Thursday , May 23 2019
Home / Sosial & Politika / Media Sosial Iha Era Digital Sai Obstaklu, Matias: Media Mainstream Tenke Sai Media Investigativu
Secretário de Estado do Conselho de Ministro e da Comunicação Social, Matias Freitas Boavida halo entrevista ho jornalista sira iha Palacio do Governu. 10/10. [Foto: Zevonia Vieira | TAFARA.TL | 10.10.2017].

Media Sosial Iha Era Digital Sai Obstaklu, Matias: Media Mainstream Tenke Sai Media Investigativu

“98% hosi joven sira ne’ebe hatene kona ba internet, no 79.5% joven sira ne’be asesu internet no smart phone hodi asesu informasaun, du ke lee media professional hodi hatene informasaun ne’ebe lolos”. Data Universidade Harvard

Digitalizasaun, globalizasaun no rapidens media sosial sai obstaklu ba media mainstream ka media profesionais sira, tanba media sosial lais liu media mainstream hodi publika informasaun, maske informasaun balun falsu. Sekretariu Estadu Konsellu Ministru no Komunikasaun Sosial, matias Freitas Boavida husu ba Media Mainstream sira tenki sai media investigative, hodi garante kredibilidade informasaun.

Asuntu ne’e sai asuntu ba diskusante sira iha serimonia seminariu nasional, selebrasaun aniversariu Media STL ba dala 25, iha edifisiu Pusat Budaya Indonesia, Dili, 31/01.

Matias Freitas Boavida hateten media sira tenki halo kontrolu ba poder, publikasaun notisia tenke cover both side [kobre parte rua hotu. Red] media labele sunu situasaun, jornalista sira tenkiesai Jornalista investigativu.

“Ba oin ne’e oinsa atu bele asegura kredibilidade no responsabilidade notisias nian bem rigoroza no husi ne’e ema bele fiar liu tan, media sira nia prezensas. Se lae ho digitalizasaun ne’ebe ita iha bele hamihis media tradisionais ne’ebe ita iha,” dehan Matias Freitas Boavida.

Matias Freitas Boavida haktuir katak asuntu komunikasaun sosial ne’e asuntu ne’ebe klaru ona, presiza deit responsabilidade, etika no professional, “sai Jornalista la’os tanba servisu laiha, maibe tanba vokasaun”.

Governante ne’e husu mos ba leitores sira, atu sai leitor ne’ebe mak buka hatene buat ne’ebe los, tanba prezensa Smartphone, prezensa media digitais sira, prezensa blogo, prezensa facebook, no sel-seluk, sira ne’e bele kahur antre notisia la los [fake news. Red ] no notisias ne’ebe mak los.

“Ita nia leitores sira ne’e, tempu to’o ona atu bele ida-idak iha kapasidade de identifikar, leitura notisias propriu sira ne’ebe mak fo sai”, tenik Matias Freitas Boavida.

Entretantu observador Media, Marcelino Magno hateten, oras ne’e media professional sira konfuzaun atu ba ne’ebe, ba kotuk ka ba oin. Situasaun ne’e akontese iha mundu tomak.

“Iha tinan lima ba kotuk, ita ba Indonezia sei haree ema kaer no lee jornal, maibe ohin loron laiha ona, ema uza deit Smartphone hodi asesu digitalmente”, hateten Marcelino

Dosente ne’e haktuir liu tan katak, situasaun media ohin loron difisil liu fali situasaun ida uluk, uluk maske iha orde Suharto nian, informasaun ema depende liu ba Jornalista no media mainstream. Tempu agora todan liu tamba kompetisaun entre media mainstream no media sosial. Media sosial nia Jornalista barak liu, tamba ema hotu ne’ebe iha facebook, twitter, instagram, blogspot no seluk tan, Media mainstream nia abut mak cover both side no investigativu.

Nune’e Marcelino Magno husu Jornalista sira tenki badinas atu aprende, tenki hakerek ho rigor no Media sira tenki harii ka loke biblioteka iha servisu fatin nune’e bele fo espasu ba Jornalista sira hodi aprende.

Impaktu hosi media social ba media professional hamosu obstaklu boot, tanba iha realidade iha ema idak-idak nia liman sempre kaer sasan teknoligia, ne’ebe konnesidu ho naran smart phone. Ho teknolojia ida ne’e, hamosu informasaun ka asesu informasaun ho lalai. Iha tempu uluk, jornalista sempre uza lapizeira no suratana, video kamera no sasan manual seluk, maibe ohin loron hetan mudansa boot no media sai moris liutan. Liu hosi era teknolojia modernu ida ne’e, medias social no citizen journalism ka jurnalismu komunidade hetan progresu boot liutan

Tuir rezultadu hosi peskiza media Kompas iha Jakarta katak tuir prediksaun ema ne’ebe asesu media social liu hosi 30 billiaun ema iha mundu kada loron, hodi asesu informasaun no fahe tutan nutisia falsu iha media social, liu-liu joven sira. Dadus ne’e hetan mos hosi UNICEF, universidade Harvard iha Amerika

98% hosi joven sira ne’ebe hatene kona ba internet, no 79.5% joven sira ne’be asesu internet no smart phone hodi asesu informasaun, du ke lee media professional hodi hatene informasaun ne’ebe lolos. *[Martinho Moniz | Editor: Zevonia Vieira | TAFARA.TL |31.01.2018].

About Martinho Moniz

Martinho Moniz nudar Managing Editor no Sekretariu Redasaun TAFARA.TL.

Check Also

MEDSOS Sai Obstaklu Ba Servisu Jurnalismu, Akara: Tenke Halo Edukasaun Sivika Konaba Internet Saudavel

“Kna’ar importante hosi jornalista professional sira atu fo informasaun ne’ebe los, kredibel ba publiku, no …

Leave a Reply

Your email address will not be published. Required fields are marked *