Masakre Setembru Negro Iha Suai, Sira nia Mate Kontribui Ba Ukun Rasik-An

“Masakre Setembru Negro la’os halo ita triste deit, maibe ho sira nia mate mak ita ukun rasik-an, tamba ne’e ita tenki luta atu ita nia nasaun ne’e labele hasoru krize no buat ne’ebe fo impaktu ladiak ba ita nia nasaun,” Amelia.

Setembru negro ne’ebe akontese, halo povu liu-liu komunidade iha Covalima laiha kbiit hodi hamaran sira nia matawen. Todan ne’ebe sira leba hanesan naha boot ida ne’ebe tau hela iha kabas, hahu hosi labarik kiik no ferik no katuas sira haree ho matan ba sadismo ne’ebe akontese iha Suai.

Ajente PNTL Municipio Covalima no nudar mate restu hosi masakre Setembru Negro, Amelia de Jesus Amaral ba Jornalista TAFARA.TL iha fatin serimonia Komemorasaun loron Proklamasaun Independensia ba dala 42, loron 28/11 iha Municipio Covalima hateten, “masakre Setembru Negro la’os halo ita triste deit, maibe ho sira nia mate mak ita ukun rasik-an, tamba ne’e ita tenki luta atu ita nia nasaun ne’e labele hasoru krize no buat ne’ebe fo impaktu ladiak ba ita nia nasaun.”

Amelia husu ba joven feto no mane sira no estudante tomak labele involve-an iha krime, labele barukten, tenke luta nafatin, atu estuda nune’e bele lori nasaun ne’e ba oin, tamba ema matenek mak bele dezenvolve nasaun ida ne’e.

“Husu ita hotu atu kontinua mantein nafatin estabilidade, liberdade ne’ebe iha tinan barak ita hakarak atinji, ohin ita hotu sente, ita tenki habelar ba ita nia jerasaun tomak, nune’e labele halakon espiritu patriotismu, katak ida ne’e mak ita nia historia no prosesu ba libertasaun ba Nasaun doben Timor-Leste”, tenik Amelia.

Entretantu iha diskursu Prezidente Republika Francisco Guterres Lu-Olo afirma katak saúda maluk Suai-Oan sira, ne’ebe ho aten barani, espiritu sakrifisiu no domin ba komunidade no nasaun, kontribui maka’as ba independensia. Iha aniversariu Proklamasaun Independensia ida ne’e, nasaun tomak fo homenajem espesial ba espiritu nasionalista Suai-Oan sira nian.

“Ha’u hakru’uk ba memória vítimas masakre Setembru 1999. Raan-Fakar ne’e la’os hamosu deit lutu ba Suai-Oan sira maibe ba nasionalista timor-oan hotu-hotu. Hau hato’o ha’u-nia sentimentu kondolénsias klean no solidariedade ba faluk no oan-kiak sia no mós ba familia hotu-hotu ne’ebe lakon maluk uma-laran, iha Setembru 1999”, Esplika Lú Olo.

Xefe Estadu ne’e haktuir, durante luta tinan 24 akontese masakre oi-oin, ema barak mak mate no terus iha rai laran tomak. Estadu hahi no respeita mártir no erói hotu sira nia sakrifisiu. Aman nasaun ne’e hakru’uk ba memoria maluk sira hotu nian, ne’ebe fó-an ba mate, iha Timor-Leste tomak, hodi tane luta ba dignidade no liberdade ba ita-nia patria.

Iha fatin hanesan Veternanu Amaru da Cruz Lelo alias ‘Domi Dom’ sente kontente tamba durante tempu barak Estadu Timor-Leste komemora loron proklamasaun independensia ne’e  iha municipio seluk, maibe ohin loron mak mosu mai iha Covalima no partisipa husi reprezentante Povu Municipiu 13, inklui bainaka husi nasaun seluk.

Nune’e Domi Dom husu ba veteranus tomak atu partisipa ativa iha komemorasaun loron boot Timor nian hotu, nune’e bele fo ezemplu ba ita nia Oan no Bei Oan sira. Husu mos ba Joven sira iha Covalima no mos iha Timor-Leste tomak, atu hanoin nafatin martires libertasaun nasional ne’ebe mate ona inklui mos hirak ne’ebe sei moris, buka atu hatene tuir liu husi ami mak sei moris ne’e, tamba ami sei bele konta historia oan ruma ba alin Joven sira, nune’e Jovens sira bele hatene historia funu ba ita nia libertasaun,” dehan Domi Dom ba TAFARA.TL.

Membru Komunidade postu administrativu Maucatar nu’udar mos Mate Restu Masakre Setembru Negro, Rumão Gusmão alias ‘Mau Sabir’ ba TAFARA.TL hateten hosi loron 28 Novembru husu ba joven sira kaer liman hamutuk didiak, hodi hadia nasaun Timor-Leste no bo’ot sira [liders Timor nian. Red]’ hala’o Dezenvolvimentu didiak iha Munisipiu 12 no Rejiaun Autonomia Oecuse.* [Martinho Moniz | Estudante Estajiadu Dep.CS, UNTL | TAFARA.TL | Editor: Zevonia Vieira | 28.11.2017].

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.