Mari: Fretilin Sei Halo Negosiasaun Neneik Ho Partidu Haat

“Respeita konstituisaun, siknifika partidu mais votadu, tenke hahu ona buka partidu sira seluk hodi koalia. Maibe hau komprende didiak mesajen povu nian no votu povu nian”, Mari Alkatiri.

Sekretariu Jeral Partidu Fretilin, Dr.Mari Alkatiri hasoru malu ho Prezidente Republika Dr.Francisco Guterres ‘Lu Olo’, tanba hetan konvite hosi Prezidente Republika tuir Konstituisaun haruka.

Ba jornalista sira Dr.Mari Alkatiri esplika kona ba objetivu hosi enkontru katak,  hodi husu ba partidu sira ne’ebe hetan asentu parlamentar hodi nafatin mantein paz no estabilidade no oinsa bele servisu hamutuk tuir povu nian interese.

“Tuir orientasaun Prezidente Republika nian, atu respeita konstituisaun, siknifika partidu mais votadu, tenke hahu ona buka partidu sira seluk hodi koalia. Maibe hau komprende didiak mesajen povu nian no votu povu nian, hau iha intendimentu ida ne’ebe klaru katak hotu-hotu iha legitimidade, sira hotu fatin iha parlamentu nasional, maibe povu hakarak liu-liu intendimentu hosi 2012, 2013 mai to 2017, atu hakuak tan sira seluk. Partidu foun rua tama, katak PLP ho nian preokupasaun no ninian aspirasaun legitimasaun. Khunto mos ho nian reprezentividade bele dehan boot, no tenke hakuak sira hotu”, tenik Mari Alkatiri.

Eiz Premeiru Ministru ne’e afirma liutan katak, povu hakarak rai ne’e tenke lao ba oin, laos ho krizi oin-oin. Povu mos hatudu momos katak PD ne’e partidu ida mai hosi jerasaun foun, biar lakon tiha sira nian lider, maibe sira nian eleitoradu la lakon. PD mos konsilidadu entaun labele dehan katak PD ne’e partidu joven, maibe PD iha eleitoradu no konsilidadu, ida ne’e mak mesajen povu nian. Tenke respeita hakuak ema hotu no bele dehan katak, governu tenke halo governasaun aberta, katak bele halo konsulta ho Igreja no religiozas sira seluk no sosiadade sivil. Governu ida ne’ebe tenke loke odamatan ne’ebe nakloke.

Ba jornalista iha loron 3/8, iha palasio Prezidente Bairo Pitte, hateten Fretilin sei halo negosiasaun neneik ho partidu 4, sekarik sei halo lalais mos Fretilin prontu atu halo.

Bainhira hatan ba perguntas hosi TAFARA.TL kona ba karik Dr.Mari Alkatiri sei say Premeiru Ministru, no se mak sei lidera projetu ZEESM? Sekretariu Jeral Fretilin hateten katak, “se hau sai Premeiru Ministru karik, projetu Zeesm sei ba iha municipio hotu-hotu, katak hau sei reprzenta Oecusse ba Municipio hotu-hotu”.

Tuir Dr.Mari Alkatiri katak rezultadu hosi enkontru ne’ebe Prezidente Republika halo ho partidu sira, atu fo mesajen ba povu tomak katak Prezidente Republika ba povu tomak.

Iha parte seluk, fungsionariu Publiku, Joana Mendes bainhira dadalia ho jornalista TAFARA.TL hatoo esperansa katak, espera partidu 5 ne’e bele mantein unidade, paz no estabilidade, labele halo povu moris iha preokupasaun nian laran. Povu hakarak hatene saida mak sira sei halo ba povu nian interese no tenke respeita povu nian votus.* [Zevonia Vieira | TAFARA.TL | 03.08.2017].

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.