Wednesday , June 19 2019
Home / Sosial & Politika / Masakre Liquiça 1999, Lú Olo: Estadu Tenke Esforsu An, Hodi Hamenus Sira nia Halerik
Prezidente da Republika, Dr. Francisco Guterres Lú Olo hatoo deskursu iha kongresu RENETIL iha CCD. [Foto: Media PR | 17.03.2018]

Masakre Liquiça 1999, Lú Olo: Estadu Tenke Esforsu An, Hodi Hamenus Sira nia Halerik

Halerik, tauk, hakilar no matan wen suli tanba tenke lakon oan, inan, aman no maun alin sira. Ran suli nakfakar iha rai, ran suli ne’ebe mai hosi luta nain sira, ran ne’ebe hatudu sira nia aten brani ba inimigu sira tanba lakohi sai atan tan ba ukun kolonialismu.

Masakre Liquiça loron 5 Abril 1999, halo rai Liquiça sai maten, rona deit kilat no aisuar ne’ebe semo namtati.

Prezidente da Republika, Dr. Francisco Guterres Lú Olo, hatoo deskursu iha loron masakre Liquiça Abril 1999, hateten katak maluk sira ne’ebe lakon familia uma-laran, belun no kolega sira iha Abril 1999 no moris ohin loron ho laran taridu no trauma, “hau hatoo hakoak boot ho Estadu no povu Timor-Leste nia naran. Ita-nia amu lulik Padre Rafael dos Santos, sasin importante ida iha masakre Liquiçá la hamutuk ona ho ita, maibé ha’u fiar katak sasin sira seluk bele kompleta informasaun kona-ba akontesimentu molok, durante no hafoin masakre Liquiçá”.

Iha deskursu Prezidente Lú Olo esplika katak konaba krime boot sira, artigu 160, Konstituisaun RDTL esplika katak, “Hahalok sira-ne’ebé halo husi loron 25 Abríl tinan 1974 to’o loron 31 Dezembru tinan 1999, ne’ebé bele konsidera nu’udar krime hasoru umanidade, jenosídiu ka funu nian, nia prosedimentu kriminál tenke hala’o iha tribunál nasionál ka internasionál sira”.

Lú Olo afirma liutan katak maske iha Konstituisaun hatete klaru maibe faktor oioin la permite tribunal nasional no internasional hahú ka hala’o prosedimentu kriminál to’o rohan atu tesi lia no hatuur justisa, tuir dalan legal, maibé Estadu Timor-Leste tenke buka dalan nafatin atu haree oinsá hatán ba ejizénsia justisa hosi vítima no sobrevivente sira, atu sira bele moris hakmatek iha tempu ukun-an ne’e.

Liu hosi komemorasaun masakre Liquiça Abril 1999, ho tema Husu Justisa, Prezidente iha esperansa boot liu hosi seminariu bele ajuda Estadu hare oinsa hasoru dezafiu no oinsa hakotu difikuldade ne’ebe satan justisa konaba krime boot sira

“Halo justisa la’os dalan mesak atu hamenus halerik no habelar laran-hakmatek ba ita-nia Povu terus-nain. Iha mós dalan seluk ne’ebé Estadu hala’o hela hanesan rekoñese vítima no família sira-nia sakrifísu iha tempu luta libertasaun nasional, Estabelese Komisaun Akollimentu, Verdade no Rekonsiliasaun [CAVR], Tau matan ba mate-restu,   faluk no oan-kiak sira, Komemora datas istórikas, Buka no haloot eroi-sira iha semitériu eróis no harii instituisaun Centro Nacional CHEGA”, hateten Xefe Estadu, 3/04.

Lú Olo mos fo hanoin katak iha ona inisiativa diak seluk hosi organizaun naun-governamental hanesan ACBIT, Assosiasaun Vítimas no AJAR no hosi sidadaun sira atu tau matan ba vítima no sobrevivente sira, Igreja Católica, ita haree mós esforsu oioin iha kontextu Justisa no Direitus Umanus.

“Liquiça oan sira hakarak hetan objetivu boot tebes, katak partisipante ida-idak sei fila ba uma ho nasionalismu klean liután. Ho nasionalismu klean ne’e , ha’u fiar-metin katak partisipante ida-idak sei habelar liután ninia sentidu devér, nu’udar sidadaun, no nune’e, sei serve diak liu, Povu no Nasaun Timor-Leste, ho ida-idak nia kbiit no matenek rasik, liu hosi knaar ne’ebé de’it”, tenik Lú Olo

Prezidente Lú Olo mos nota katak maluk Liquiça oan sira hakarak Estadu Timor atu halo esforsu liutan, hodi hare oinsa hamenus sira nia halerik no kontribui ba sira nia moris hakmatek iha tempu ukun ne’e

Milisia Besi Merah Putih [BMP] komete iha masakre Liquica nian hamutuk ho Polisia [POLRI] no Militar Indonesi [TNI], oho kuaze ema 100 resin refujiadu desarmado ne’ebe halai ona hosi violensia hosi milisia pro-Indonesia sira, hodi buka fatin seguru iha residensia padre sira. * [ Zevonia Vieira | TAFARA.TL | 03.04.2019 ]

 

 

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Lú Olo: Jornalista Mak Fahe Informasaun Importane no Promove Debates

“Jornalista sira tenke iha responsabilidade, Adelino Gomes hateten jornalista laos hatene hakerek nutisia deit, laos …

Leave a Reply

Your email address will not be published. Required fields are marked *