Tuesday , May 21 2019
Home / Sosial & Politika / MEJD: Presiza Hakbesik Estudantes Ba Fatin Istoriku, Lú Olo: Hakerek Istoria Martir no Hatama iha Kurikulu
Ministra Edukasaun Juventude no Desportu [MEJD], Dulce de Jesus Soares hatoo deskursu iha loron Invasaun 7 Dezembru iha Ponte Kais Dili. [Foto: Zevonia Vieira | 07.12.2018]

MEJD: Presiza Hakbesik Estudantes Ba Fatin Istoriku, Lú Olo: Hakerek Istoria Martir no Hatama iha Kurikulu

Istoria Timor ne’ebe akontese iha tempu pasadu importante tebes ba jerasaun foun sira atu hatene no komprende saida mak akontese, hodi rezulta ohin loron povu Timor hetan nia liberdade hosi okupasaun Indonezia.

Liu hosi komemorasaun loron Invasaun 7 Dezembru 1975-2018, Ministra Edukasaun Juventude no Desportu [MEJD], Dulce de Jesus Soares iha deskursu hatoo katak hanoin aswain sira nia kolen importante tebes, tanba liu hosi hanoin aswain sira nia kolen mak bele ajuda haburas diak liutan espiritu nasionalismu, espesialmente liu hosi akontesimentu historiku sira.

Ministra Dulce hateten oinsa atu bele kuda no hametin valores nasionalismu Timorense sai buras no metin diak liutan iha future?

“Ita hotu presiza fo liman no fo hanoin ba malu atu bele halo saida deit hodi preserva fatin no dokumentus istoriku sira. Oinsa atu autor no testemunhavivu sira bele konta istoria iha tempu funu da rezistensia”, hateten Dulce Soares iha Ponte Kais Dili.

Ministra hateten katak MEJD iha tinan hirak ba kotuk, foti ona politika atu inkorpora istoria rezistensia nian iha kurikulu nasional ba 1 no 2 siklu, maske tempu ne’eba materia ne’e sei ho porsaun kiik. Iha 4/12/2018 MEJD no Centro Nasional Chega! asina ona Nota de Entendimentu atu oinsa inkorpora substansia rekomendasaun Chega! ba ensinu sekundariu no aumenta tan porsaun istoria rezistensia nian ba ensinu baziku sira.

“Presiza hakbesik joven sira no estudante sira ba fatin istoriku no muzeu da rezistensia atu nune’e ita nia oan sira bele hetan esplikasaun mais direta ba istoria sira iha pasadu. Joven no estudante sira presiza hatene oinsa sakrifika an ba lia los no halao atividades pozitu sira. Sakrifika oras ba estuda, aprende no aprende hahalok diak sira, hahalok ne’ebe bele foti ita nia an rasik, foti ita nia familia no foti ita nia nasaun doben, Timor-Leste nia imajen iha mundu rai klaran”, hateten Dulce Soares

Hanoin hanesan mos mai hosi Prezidente da Republika, Dr. Francisco Guterres Lú Olo hateten katak hakerek istoria martir sira nian no hatama iha kurikulu eskola sira nian ba jerasaun foun. Harii duni monument memoria ida iha ne’e.

“Ita sei organiza an hodi hadi no tau matan ba bebeik ba fatin lulik ida ne’e ho servisu voluntariu, nudar dever ita hotu nian laos estadu nia deit”, hateten Lú Olo. * [ Zevonia Vieira | TAFARA.TL | 07.12.2018 ]

About Zevonia Vieira

Zevonia Vieira, Chefe Redasaun TAFARA.TL, hamutuk ho Metodio Caetano Moniz & Fernando Antonio da Costa hari media online TAFARA.TL, iha Oe-cusse, Ambeno, dia 23 de Agosto de 2015.

Check Also

Governu Japaun Inagura Renovasaun Eskola Hospitalidade no Turismo, Minami: TL Presija Rekursu Umanu Kualifikadu Iha Area Turismo

“Atu bele atrai turista internasional, Timor-Leste presija investe maka’as liu iha setor infrastrutura, atu bele …

Leave a Reply

Your email address will not be published. Required fields are marked *