Wednesday , October 24 2018
Home / Eleisaun Parlamentar / Marí: Fretilin Respeita TR, Maibe Konsidera Nafatin Rezultadu EA Laiha Lejitimidade
Sekretariu Jeral Fretilin, Dr. Marí Alkatiri apresenta akta manual STAE nian konaba votus ne'ebe aumenta iha urnas balun. [Foto: Zevonia Vieira | 25.05.2018]

Marí: Fretilin Respeita TR, Maibe Konsidera Nafatin Rezultadu EA Laiha Lejitimidade

“Iha akta manual tau total votu validu 476, maibe votus iha urna laran lolos iha deit 376 total votantes ne’ebe partisipa iha sentru votasaun, Votus 100 ne’e ba ne’ebe, iha iregularidades, ami la dehan iha manipulasaun”. Marí Alkatiri

Liga rezultadu hosi Tribunal Rekursu ne’ebe rejeita rekursu hosi Partidu Fretilin konaba iregularidade iha eleisaun antesipada, ba jornalista sira Sekretariu Jeral Fretilin, Dr. Marí Alkatiri hateten katak Fretilin la konkorda ho rezultadu ne’ebe fo sai hosi Tribunal Rekursu.

“Fretilin hatoo rekursu ba Tribunal de Rekursu atu aprezenta faktus, katak iha urnas balun, iha akta manual tau total votu validu 476, maibe votus iha urna laran lolos iha deit 376 total votantes ne’ebe partisipa iha sentru votasaun. Votus 100 ne’e ba ne’ebe, ida ne’e hanesan ezemplu deit ba Tribunal Rekurs [TR] katak iha iregularidades, ami la dehan iha manipulasaun”, hateten Marí iha CCF, 25/05

Marí afirma liutan katak iha urna balun iha 100 votus mais, 50 votus mais iha urna seluk, ne’e mak halo taxa partisipasaun mos sae liu 80%. Ne’e mak Fretilin aprezenta para husu rekontazen, para hare 100 votus ne’e mai hosi ne’ebe no ba partidu ida ne’ebe.

Ba jornalista sira Marí Alkatiri informa katak respostas hosi TR nian dehan, sira la hare manipulasaun. Maibe Fretilin dehan laos manipulasaun maibe Fretilin koalia iregularidade, “ami mos la akuza ema ida iha manipulasaun. Ami kaer fali ba akta mak dehan ne’e la los, tanba iha 100 votus amais, iha kada estasaun de votu, iha estasaun votu iha Timor laran tomak iha 1.160, se sura hotu urna sira ne’e votus iha hira ona mak tama, signifika ema vota oituan liu, duke votus ne’ebe tama iha urnas. Ida ne’e iregularidade, sasan ne’ebe la los, entaun tenke loke fila fali para hare votus sira barak liu ne’e halai ba ne’ebe, tanba saida votus barak liu ema no tanba saida votus iha fatin seluk oituan liu ema ne’ebe ba vota, ida ne’e deit mak Fretilin hakarak klaru”.

Tuir partidu Fretilin katak desizaun Tribunal nian la koriente ka laiha konsistensia, maibe ba jornalista sira atual Primeiru Ministru iha VII Governu Konstituisional ne’e hateten katak Timor-Leste nudar Estadu de Direitu Demokratiku, tuir sistema eleitoral, Tribunal Rekursu mak desidi ikus liu, no laiha rekursu ba fatin seluk, biar nune’e la signifika katak Fretilin konkorda ho argumentu Tribunal nian.

“Fretilin simu tanba laiha dalan ona, para atu halo rekursu maibe la konkorda nafatin no la konsidera rezultadu eleisaun ida ne’e lejitimu. Desizaun mai ona ita hotu hakruk, maibe Fretilin nia pozisaun klara katak rezultadu eleisaun nian ne’e liu ona hosi CNE halo apuramentu nasional laiha lejitimidade”, deklara Marí Alkatiri.

Iha akta rezultadu sentru votasaun eleisaun 2018, kodigu sentru votasaun 00100, naran sentru votasaun EP.RIALECO, Municipio AInaro, postu administrative Maubisse, suku Maubisse dadus hatudu katak total ema ne’ebe ba vota hamutuk 376 katak PEP hetan votus 6, PD votus 6, PR 1, Fretilin 37, MSD 0, MDN 7, FDD 23 no AMP 296 total votantes hamutuk 376 maibe iha akta total votu validu hetan 476, signifika liu votus aumenta 100.

Hatan ba TAFARA.TL karik TR iha laiha kapasidade atu halao analiza ba rekursu hosi Fretilin?

Marí responde katak Fretilin lakohi akuza TR katak laiha kapasidade, tanba ne’e mos la los, Fretilin hakarak konsistente katak Tribunal boot liu mak Tribunal Rekursu, Fretilin respeita, maibe konsidera nafatin katak rezultadu ne’e laiha lejitimidade.

Ba TAFARA.TL Marí mos hatoo katak hosi Provedoria Direitus Humanu no Justisa, [PDHJ] hateten ona katak iha partidu balun uza osan, ameasas oin-oin iha fatin hotu, kampanna diskriminasaun relijioza e rasial mai hosi leten kedas, laos iha kraik deit signifika katak eleisaun ne’e la tuir prinsipiu Konstituisional. Problema iha Oecuse mak boot liu. Fretilin la para atu denunsia, laos tanba Fretilin atu ba ukun ka la ukun maibe tanba Fretilin lakohi rai ne’e atu tama iha dalan ida ne’ebe klot ba bebeik.

Iha komunikadu impresa Fretilin nian mos esplika katak Fretilin identifika iha iregularidade barak relasionao prosesu apuramentu provizoriu no faktu sira ne’ebe kontribui ba, Fretilin hatoo nia kazu ba TR liu hosi rekerimentu ne’ebe husu TR atu konsidera posibilidade atu sura fila fali votu, hodi nune’e hodi tane as valor prinsipiu demokrasia nian, ne’ebe konsagra iha Konstituisaun RDTL. Rekerimentu Fretilin nian mak dalan ida ne’ebe partidu hatoo, hodi nakloke no hatoo informasaun ne’ebe TR no sidadaun la hetan asesu ba no haroman lalaok ne’e no loke dalan ba prosesu ne’ebe transparente, ne’ebe kaer metin lia los no integridade no rigor prosesu eleitoral.

Iha komunikadu imprensa mos Fretilin hateten katak nafatin respeita tomak ba orgaun soberania hotu, respeitu valor tomak ne’ebe hametin no hamahon Estado Direito, Fretilin maske rejeita argumentu hosi TR, sei respeita nafatin desizaun, maibe Fretilin la konsidera nafatin lijimtimidade ba rezultadu eleisaun nian. * [ Zevonia Vieira | TAFARA.TL | 25.05.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

PR Sei Estuda Lista Membrus Governu, Lú Olo: Hakarak Garante Bem Estar Do Estado

“Prezidente da Republika sei estuda hela, se to loron ida kazu hosi A ka B …

Leave a Reply

Your email address will not be published. Required fields are marked *