHJ no observador nasional sira. *[Zevonia Vieira | TAFARA.TL | 2.05.2018]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *