Mate Isin Joven Nain Tolu ba Tragedia 18/11 Hakoi Ona Iha Rate Bekusi

Joven nain tolu ne’ebe hetan tiru hosi oknum polisia iha loron 18/11 madrugada, halao ona seremonia funeral iha rate Bekusi, hafoin liu tiha prosesu otopsia durante loron rua nia laran no hader kalan ida iha uma familia matebian.

Familia matebian, kolega no komunidade em jeral asiste hamutuk seremonia funeral ho matawen nakonu tanba sente todan no triste atu husik hikas joven nain tolu ne’ebe tenke hakotu sira nia peregrinasaun iha mundu ida ne’e.

Joven nain tolu ne’ebe mak mate Erick Joni Robertus Bria (24), Luis Kevin Saldanahha Belo (18) no Leonildo Eduardo Ximenes Sequira (18). Sira nain tolu mate tamba hetan tiru husi oknun polisia bainhira sira komemora tinan ida festa kore metan iha Kuluhun de Baixu.

Antes ba hakoi familia matebian sira lori mate isin ba misa iha igreza Motael ne’ebe prezidi husi Padre Paroquia Santo Antonio Motael Pe. Guilhermino da Silva.

Iha humilia Pe. Guilhermino hateten se ita ema moris, sei la hakribi ita nia sala, ita sei mate tuir hanesan ho sira.

“Imi la hakrimi imi nia dala imi mos sei mate hanesan sira. Ida ne’e mak jesus nia lia fuan ba ita hotu nudar nia ema. Ita dala ruma sibuk ho ema seluk nia moris iha akontesimentu ne’ebe ema ida atravesa sempre iha komentariu balun ne’ebe mosu ne’ebe la afavor ka komentariu negative,” esplika Pe. Guilhermino.

Iha seremonia funeral refere partisipa mos hosi membru governu, Komandante Jeral PNTL ho membru Polisia sira, joven lubuk ne’ebe fo solidaridade no sosiadade sivil sira.

Matebian nain tolu husik hela alarme ba nasaun nurak ida ne’e atu la akontese tan violasaun direitus humanus no hahalok brutalismu hosi parte seguransa nian. * [ Jesuino Marcal de Jesus | Editor: Zevonia Vieira | TAFARA.TL | 21.11.2018 ]

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.