Tuesday , May 21 2019
Home / Sosial & Politika / Marí: Fretilin Garante Estabilidade Tinan 10 Resin No Lori Osan Mai, Hodi Sira Seluk Ukun
Sekretariu Jeral Fretilin, Dr. Marí Alkatiri halo intrevista ho jornalista sira hafoin remata enkontru ho Presidente da Republika.[Foto: Zinho MD | TAFARA.TL | 15.11.2017].

Marí: Fretilin Garante Estabilidade Tinan 10 Resin No Lori Osan Mai, Hodi Sira Seluk Ukun

“Hau laos hanesan ema sira seluk, kuandu manan ita kontente, kuandu lakon ita kontra, ne’e laos hanesan ne’e, Fretilin hatudu ona, Fretilin garante estabilidade tinan 10 resin ona, laos estabilidade deit, lori osan mai para sira seluk ukun no gasta”. Marí Alkatiri

Primeiru Ministru hasoru malu ho Prezidente da Republika, Dr. Francisco Guterres Lú Olo, hodi aprezenta atividade regular nian. Hafoin remata enkontru ba jornalista sira Primeiru Ministru, Dr. Marí Alkatiri informa katak, iha sorumutu ne’e koalia liu liga ho preparasaun eleisaun antesipada no kampanye eleitoral ne’ebe sei hahu iha tempu badak.

“Partisipasaun ba eleisaun antesipada, STAE ho CNE halo esforsu para bele halo mobilizasaun boot liu, hodi nune’e povu bele partisipa iha aktu demokratiku boot ida, liu hosi eleisaun antesipada. Hau mos hatete ba Prezidente da Republika, hau atu ba deskansa oituan, prepara an ba kampanna ne’ebe besik ona, hotu-hotu hatene katak iha kampanna ida ne’e ,forsa rua mak sei hasoru malu mak hanesan Fretilin ho AMP”, hateten Marí

Ba jornalista sira Marí mos informa katak durante kampanye eleitora servisu governu nian sei lao nafatin hanesan babain, governu ida sei para nia servisu,

bainhira governu foun tama, “hau nia responsabilidade mos hanesan babain, hau la entrega hau nia kargu ba ema seluk, Lei la fo dehan, hau nia servisu tenke entrega ba ema seluk para atu halo kampanye. Hau labele hanesan Primeiru Minsitru no hau labele uza Primeiru Ministru nia kareta hodi ba halo kampanye, mais hau hanesan eiz Primeiru Ministru hau bele uza kareta eiz Primeiru Ministru, iha seguransa iha oin no kotuk”, esplika Marí, iha palacio Prezidensia, 04/04

Hatan ba GMNTV, se karik la manan iha eleisaun antesipada, Fretilin mos prontu simu? Sekretariu Jeral Fretilin ne’e hatan katak, “hau laos hanesan ema sira seluk, kuandu manan ita kontente, kuandu lakon ita kontra, ne’e laos hanesan ne’e, Fretilin hatudu ona, Fretilin garante estabilidade tinan 10 resin ona, laos estabilidade deit, lori osan mai para sira seluk ukun no gasta. Biar la manan tanba naok ne’ebe akontese iha 2012, komputador STAE nian mak fo fali vitoria ba partidu seluk, biar nune’e ami la halo buat ida hodi kontra, maibe hau fiar katak Fretilin atu manan mutlak”.

Iha fatin seluk komunidade Bairopite, Santina Alves [39], ba TAFARA.TL hateten kampanye politika sei halao iha semana oin, hanesan komunidade babain, husu buat ida deit katak lalika tan hamosu konflitu no violensia iha komunidade nia leet tanba interese grupu nian, “ami nia oan presiza halimar hakmatek no eskola, sira presiza kontente no la sente tauk iha sira nia nasaun rasik”.

Kampanye eleitora tuir planu ne’ebe mak CNE no STAE prepara, sei hahu iha loron 10/04 semana oin, partidu no koligasaun sira sei aprezenta programa poltika sira nian ba povu, hodi nune’e eleitor sira sei desidi partidu ne’ebe mak serve ukun hodi responde nesesidade povu nian ne’ebe mak seidauk atinji hanesan edukasun, saude, sai mukit no direitu sira seluk. * [ Zevonia Vieira | TAFARA.TL | 05.04.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Governu Japaun Inagura Renovasaun Eskola Hospitalidade no Turismo, Minami: TL Presija Rekursu Umanu Kualifikadu Iha Area Turismo

“Atu bele atrai turista internasional, Timor-Leste presija investe maka’as liu iha setor infrastrutura, atu bele …

Leave a Reply

Your email address will not be published. Required fields are marked *